Read Ngaju YEREMIA 27 Bible Online

YEREMIA 27 - Ngaju bible

YEREMIA 27

¹ Dia tahi limbah Sedekia[16] anak Yosia jadi raja Yuda, TUHAN manyoho aku

²manampa kare tali bara upak meto tuntang ugar, tuntang mangkepae hong tekokku.

³Ie kea manyoho aku manyampai peteh Aie akan kare raja Edom, Moab, Amon, Tirus tuntang Sidon, hajamban kare sarohan ewen je jari dumah akan Yerusalem manalih Raja Sedekia.

⁴Aku musti mansanan akan ewen iete TUHAN Je Jaton Tikas Kuasae, Hatallan Israel hamauh,

⁵“Dengan kuasang-Ku je hai tuntang hapan kaabas-Ku Aku jari manjapa kalunen tuntang olon hayak kare meto, tuntang Aku tau manenga jete akan eweh bewei tumon kahandak-Ku.

⁶Aku toh je jari manyarah uras bangsa toh akan rewar-Ku Nebukadnesar, raja Babel. Sampai kare meto, jari inyarah-Ku akae uka inguasa awie.

⁷Uras bangsa akan manempo ie, anake, esoe, sampai dumah katikae karajaae kabuat impakalah awi kare bangsa tuntang raja je hai. Metoh te bangsa Babel akan manempo kare bangsa je abas tuntang kare raja je hai.

⁸Bangsa atawa karajaan je dia maku mamenda Raja Nebukadnesar akan ihukum awi-Ku mahapan parang, lau tuntang panyakit, sampai kajariae bangsa te mamenda ie.

⁹Ela mahining auh kare nabi atawa eweh bewei kea je mangahana keton mamenda raja Babel, aloh ewen mangaku jari manarima paite bara nupi, bara kare oloh gaib atawa dengan mahapan kare tabit.

¹⁰Ewen manipu keton sampai keton imbit kejau bara tanah keton. Aku akan maharak keton bara tanah keton tuntang keton akan binasa.

¹¹Tapi bangsa je handak mamenda tuntang maku manempo raja Babel akan inalua awi-Ku melai intu petak danume kabuat tuntang malan bakabon intu hete. Aku, TUHAN, jari hakotak.”

¹²Akan Sedekia raja Yuda, aku, Yeremia, manyampai taloh je sama. Aku hamauh, “Keleh manyarah ih dengan Raja Babel. Numon auhe tuntang bangsae, uka ikau salamat.

¹³TUHAN jari hamauh iete bangsa je dia mamenda raja Babel akan matei awi parang, lau, atawa panyakit. Mbuhen ikau tuntang rayat handak matei dengan cara kalote?

¹⁴Ela mahining auh kare nabi je mangahana ikau mamenda raja Babel, awi ewen manipu ikau.

¹⁵Ewen hamauh je ewen hakotak hapan aran TUHAN, tapi ewen mananjaro. TUHAN kabuat hamauh je Ie dia manyoho ewen. Awi te Ie akan manaburan tuntang mambinasa raja tuntang kare nabi je jari mananjaro raja.”

¹⁶Limbah te aku mansanan akan kare imam tuntang akan hapus rayat je TUHAN hamauh kalotoh, “Ela mahining kare auh nabi je dia tahi hindai kare ramo hong Humang-Ku akan imbit haluli bara Babel. Ewen mananjaro.

¹⁷Ela mahining auh ewen. Keleh manyarah ih dengan raja Babel uka keton salamat. Akan narai lewu toh musti binasa?

¹⁸Amon ewen puna toto nabi, tuntang jari manarima peteh bara Aku, batantu ewen metoh toh balaku dengang-Ku, TUHAN Je Jaton Tikas Kuasae, uka kare ramo je magon aton hong Humang-Ku tuntang intu istana raja Yerusalem dia iimbit akan Babel.

¹⁹Awi Aku, TUHAN Je Jaton Tikas Kuasae, Hatallan Israel, jari manukas iete uras ramo te akan iimbit akan Babel, tuntang akan tetep intu kanih sampai aku manantuanie tinai. Metoh te harue Aku mimbite haluli akan eka toh. Aku, TUHAN, jari hakotak.” Kare ramo je magon aton intu Human TUHAN te iete: Kare jihi, baskom tambaga, kare kareta tuntang pire-pire ramo beken ayun Human TUHAN. Kare ramo te dia tamput imbit akan Babel, metoh Yoyakhin anak Yoyakim raja Yuda hayak dengan kare oloh basewut marak oloh Yuda tuntang Yerusalem iimbit akan Babel awi Raja Nebukadnesar.