Read Ngaju YEREMIA 28 Bible Online

YEREMIA 28 - Ngaju bible

YEREMIA 28

¹ Nyelo te kea[17] hong bulan lime nyelo kaepat metoh Raja Sedekia, Hananya anak Asur, ije biti nabi bara lewu Gibeon, hakotak dengangku intu Human TUHAN. Intu taharep kare imam tuntang rayat ie hamauh dengangku,

²iete TUHAN Je Jaton Tikas Kuasae, Hatallan Israel hamauh kalotoh, “Kaabas raja Babel jari impakalah-Ku.

³Hong katika due nyelo toh aku akan malian kare ramo bara Humang-Ku, je jari iimbit akan Babel awi Raja Nebukadnesar.

⁴Aku kea akan mimbit haluli Yoyakhin anak Yoyakim raja Yuda hayak dengan sahapus rayat Yuda je jari iimbit akan Babel. Toto Aku akan mampakalah kaabas Babel. Aku, TUHAN, jari hakotak.”

⁵Palus intu baun kare imam tuntang kakare rayat je mendeng intu baun Human TUHAN te, aku hamauh dengan Hananya.

⁶“Bahalap! Keleh auh tujum ayum te manjadi, tuntang TUHAN toto-toto mimbit haluli bara Babel kare ramo ain Human TUHAN hayak dengan uras oloh je jadi tawanan akan kanih.

⁷Tapi ikau, Hananya, tuntang keton samandiai, o rayat, hining toh:

⁸Kare nabi je helo bara jaman itah jari manujum iete parang, calaka, tuntang panyakit akan buah are bangsa tuntang karajaan je aba-abas.

⁹Tapi nabi je manujum taloh sanang mangat, baya tau ingaku kilau nabi je toto-toto inyoho awi TUHAN, amon kare tujum ayue te manjadi.”

¹⁰Palus Hananya marunap ugar bara tekokku tuntang mameleke.

¹¹Intu baun sahapus rayat je aton intu hete ie hamauh, “TUHAN hamauh iete, kilau toh ampie Ie akan mamelek ugar je ingkepan Raja Nebukadnesar intu tekok kakare bangsa; TUHAN akan malalus taloh te hong katika due nyelo toh.” Limbah te aku palus haguet.

¹²Dia pire katahie limbah kajadian te, TUHAN manyoho aku

¹³manalih Hananya uka hakotak dengae kalotoh, “TUHAN hamauh, ikau tau ih mamelek ugar, tapi ie akan manggantie dengan ugar bara sanaman.

¹⁴TUHAN Je Jaton Tikas Kuasae, Hatallan Israel, hamauh, Ie akan mangkepan ugar sanaman hong tekok uras bangsa toh. Ewen akan manempo Nebukadnesar, raja Babel. TUHAN kea hamauh, aloh meto basiak mahin inyarah akan Nebukadnesar.”

¹⁵Taloh handiai te uras inyampaiku akan Hananya, palus aku hamauh tinai, “Hining, o Hananya! TUHAN dia manyoho ikau; ikau jari mawi bangsa toh percaya dengan auh tanjaro.

¹⁶Awi te TUHAN kabuat hamauh je ikau akan imbinasa Awie bara hunjun petak toh. Nyelo toh kea ikau akan matei, awi ikau jari mayoho bangsa toh malawan TUHAN.”

¹⁷Maka hong nyelo te kea hong bulan kauju, Hananya matei.