Read Ngaju YEREMIA 22 Bible Online

YEREMIA 22 - Ngaju bible

YEREMIA 22

¹TUHAN manyoho Aku haguet akan istana raja Yuda, turonan Dawid, uka manyampai peteh TUHAN akan raja, tuntang akan kare pagawaie, hayak oloh Yerusalem. Jetoh kare auh TUHAN dengan ewen,

³“Keleh malalus kabujur tuntang kaadilan. Paliwus oloh je ihamis bara kuasan oloh je mahamis ie. Ela manindas atawa mawi kapapa dengan oloh bangsa beken, dengan anak nule atawa balo. Ela mampatei oloh je jaton kasalae intu eka toh.

⁴Amon keton toto-toto malalus kare parentah te, maka kare raja je marentah kilau Dawid akan tame kare lawang istana toh. Ewen hayak dengan kare pagawai tuntang rayat ewen akan manongkang kareta bakuda.

⁵ Tapi amon keton dia manumon kare parentah-Ku, maka Aku sumpah je istana toh akan jadi tisan taloh baderep je karak-karake. Aku, TUHAN, jari hakotak.

⁶Akang-Ku istana raja Yuda bahalap toto, kilau kahalap tanah Gilead tuntang kare bukit Libanon; tapi eka te akan iawi-Ku jadi padang pasir je dia ielai awi oloh.

⁷Kareh Aku mangirim oloh uka mamparusake. Ewen akan mimbit kapak, tuntang mampalongkang kare jihie je bahalap je inampa bara kayu alau Libanon. Palus ewen manjakahe akan apui.

⁸Limbah te are oloh bangsa beken akan mahalau hete tuntang misek sama arepe mbuhen Aku, TUHAN, jari mawi taloh kalote akan lewu je bahalap te.

⁹Palus oloh akan tombah tahiu taloh handiai te je uras manjadi awi keton jari mangalapean janjin keton dengang-Ku, Hatallan keton, tuntang jari manyembah hayak sombayang akan kare hatalla beken.”

¹⁰Oloh Yuda, ela kapehe atei tagal pampatei Raja Yosia. Keleh manangis tagal Yoahas anake awi ie jari iimbit haguet tuntang dia akan haluli tinai. Ie dia akan mite petak danume tinai.

¹¹ Tahiu Yoahas, anak Yosia, je jadi raja Yuda mangganti bapae, TUHAN hamauh kalotoh, “Ie jari haguet bara hetoh, tuntang dia akan haluli tinai.

¹²Ie akan matei intu eka tawanan, tuntang dia akan mite lewu toh tinai.”

¹³Calaka oloh je mamangun humae hapan gawie je dia bujur, tuntang mampalombahe hapan gawie je dia buah. Calaka ie je manyoho oloh bagawi tapi jaton upahe.

¹⁴Calaka kea oloh je hamauh, “Kareh Aku mamangun istana je hai dengan kare kamar je lombah intu susun je hunjun,” balalu intu istana te inampae baunsengok hapan bingkai bara kayu alau Libanon, tuntang inyapu bahandang.

¹⁵Hining, o raja Yoyakim! Amon ikau mamangun istana hapan kayu alau Libanon je paling bahalap, en jete tandae je ikau raja labih bahalap bara kare raja beken? Coba ingat bapam: Ie mangkeme pambelom je sanang mangat tuntang mandino hasil huang kare satiare; awi ie bujur tuntang dia mamihak hayak mamutus perkaran oloh je belom susah dengan adil. Puna kalote kapatut oloh je kasene TUHAN.

¹⁷Tapi ikau Yoyakim, beken. Ikau baya manggau kaontong akan arepm kabuat. Ikau mampatei oloh je jaton kasalae, tuntang mahenyek rayatm hapan katulas.

¹⁸ Awi te tahiu Yoyakim raja Yuda, anak Yosia, TUHAN hamauh kalotoh, “Metoh pampateie oloh jaton je manangis ie; jaton kea je hamauh, ‘Kayah, sobatku, kayah.’ Jaton je kapehe atei atawa hamauh, ‘Pasi Raja!’

¹⁹Yoyakim akan iihir tuntang injakah akan luar lawang Yerusalem, kilau je iawi oloh dengan hantun kalidai.”

²⁰TUHAN hamauh, “O oloh Yerusalem, keleh haguet akan Libanon tuntang akan Basan, palus mangkariak intu kanih. Keleh manambawai hong kare bukit Moab, awi uras kare oloh je pakat dengam jari impakalah.

²¹Aku jari hakotak dengam metoh ampim bahalap, tapi ikau dia maku manyeneh. Puna kalotoh gawim bara bihin sampai toh; dia puji ikau manumon auh-Ku.

²²Awi te, kare pamimpin ayum akan lilap kilau ihimon riwut. Kare oloh je pakat dengam akan iimbit kilau tawanan, tuntang lewum ihina hayak impahawen tagal kapapan gawim.

²³Ikau melai sanang mangat ingaliling kare jihin kayu alau Libanon; tapi rahian andau amon ikau buah kapehe, ikau akan kapehe kilau oloh bawi je metohe manak.”

²⁴ TUHAN hamauh dengan Raja Yoyakhin, anak Yoyakim raja Yuda, “Tagal Aku, Hatalla je belom, Aku mansanan akam, aloh ikau akang-Ku kilau tisin cap hong lenge gantaung-Ku, tapi ikau akan imarut-Ku manganae.

²⁵Ikau akan inyarah-Ku akan kare oloh je eka kajilekm tuntang je handak mampatei ikau. Ikau akan inyarah-Ku akan Nebukadnesar raja Babel, hayak kare oloh ayue.

²⁶Ikau tuntang indum akan iharak tuntang inganan awi-Ku akan tanah je dia petak danum ayum, tuntang intu hete keton akan matei.

²⁷Keton akan paham taharu dengan tanah toh, tapi ikau dia akan haluli.”

²⁸Aku Yeremia hamauh, “En raja Yoyakhin jari sama kilau sarangan balanai je pusit je inganan tuntang dia ingilak tinai? En jete bukue ie tuntang kare anake iharak tuntang inganan akan lewu je dia ewen kasenee?”

²⁹O lewungku, hining taloh je insanan TUHAN,

³⁰“Oloh te jari inukas akan nihau kare anake tuntang harajur jaton mandino hasil huang pambelome. Bara turonae ije biti mahin jaton je olih marentah intu Yuda kilau raja turonan Dawid. Aku, TUHAN jari hakotak.”