Read Ngaju YEREMIA 29 Bible Online

YEREMIA 29 - Ngaju bible

YEREMIA 29

¹ Aku mayurat akan kare imam, kare nabi, kare pamimpin bangsa je magon belom, tuntang akan uras oloh beken je jari iimbit awi Nebukadnesar bara Yerusalem akan Babel.

²Surat te inyuratku limbah Raja Yoyakhin, indue, kare pagawai istana, kare pajabat intu Yuda tuntang Yerusalem, kare tukang ukir tuntang oloh je apik mamangun iimbit akan eka tawanan.

³Aku mangirim surat te hajamban Elsa anak Sapan, tuntang Gemarya anak Hilkia je inyoho Sedekia raja Yuda manalih Nebukadnesar Raja Babel. Surat te kolotoh auhe,

⁴“Kalotoh auh TUHAN Je Jaton Tikas Kuasae, Hatallan Israel akan kakare oloh je jari iawie jadi tawanan bara Yerusalem akan Babel:

⁵‘Keleh manetep intu hikau. Pendeng kare human keton. Keleh keton malan bakabon tuntang duan hasile.

⁶Keleh kawin mangat keton mandino anak, tuntang keleh anak keton kea kawin mangat ewen kea mandino anak. Jumlah keton musti mandahang tuntang dia tau sasar isut.

⁷Keleh bagawi akan kasanang kamangat kare lewu eka keton iawi-Ku jadi tawanan. Keleh balakudoa manintu Aku akan kare lewu te. Awi amon kare lewu te jaton bara katapas, keton kea omba sanang.

⁸TUHAN Je Jaton Tikas Kuasae, Hatallan Israel, mampingat keton uka ela manalua arep keton inipu awi kare nabi je melai hong marak keton atawa awi eweh bewei je hamauh iete ewen tau manujum tahiu katika je naharep. Ela manyeneh kare nupin ewen.

⁹Ewen mahapan arang-Ku handak manyarita akan keton kare taloh je dia toto. Aku dia manyoho ewen. Aku, TUHAN, jari hakotak.’

¹⁰ TUHAN hamauh, ‘Amon jari genep katika uju puluh nyelo hong Babel, aku akan manyondau keton tinai; Aku akan malalus janjing-Ku akan mimbit keton haluli akan eka toh.

¹¹En dia Aku kabuat je katawan kare rencana ayung-Ku akan keton? Kare rencana te dia akan mawi calaka akan keton tapi akan kasanang keton tuntang manenga akan keton wayah je naharep je kontep kaharap.

¹²Palus keton akan balaku dohop dengang-Ku. Keton akan dumah balakudoa dengang-Ku, tuntang aku akan tombah lakudoan keton.

¹³ Keton akan manggau Aku tuntang sondau Aku, awi keton manggau dengan salepah atei.

¹⁴Toto, keton akan sondau Aku. Keton akan imumpong-Ku bara bentok kakare bangsa tuntang bara genep lewu eka keton inaburan jadi tawanan. Keton akan imbit-Ku haluli akan lewu asal keton toh hayak mahalalian pambelom keton. Aku, TUHAN, jari hakotak.’

¹⁵Tumon tirok keton TUHAN jari manenga akan keton kare nabi intu Babel.

¹⁶Hining taloh je insanan TUHAN tahiu raja je marentah metoh toh, iete kare raja turonan Dawid, tuntang tahiu oloh lewu toh, iete kare keluarga je dia iimbit akan eka tawanan hayak keton.

¹⁷TUHAN Je Jaton Tikas Kuasae hamauh, ‘Aku akan mampalembut parang, lau tuntang panyakit akan ewen. Ewen akan iawi-Ku kilau kare bua sikon je lalau maram sampai dia tau kinan.

¹⁸Ewen akan inggoang-Ku hapan parang, lau tuntang panyakit sampai uras bangsa hapus kalunen akan mangkarieng tuntang mikeh mite taloh je manjadi buah ewen. Ewen akan ihalalea, tuntang aran ewen indu sapan kare bangsa.

¹⁹Uras taloh te manjadi akan ewen, awi ewen dia manumon peteh-Ku je harajur insanang-Ku akan ewen hajamban kare nabi kare rewar-Ku. Ewen dia maku manyeneh kare peteh-Ku te.

²⁰Tuntang uras keton je jari iawi-Ku jadi tawanan akan Babel, hining taloh je insanang-Ku akan keton.’

²¹TUHAN Je Jaton Tikas Kuasae, Hatallan Israel, jari hakotak tahiu Ahab anak Kolaya, tuntang tahiu Sedekia anak Maaseya je mahapan aran TUHAN akan manyampai akan keton kare taloh je dia toto. TUHAN hamauh iete ie akan manyarah ewen akan kuasan Nebukadnesar raja Babel, je akan mampatei ewen intu taharep mata baun keton.

²²Maka amon kare oloh je jari iimbit bara Yerusalem akan Babel handak manyapa oloh, ewen akan hamauh, ‘Keleh TUHAN mawi ikau sama kilau Sedekia tuntang Ahab, je jari inusul belo-belom awi raja Babel.’

²³Kalote kajarian ewen awi jari malalus kare dosa hai intu Israel: ewen habandong tuntang mahapan aran TUHAN akan manyarita kare taloh je dia toto. Jete hakalawan dengan kahandak TUHAN. Ie katawan taloh je iawi ewen, tuntang Ie kabuat jadi saksi malawan ewen.[18] TUHAN jari hakotak.”

²⁴TUHAN Je Jaton Tikas Kuasae Hatallan Israel manenga peteh akangku je akan inyampai akan Semaya, oloh Nehelam, awi Semaya jari mangirim surat hapan arae kabuat akan hapus oloh Yerusalem, akan Imam Sepanya anak Maaseya, tuntang akan uras imam je beken. Huang surat te Semaya manyurat kalotoh akan Sepanya:

²⁶“TUHAN jari mangkat ikau jadi imam mangganti Yoyada, tuntang metoh toh ikau bewei je pangkagantong pangkate intu Human TUHAN. Gawin ayum iete marentah uka genep oloh gila, je mangaku arepe nabi, imasong hapan rantai sanaman intu uyate.

²⁷Tapi mbuhen ikau dia mawi Yeremia oloh Anatot te je jari bagawi kilau nabi marak bangsa itah?

²⁸Oloh te musti iangop nyamae, awi ie hakotak dengan kare oloh itah hong Babel je mansanan tahiu ewen je magon tahi melai intu kanih. Awi te, koae, ewen musti mampendeng huma hayak malan bakabon tuntang mangkeme hasile.”

²⁹Surat te imbasa Imam Sedekia akangku.

³⁰Awi te TUHAN manyoho aku

³¹mangirim kabar tahiu Semaya akan uras oloh Israel je tawanan hong Babel. Toh auh kabar te, “Semaya jari hakotak dengam kila-kilau ie nabi; padahal Aku, TUHAN dia manyoho ie. Awi ie jari mawi keton percaya auh tanjaro,

³²tuntang awi ie jari manyoho keton malawan Aku, maka Aku akan mahukum ie tuntang turonae. Jaton ije biti bara ewen je akan melai marak keton akan manampayah kare taloh je bahalap je akan ilalusku akan hapus ungkup-Ku. Aku, TUHAN jari hakotak.”