Read Ngaju YEREMIA 25 Bible Online

YEREMIA 25 - Ngaju bible

YEREMIA 25

¹ Hong nyelo kaepat limbah Yoyakim anak Yosia jadi raja Yuda, aku manarima peteh bara TUHAN tahiu hapus bangsa Yuda. Metoh te nyelo je solake limbah Nebukadnesar manjadi raja Babel.

²Aku hakotak akan hapus bangsa Yuda tuntang oloh je melai intu Yerusalem,

³“Katahin due puluh telo nyelo, bara nyelo katelo walas metoh raja Yosia anak Amon marentah Yuda, sampai andau toh TUHAN jari hakotak dengang-Ku; dia puji aku sayup manyampai akan keton taloh je insanae. Tapi keton dia padulie.

⁴TUHAN kea harajur manyoho kare nabi, reware, tanggoh keton. Tapi keton dia maku mahining tuntang nantuani auh ewen.

⁵Ewen manyoho keton malihi cara pambelom keton je papa, tuntang kare gawin keton je badosa, mangat keton tau tetep melai intu lewu toh je jari inenga TUHAN akan keton tuntang akan tato hiang keton indu pusaka.

⁶Kare nabi te mangahana keton manyembah kare hampatong dewa tampan lengen keton kabuat, awi taloh te mawi TUHAN sangit. Amon keton manumon prentah TUHAN te, Ie dia mahukum keton.

⁷Tapi TUHAN kabuat hamauh je keton dia mahining auh Ayue. Keton mungkar kasangit Aie haream awi kare hampatong dewa ain keton te. Keton kabuat je mambuku hukuman mawi arep keton kabuat.

⁸Awi keton dia maku mahining kare auh Ayue, maka TUHAN Je Jaton Tikas Kuasae hamauh,

⁹‘Aku akan mantehau kakare bangsa bara utara, tuntang kea rewar-Ku Nebukadnesar raja Babel. Aku akan mirak ewen uka parang malawan Yuda tuntang kare oloh je melai intu hete hayak uras kare bangsa je melai hakalilinge. Bangsa Yuda dengan kare bangsa hakalilinge akan imbinasa awi-Ku tuntang inalua awi-Ku tunis benyem katatahie. Kare oloh je mitee akan tarewen tuntang mangkeme mangkarieng. Aku, TUHAN, jari hakotak.

¹⁰ Kare auh ewen je hanjak rantang tuntang karamin pesta kawin akan impaterai awi-Ku. Ewen jaton aton minyak akan sumbo, tuntang gandom ewen akan lepah.

¹¹ Hapus tanah toh akan inalua-Ku rusak tuntang benyem tunis. Kare bangsa hakalilinge akan manempo raja Babel uju puluh nyelo katahie.

¹²Limbah te Aku akan mahukum bangsa Babel tuntang rajae awi dosan ewen. Tanah Babel akan imparusak awi-Ku tuntang inalua-Ku rusak katatahie.

¹³Babel akan ihukum awi-Ku hapan uras calaka je jari irencana awi-Ku akan kare bangsa tuntang je jari insanang-Ku mahalau Yeremia — iete kakare calaka je inyurat hong buku toh.

¹⁴Kare gawin oloh Babel akan imbaleh awi-Ku. Ewen akan ihajipen awi kare raja hai tuntang are bangsa.’ ”

¹⁵TUHAN Hatallan Israel, hakotak dengang-Ku, “Duan sangkir anggor toh je jari inyuang-Ku hapan anggor kasangit-Ku. Imbit akan kakare bangsa, akan kueh Aku manyoho ikau. Nyoho ewen mihop anggor toh.

¹⁶Amon ewen mihope, ewen ruyong-rayang tuntang nyanyau awi parang je iawiku buah ewen.”

¹⁷Palus aku manarima sangkir anggor te bara lengen TUHAN, tuntang haguet akan kakare bangsa, eka tintungku tumon sohon TUHAN. Balalu aku mampihop ewen dengan anggor te.

¹⁸Impihopku Yerusalem tuntang uras oloh lewu hong Yuda, hayak kare raja tuntang kare oloh je bapangkat. Ewen palus jadi kilau padang je keang kamahau tuntang mangkarieng angat amon manampayahe. Sampai andau toh aran ewen manjadi indu sapa.

¹⁹Jetoh daptar aran kare oloh beken je musti mihop bara sangkir anggor TUHAN te: Raja Misir dengan kare pagawaie tuntang kare pajabat; uras oloh Misir tuntang oloh bangsa beken hong Misir; uras kare raja intu tanah Us; uras rajan kare lewu Pilistin intu Askelon, Gasa, Ekron; uras oloh je magon belom intu Asdod; uras oloh Edom, Moab, tuntang Amon; uras raja intu Tirus tuntang Sidon; uras raja intu saran Tasik Bentok; kare lewu Dedan, Tema, tuntang Bus; uras oloh je manetek balaue sampai pandak; uras raja Arab; uras rajan kare suku campuran je melai intu padang pasir; uras raja intu Simri, Elam tuntang Madai; uras raja intu utara, tokep kejau, mije-mije. Kakare bangsa hapus kalunen musti mihop anggor te. Tuntang oloh je pangkarahiae je musti mihop anggor te iete Raja Babel.

²⁷Palus TUHAN hakotak dengangku, “Sanan akan kare oloh te iete Aku TUHAN Je Jaton Tikas Kuasae, Hatallan Israel, manyoho ewen mihop sampai babusau tuntang muta-ngarea. Aku mawi ewen balongkang tuntang dia tau hingkat tinai awi parang je iawi-Ku buah ewen.

²⁸Tuntang amon ewen dia maku manarima sangkir te bara lengem uka mihop anggore, sanan je TUHAN Je Jaton Tikas Kuasae jari marentah taloh te.

²⁹Aku akan manampara mawi karusak te intu lewung-Ku kabuat. Ela sampai ewen manyangka je ewen dia akan buah hukum. Ewen batantu akan ihukum awi Aku akan mawi parang mantakan kare bangsa hapus kalunen. Aku, TUHAN, Je Jaton Tikas Kuasae jari hakotak.

³⁰Uras taloh je insanang-Ku akam, o Yeremia, musti inyampai awim. Sanan akan ewen, ‘Auh TUHAN halegar bara sorga; bara eka je barasih mangguroh malawan ungkup Ayue. Hapus oloh kalunen mahining auhe malahap sama kilau oloh je bagawi mahamis anggor intu ekae mahamis.

³¹Sampai akan tapakan petak palengkau auh Ayue; TUHAN mawi perkara dengan kare bangsa. Uras oloh akan ihakim tuntang je papa akan ihukum matei.’ ”

³²TUHAN Je Jaton Tikas Kuasae hakotak, “Bara kare saran petak riwut barat mangguroh. Calaka mawi kare bangsa mije-mije.”

³³Hong andau te kare hantun oloh je impatei awi TUHAN akan hakalampah intu hunjun petak. Ewen dia akan inatum, dia kea akan inggatang uka ingubur, malengkan inalua bewei intu petak sama kilau tuyok rotik.

³⁴O kare pamimpin, o kare sakatik ungkup TUHAN! Keleh manangis hai-hai auhm! Keleh manggaling arepm intu kawo, awi sampai katikae keton impatei, tuntang je liwus akan inaburan. Keton akan kilau balanai barega je manjato balalu pusit.[14]

³⁵Batantu keton dia akan liwus.

³⁶Keton bakotok tuntang manangis dengan kapehen atei, awi TUHAN hong kasangite jari mambinasa bangsa keton hayak mamparusak petak danum keton je sanang mangat te.

³⁸Sama kilau singa je balua bara liange, kalote kea TUHAN akan balua mahukum ungkup Ayue. Kakaras parang tuntang kasangit TUHAN jari mobah tanah toh jadi padang pasir.