Read Ngaju YEREMIA 26 Bible Online

YEREMIA 26 - Ngaju bible

YEREMIA 26

¹ Sana Yoyakim anak Yosia jadi raja Yuda,

²TUHAN hakotak dengangku, “Keleh haguet palus mendeng intu parantaran Humang-Ku tuntang sanan akan oloh Yuda je dumah sombayang intu hete. Nyampai akan ewen uras taloh je jari irentah-Ku uka ikau mansanae akan ewen. Ela mangurange aloh isut mahin ela.

³Ayau bangsa te maku mahining, palus tende mawi kapapa, maka Aku mambalang kahandak-Ku je akan mancalaka ewen tumon gawin ewen je papa.”

⁴TUHAN manyoho aku mansanan kalotoh akan ewen, “Aku, TUHAN, jari marentah uka keton manumon auh-Ku tuntang malalus kare atoran je inenga-Ku akan keton.

⁵Keton musti mahining taloh je insanan awi kare rewar aing-Ku, kare nabi je harajur inyoho-Ku manalih keton. Tapi keton dia maku mahining auh ewen.

⁶ Amon keton tetep marisang, huma sombayang toh akan iawi-Ku kilau Silo,[15] palus kare bangsa hong kalunen mahapan aran lewu Yerusalem toh kilau sapa.”

⁷Uras taloh je insanangku intu Human TUHAN te ihining awi kare imam, kare nabi tuntang rayat.

⁸Sana aku lepah mansanan kakare peteh TUHAN kilau je irentahe, ewen manyingkap aku sambil mangkariak, “Ikau musti matei!

⁹Bahanyi toto ikau hakotak hapan aran TUHAN je Human Ayue toh akan jadi kilau Silo, tuntang je lewu toh akan impalomos tuntang jadi eka je dia ielai tinai.” Palus aku ingarimbong oloh are.

¹⁰Sana kare pajabat intu Yuda mahining taloh je manjadi, ewen kaje-kajeng balua bara istana raja palus haguet akan Human TUHAN, tuntang mondok intu Lawang Taheta.

¹¹Kare imam tuntang kare nabi hamauh dengan kare pajabat te tuntang dengan rayat, “Oloh toh patut ihukum matei awi ie jari mampalua auh je malawan lewun itah toh. Keton kabuat jari mahininge.”

¹²Palus aku hamauh, “TUHAN je manyoho aku manyampai peteh je malawan Human TUHAN tuntang lewu toh sama kilau je ihining keton.

¹³Awi te obah cara pambelom keton tuntang kare gawin keton; numon auh TUHAN Hatallan keton, mangat Ie mambalang kahandak Aie akan mancalaka keton.

¹⁴Tahiu arepku, aku puna aton hong kuasan keton, tuntang keton tau malalus narai bewei manumon kahandak keton.

¹⁵Tapi ingat, amon keton mampatei aku, keton tuntang oloh lewu toh akan mananggong kasalan tagal gawi mampatei oloh je jaton kasalae. Basa, TUHAN bewei je jari manyoho aku uka manenga pampingat te akan keton.”

¹⁶Palus kare pajabat te tuntang rayat hamauh dengan kare imam tuntang kare nabi te, “Oloh toh hakotak hapan aran TUHAN, Hatallan itah; dia patut ie ihukum matei.”

¹⁷Limbah te pire-pire bara pamimpin bangsa dumah akan baun tuntang hamauh dengan kare oloh je hapumpong intu hete,

¹⁸ “Metoh Hiskia jadi raja Yuda, Nabi Mikha bara Moreset manyampai akan rayat auh toh bara TUHAN Je Jaton Tikas Kuasae, ‘Sion akan iluku kilau tana, Yerusalem akan jadi tuyok taloh je baderep, tuntang bukit Human TUHAN akan jadi parak kayu.’

¹⁹Tapi raja Hiskia tuntang oloh Yuda dia mampatei Mikha. Hiskia mikeh haream dengan TUHAN tuntang balaku asi. Maka TUHAN mambalang rencana akan mambinasa ewen. Tuntang toh, karenga dia itah mawi calaka je hai akan arep itah.”

²⁰Puji kea oloh beken hakotak malawan lewu tuntang bangsa toh hapan aran TUHAN, kilau je ilalusku. Oloh te bagare Uria anak Semaya bara Kiryat-Yearim.

²¹Metoh raja Yoyakim hayak kare perwira ayue tuntang kare pajabat mahining auh Uria, raja handak mampatei ie. Tapi Uria mahining taloh te palus mikeh tuntang hadari akan Misir.

²²Tapi raja Yoyakim manyoho Elnatan anak Akhbor hayak pire-pire oloh beken haguet akan Misir tuntang manduan Uria.

²³Palus ewen manduan ie haluli manalih Raja Yoyakim. Limbah te raja manyoho mampatei ie, tuntang hantue inganan intu kubur oloh are.

²⁴Tapi toh tagal pandohop Ahikam anak Sapan, aku Yeremia dia inyarah akan rayat uka impatei.