Read Ngaju YEREMIA 3 Bible Online

YEREMIA 3 - Ngaju bible

YEREMIA 3

¹TUHAN hamauh, “Amon ije biti oloh bawi inolang banae, palus oloh bawi te jadi sawan oloh beken, awan banae dia tau manduan ie haluli kilau sawae, awi taloh te akan marusak tanah toh. Ikau, Israel jari are toto oloh eka sintam, dia badai ikau tau handak haluli dengang-Ku!

²Coba ite akan ngambo, akan kare tantan bukit! Kueh eka je dia puji inalihm ekam habandong? Kilau oloh Arab intu padang pasir, tumon te ikau mondok intu saran jalan mentai oloh je handak hasinta dengam. Ikau mamapa tanah toh dengan bandongm tuntang kapapam.

³Awi te danum bara langit tangkeng, tuntang ujan intu wayah kambang burai dia kea tau dumah. Ikau kilau lontei, tuntang dia tau mahamen.

⁴Intu wayah kasusahm te ikau hamauh dengang-Ku je Aku toh bapam, Aku sinta ikau, bara kakorikm.

⁵Ikau hamauh kea je Aku dia akan raju-rajur sangit dengam. Jete je insanam, o Israel, tapi hemben te kea ikau mawi kapapa je tau ikau mawie.”

⁶ Intu wayah raja Yosia marentah, TUHAN hamauh kalotoh dengang-Ku, “En jari gitam taloh je ilalus Israel, oloh bawi je dia baketep te? Ie malihi Aku tuntang habandong intu genep bukit je gantong tuntang intu penda genep batang kayu je labat dawee.

⁷Tirok-Ku, limbah ie mawi uras taloh te, ie akan haluli dengang-Ku. Tapi ie dia haluli, tapi haguet habandong haream. Jete bukue Aku manolang tuntang maharak ie. Yuda, paharin Israel, je dia baketep te mite urase taloh te, tapi ie dia mikeh. Ie omba haream jadi lontei,

⁹tuntang dia mahamen samasinde. Ie habandong awi manyembah batu tuntang kayu, mawi tanah toh papa.

¹⁰Limbah mawi uras taloh te, Yuda je dia baketep te haluli dengang-Ku, tapi ie pura-pura bewei, awi dia dengan katoton ateie. Aku, TUHAN, jari hakotak.”

¹¹Limbah te TUHAN mansanan akangku je oloh Israel jari manalikut Ie, tapi Israel ampie labih bahalap bara Yuda je dia baketep te.

¹²TUHAN manyoho aku haguet mansanan taloh te akan Israel: “O Israel je dia baketep, haluli dengang-Ku! Aku kontep asi tuntang dia akan katatahie sangit dengam.

¹³Ngaku ih je ikau sala tuntang jari malapas arepm bara Aku malawan TUHAN, Hatallam. Ngaku je intu penda genep batang kayu je labat dawee ikau jari manenga sintam akan kare hatalla bangsa beken, tuntang dia manumon kare parentah-Ku. Aku TUHAN jari hakotak.”

¹⁴TUHAN hamauh, “O ungkup je dia baketep, keleh haluli dengang-Ku! Keton puna ayung-Ku. Aku akan manduan keton, ije biti bara genep lewu, tuntang due biti bara genep jalahan, tuntang mimbit keton haluli akan bukit Sion.

¹⁵Aku handak manenga akan keton kare pamimpin je manempo Aku. Ewen akan mangagalan keton hapan pangatawan tahiu kapintar tuntang kontep kaharati.

¹⁶Palus amon keton jari mandahang karee intu tanah toh, oloh dia akan hamauh tinai tahiu Patin Janji ayung-Ku. Ewen dia akan maniroke atawa mingate tinai; ewen dia mamerlu jete haream, atawa manampa Patin Janji ije beken.

¹⁷Metoh te lewu Yerusalem akan inyewut ‘Padadusan TUHAN’, tuntang kare bangsa akan hapumpong intu lewu te uka manyembah Aku. Ewen dia tinai manumon kahandak atei ewen je darhaka tuntang papa te.

¹⁸Israel akan hinje dengan Yuda, tuntang haya-hayak dumah bara lewu ekae tawanan intu hila utara. Ewen akan haluli akan tanah je jari inenga-Ku kilau tanah pusaka akan tato hiang keton.”

¹⁹TUHAN hamauh, “Israel, Aku handak manarima ikau kilau anak-Ku, tuntang manenga akam tanah je mampasanang, tanah je paling bahalap intu hapus kalunen. Aku handak ikau manyewut Aku bapa, tuntang dia hadari tinai bara Aku.

²⁰Tapi kilau sawan oloh je dia baketep, ikau kea dia baketep dengang-Ku. Aku, TUHAN jari hakotak.”

²¹Intu hunjun kare tantan bukit tarahining auh ridu; jete auh ungkup Israel je manangis tuntang balaku-laku, awi ewen jari badosa, tuntang mangalapean TUHAN, Hatallan ewen.

²²O keton je uras malihi TUHAN, keleh haluli! Ie akan mampakeleh keton tuntang mawi keton baketep. Keton hamauh, “Yoh, toh ikei manalih TUHAN, awi ie Hatallan ikei.

²³Hayang ih ikei rami-rami, manyembah hampatong dewa intu hunjun kare tantan bukit! Pandohop akan Israel baya dumah bara TUHAN, Hatallan ikei.

²⁴Manyembah Baal, hampatong dewa je mampahawen te jari mawi ikei nihau kare anak ikei tuntang sapi dengan tabiri, iete hapus taloh je ihasil awi tato hiang ikei bara horan.

²⁵Jadi, nauhe ikei impahawen, tuntang nauhe ikei ihina. Awi, ikei tuntang tato hiang ikei jari badosa dengan TUHAN, Hatallan ikei, tuntang dia puji manumon kare parentah Aie.”