Read Ngaju YEREMIA 30 Bible Online

YEREMIA 30 - Ngaju bible

YEREMIA 30

¹TUHAN, Hatallan Israel,

²hamauh dengangku, “Nyurat hong ije buku uras taloh je jari insanang-Ku akam.

³Awi akan dumah katikae Aku mahalalian pabelom ungkup-Ku Israel tuntang Yuda. Aku akan mimbit ewen haluli akan tanah je jari inenga-Ku akan tato hiang ewen. Tanah te akan jadi ayun ewen haluli. Aku, TUHAN, jari hakotak.”

⁴TUHAN hamauh dengan ungkup Israel tuntang Yuda,

⁵“Aku jari mahining kariak tagal katarewen, kariak oloh mikeh, tuntang jaton mangkeme kasanang kamangat.

⁶Coba nirok tuntang naliti! En tau oloh hatue manak anak awau? Amon kalote, mbuhen maka aku mite genep oloh hatue kalas mues tuntang manahan kanaie hapan lengee kilau oloh bawi je handak manak?

⁷Andau je bakaike-ikeh jari dumah, andau je jaton eka tampengae. Akan ungkup-Ku, jete wayah kajake je mampanihau kaharap; tapi Aku akan manyalamat ewen.”

⁸TUHAN Je Jaton Tikas Kuasae hamauh tinai dengan ungkup Ayue, “Amon andau te dumah, Aku akan mamelek ugar je ingkepan intu tekokm, tuntang akan mengkak pasongm. Ikau dia akan jadi jipen oloh bangsa beken tinai.

⁹Ikau akan manempo Aku, TUHAN, Hatallam tuntang akan ije biti turonan Dawid je akan iangkat awi-Ku jadi raja.

¹⁰ Ungkup-Ku Israel, ela mikeh! Rewar-Ku Yakob, ela gaer! Ikau tuntang turonam akan inyalamat awi-Ku, bara kare tanah je kejau ekam jadi tawanan. Ikau akan buli tuntang melai intu petak danum ayum tuntang jaton je manderoh ikau. Ikau akan belom sanang mangat: jaton taloh je ingikeh awim.

¹¹Aku akan dumah tuntang ikau akan inyalamat awi-Ku. Kare bangsa ekam inaburan urase akan imbinasa awi-Ku, tapi ikau dia Aku mawie kalote. Je sapunae ikau dia akan liwus bara hukuman, tapi hukumang-Ku akam adil tumon tukase. Aku, TUHAN, jari hakotak.”

¹²TUHAN hakotak dengan ungkup Ayue: “Panyakitm paham toto, tuntang himangm jaton tatambae.

¹³Jaton oloh je handak mampakeleh ikau, jaton kea tatamba akan kare baha ayum, jaton kaharap akam tau keleh.

¹⁴Uras oloh je eka sintam jari malihi ikau; ewen dia handak tinai manirok bitim. Kilau musoh Aku jari manyarang tuntang mahukum ikau toto-toto, awi are dosam tuntang hai kasalam.

¹⁵Ela hindai bakotok tagal kare himangm, awi kaharap uka keleh jaton akam. Ikau ihukum kalotoh awi are dosam tuntang kasalam.

¹⁶Tapi toh uras oloh je manelen ikau akan inelen, tuntang uras musohm akan iimbit akan eka tawanan. Aku akan mahenyek oloh je mahenyek ikau; Aku akan marampok oloh je marampok ikau.

¹⁷Aloh musohm hamauh, ‘Sion jari inganan, tuntang jaton je padulie,’ tapi ikau akan imparigas awi-Ku haluli tuntang kare himangm akan inatamba awi-Ku.”

¹⁸TUHAN hamauh tinai: “Ikau ungkup-Ku akan iasi awi-Ku tuntang pambelom ayum ihalalian awi-Ku intu petak danum ayum kabuat. Yerusalem akan imangun haluli tinai, tuntang istanae akan ingambuah.

¹⁹Kakare oloh je melai hete akan manara Aku hapan nyanyi, tuntang basasurak dengan kahanjak. Aku mawi ewen uka ihormat tuntang dia ihina tinai, tuntang jumlah ewen akan madahang harajur.

²⁰Bangsa aim akan impatatau awi-Ku kilau bihin, tuntang mendeng tinai kilau ungkup ayung-Ku. Uras oloh je mahenyeke akan ihukum-Ku kea.

²¹Raja je marentah ikau iete bara bangsa ayum kabuat. Dengan bebas ie akan manokep Aku, amon ie intehau-Ku manaharep Aku. Awi eweh je bahanyi manaharep Aku hapan kahandak ayue kabuat? Keton akan manjadi ungkup ayung-Ku tuntang Aku manjadi Hatallan keton. Aku, TUHAN je mansanan taloh te.”

²³Kasangit TUHAN kilau riwut barat, kilau andau basaloh balewut je mawi kare oloh papa, tuntang jaton akan terai helo bara uras rencana Ayue te tulus. Hong rahian andau ungkup Ayue akan harati taloh te.