Read Ngaju YEREMIA 24 Bible Online

YEREMIA 24 - Ngaju bible

YEREMIA 24

¹ Sinde katika Yoyakhin anak Yoyakim raja Yuda hayak dengan kare pagawai je marentah intu Yuda, kare tukang ukir tuntang kare tukang je apik mamangun iunda awi Nebukadnesar raja Babel, tuntang iimbit kilau tawanan bara Yerusalem akan Babel, katika te TUHAN manenga ije paite akangku. Aku mite due karanjang basuang bua sikon aton intu hila baun Human TUHAN.

²Karanjang je solake basuang bua sikon je bahala-halap, kilau bua sikon hasil je pangkasolake. Tapi karanjang je kadue basuang bua sikon je mara-maram, sampai dia tau kinan.

³Palus TUHAN hamauh dengangku, “Yeremia, narai je gitam?” Aku tombah, “Bua sikon, TUHAN. Je bahala-halap paham bahalap, tuntang je mara-maram paham kamarame sampai dia tau kinan.”

⁴Palus TUHAN hamauh tinai,

⁵“Kare oloh je jari inalua awi-Ku iimbit akan Babel te itong-Ku kilau bua sikon je bahala-halap toh; awi te, Aku, TUHAN, Hatallan Israel akan mahaga ewen bua-buah.

⁶Aku akan mimbit ewen haluli akan lewu toh. Aku akan mamangun, dia manderep ewen. Aku akan mimbul dia manjawut ewen.

⁷Aku akan manenga akan ewen kahandak uka maharati je Aku toh TUHAN. Maka ewen jadi ungkup-Ku, tuntang Aku jadi Hatallan ewen, awi ewen akan haluli manempo Aku dengan katoton atei.

⁸Tapi Sedekia raja Yuda, hayak dengan kare pagawai je tokep dengae, tuntang tisan oloh Yerusalem je tetep melai hong tanah toh atawa bindah akan Misir, ewen uras akan iawi-Ku kilau bua sikon je mara-maram toh, je dia tau kinan. Aku, TUHAN, jari hakotak.

⁹Aku akan mancalaka ewen sampai kare bangsa hapus kalunen mikeh. Hong kueh bewei ewen inaburang-Ku, ewen akan ihalalea, akan indu tatawen oloh tuntang akan indu kotok oloh. Aran ewen akan indu sapan oloh hong kueh ewen melai.

¹⁰Aku akan mawi ewen hapan parang, lau, tuntang panyakit, sampai ewen uras matei tuntang jaton je batisa hong tanah toh je jari inenga-Ku akan ewen tuntang tato hiang ewen.”