Read Ngaju YEREMIA 23 Bible Online

YEREMIA 23 - Ngaju bible

YEREMIA 23

¹TUHAN, Hatallan Israel hamauh, “Calaka keton o kare pamimpin je mambinasa tuntang manaburan ungkup-Ku! Keton sapunae patut mahaga ungkup-Ku, tapi keton dia malaluse; keton manalua ewen kasaburan tuntang hadari. Toh Aku handak mahukum keton awi kapapan keton.

³Tapi tisan keton akan imumpong-Ku bara kare tanah eka ewen inganang-Ku. Ewen akan imbit-Ku haluli akan petak danum ewen tuntang turonan ewen akan sasar are.

⁴Aku akan mangkat pamimpin uka mahaga ewen. Ungkup-Ku akan dia mikeh tinai, jaton ije bara ewen akan nihau. Aku, TUHAN, jari hakotak.”

⁵ TUHAN hamauh, “Kareh sampai katikae Aku mangkat ije biti raja je adil bara turonan Dawid. Raja te akan marentah dengan kapintar, tuntang malalus taloh je adil tuntang bujur intu hapus petak danum.

⁶Amon ie marentah, oloh Yuda akan salamat, tuntang oloh Israel akan belom dengan kasanang. Raja te akan inyewut ‘TUHAN eka salamat ain itah.’

⁷Kareh sampai katikae oloh dia tinai sumpah tagal Aku, Hatalla je belom je mimbit oloh Israel balua bara Misir,

⁸malengkan tagal Aku, Hatalla je belom, je mimbit ungkup Israel balua bara tanah hila utara, tuntang bara kakare tanah beken eka ewen inaburan awi-Ku. Ewen akan melai intu petak danum ewen kabuat.”

⁹Jetoh petehku tahiu kare nabi: Ateiku hancor tuntang aku hagenjeh. TUHAN tuntang auhe je barasih mawi aku kilau oloh babusau je paham are mihop anggor.

¹⁰Lewun itah kontep dengan oloh je dia baketep dengan TUHAN. Ewen belom darhaka tuntang mahapan kuasan ewen sala. Awi sapan TUHAN, oru intu padang palus keang tuntang hapus petak danum kapehe atei.

¹¹TUHAN hamauh, “Nabi tuntang imam dia maku manumon auh-Ku. Aloh hong humang-Ku mahin aku mite ewen mawi gawi papa.

¹²Awi te, jalan ewen malisen tuntang kaput, sampai ewen tantarang tuntang balawo. Aku akan mawi ewen buah calaka, amon jari sampai katikae akan mahukum ewen. Aku, TUHAN, jari hakotak.

¹³Dosan kare nabi Samaria jari gitang-Ku. Ewen hakotak hapan aran Baal, tuntang mampalayang Israel, ungkup-Ku.

¹⁴ Tapi intu Yerusalem aku mite kare nabi mawi taloh je labih papa hindai. Ewen mananjaro tuntang habandong, hayak mandohop oloh je mawi gawi papa, sampai jaton ije oloh je handak hobah. Akang-Ku ewen uras papa kilau oloh Sodom tuntang Gomora.”

¹⁵TUHAN Je Jaton Tikas Kuasae hamauh, “Kareh inenga-Ku akan kare nabi intu Yerusalem taloh imbul bapait akan kinan tuntang pulih akan ihop. Awi ewen jari mawi buku kare oloh intu hapus petak danum dia mahormat Aku.”

¹⁶Akan oloh Yerusalem, TUHAN Je Jaton Tikas Kuasae hakotak, “Ela mahining kare auh nabi je harajur manenga kaharap je hayang. Ewen baya manyampai taloh tampayah ewen kabuat tuntang je dia peteh bara Aku.

¹⁷Akan kare oloh je dia maku mahining kare auh-Ku, ewen harajur hamauh, ‘Keton akan salamat.’ Tuntang akan genep oloh je badungil, ewen hamauh, ‘Ikau dia akan buah calaka.’ ”

¹⁸Aku hamauh, “Jaton ije biti bara kare nabi te mangatawan taloh je aton huang tirok TUHAN. Jaton ije bara ewen puji mahining tuntang harati kare rencanae; jaton kea je manyeneh tuntang malalus kare auh Ayue.

¹⁹Kasangit TUHAN kilau riwut barat je mamok tuntang mantakan kare oloh papa.

²⁰Kasangit Ayue dia akan terai helo bara uras je irencana Awie manjadi. Hong rahian andau ungkup TUHAN akan harati taloh te dengan tarang.”

²¹TUHAN hamauh, “Batokei toto kare nabi te, padahal ewen jaton Aku manyohoe. Hapan arang-Ku ewen manyampai barita, padahal jaton peteh je inenga-Ku akan ewen.

²²Paribasae ewen katawan taloh je aton hong tirok-Ku, batantu ewen jari manyampai akan ungkup-Ku uras taloh je insanang-Ku. Palus ungkup-Ku akan hobah bara kare dosa tuntang gawie papa.

²³Aku Hatalla je aton hong hete-hete, dia intu ije eka bewei.

²⁴Jaton ije oloh je tau manyahokan arepe bara tampayah matang-Ku, awi Aku aton intu hete-hete: intu sorga tuntang intu hunjun petak.

²⁵Uras taloh je insanan awi kare nabi te jari katawang-Ku. Hapan arang-Ku ewen mananjaro je peteh-Ku jari inarima ewen mahalau nupi.

²⁶Sampai hamparea kare nabi te handak mampalayang ungkup-Ku, hapan barita je ingarang ewen kabuat?

²⁷Ewen manirok dengan nupi je inyarita ewen te, ungkup-Ku tau kalapean dengang-Ku kilau tato hiang ewen mangalapean Aku tuntang manyembah Baal.

²⁸Nabi je nupi sapunae hamauh, ‘Jetoh baya nupi.’ Tapi nabi je mandino peteh bara Aku musti manyampai peteh te dengan katotoe. Gandom dia tau inyama dengan tampilai.

²⁹Auh-Ku kilau apui, tuntang kilau tukul je mamparotek batu!

³⁰Aku akan malawan kare nabi je manyampai petehe bara kare sobate, palus mansanan je jete peteh bara Aku.

³¹Aku kea malawan kare nabi je manyampai kare auhe kabuat, palus mansanan koae jete bara Aku.

³²Aku, TUHAN, akan malawan kare nabi te je manyampai kare nupie je kontep tanjaro. Ewen mampalayang ungkup-Ku dengan tanjaro tuntang kamburau bara ewen. Aku dia manyoho kare nabi te. Ewen dia baguna samasinde akan ungkup-Ku. Aku, TUHAN, jari hakotak.”

³³TUHAN hamauh, “Yeremia, amon ije bara ungkup-Ku, atawa ije nabi atawa imam misek dengam, ‘Narai peteh TUHAN?’ Ikau musti tombah, ‘Ikau jadi tanggongan[12] TUHAN; awi te ikau akan inganae.’

³⁴Amon ije biti bara ungkup-Ku atawa nabi atawa imam magon manahiu ‘tanggongan TUHAN’, maka ie tuntang keluargae akan ihukum awi-Ku.

³⁵Tapi, je kapatute genep biti sapunae misek dengan sobate tuntang dengan keluargae. ‘Narai panombah bara TUHAN?’ atawa ‘Narai je insanan TUHAN?’

³⁶Ewen dia tau tinai mahapan auh kotak ‘Tanggongan TUHAN’. Amon aton je magon mahapan auh kotak te, maka Aku akan mawi peteh-Ku toto-toto jadi tanggongan akae. Oloh je mansanan ‘tanggongan TUHAN’ baya mobah auh-Ku, Hatallan ewen, Hatalla je belom, TUHAN Je Jaton Tikas Kuasae.

³⁷Ewen baya tau mansanan akan kare nabi, ‘Narai panombah TUHAN akam? Narai je insanan TUHAN?’

³⁸Amon aton je dia manumon parentah-Ku, tuntang magon mahapan ‘tanggongan TUHAN’,

³⁹maka Aku akan manduan[13] ewen, tuntang manjakah ewen keja-kejau, aloh ewen atawa lewu je jari inenga-Ku akan ewen tuntang tato hiang ewen.

⁴⁰Aku akan mampahawen ewen tuntang mahina ewen sampai katatahie tuntang kajarian ewen dia akan ingalapean oloh.”