Read Ngaju YEREMIA 31 Bible Online

YEREMIA 31 - Ngaju bible

YEREMIA 31

¹TUHAN hamauh, “Kareh dumah katikae Aku jadi Hatallan uras oloh Israel, tuntang ewen jadi ungkup ayung-Ku.

²Intu padang pasir Aku mamparahan asing-Ku akan ewen je jari liwus bara pampatei. Katika ungkup Israel manggau kasanang,

³bara kejau Aku mamparahan arep-Ku akan ewen. O ungkup Israel, bara bihin Aku harajur sinta ikau, tuntang sampai katatahie Aku tetep mamparahan je Aku harajur sinta ikau.

⁴Bangsa ayum akan iawi-Ku jadi bangsa je hai kilau bihin. Sinde tinai ikau akan manduan tarabang, tuntang manari dengan kahanjak.

⁵Ikau akan mawi kabon anggor intu kare bukit Samaria, tuntang je mimbul akan mamutik buae tinai.

⁶Toto, akan dumah katikae kare oloh je manjaga lewu mantehau intu kare bukit Epraim, ‘Ayo itah mandai akan Sion, manalih TUHAN, Hatallan itah.’ ”

⁷TUHAN hamauh, “Keleh manyanyi hanja-hanjak akan Israel, ungkup-Ku — bangsa je jadi pamimpin kare bangsa. Barita, tara, sanan, ‘TUHAN jari manyalamat je batisa bara ungkup Ayue Israel.’

⁸Aku akan mimbit ewen haluli bara utara; tuntang mamumpong ewen bara hapus saran petak. Oloh babute tuntang oloh batimpang akan omba hayak ewen, kalote kea oloh bawi je batihi tuntang oloh bawi je harue manak. Ewen uras akan dumah haluli hayak paham are bitie akan tanah toh.

⁹Ewen dumah sambil manangis, Aku mampong tuntang mangagalan ewen. Aku mimbit ewen mahalau kare eka je are danume, mahalau jalan rataeka ewen dia tau tantarang. Akan Israel Aku toh kilau bapa; Epraim anak-Ku je tambakase.”

¹⁰TUHAN hamauh, “Hining, o kare bangsa! Nyampai peteh-Ku akan dipah tasik: Ungkup-Ku je jari inaburang-Ku akan imumpong-Ku tuntang ihaga-Ku kilau sakatik mahaga tabirie.

¹¹Ungkup Israel jari inyalamat awi-Ku tuntang iliwus bara kare lengen oloh je abas.

¹²Ewen akan dumah manalih bukit Sion hayak ampin baue ngumi-ngumi, sambil manyanyi dengan kahanjak awi uras kare panenga bara Aku akan ewen, iete gandom, undus, anggor, sapi tuntang tabiri. Ewen akan sama kilau kabon je sukup danume, tuntang jaton katapas narai bewei.

¹³Metoh te kare oloh bawi akan manari dengan kahanjake. Tuntang oloh hatue bakas tabela hanjak rantang, awi Aku mampong ewen. Tatum ewen iobah-Ku jadi kahanjak, kapehen atei iobah-Ku jadi kasanang.

¹⁴Kare imam akan imeda awi-Ku dengan panginan je malabien; tuntang uras taloh je imerlu awi ungkup-Ku akan inenga-Ku. Aku, TUHAN, je mansanae.”

¹⁵ TUHAN hamauh, “Intu Rama tarahining auh tangis, tuntang tarahing je awi kapehen atei. Rahel manatum kare anake, ie dia maku iampong awi ewen jari jaton.

¹⁶Paterai tangism tuntang puas danum matam! Dia akan hayang kahekam akan kare anakm. Akam akan aton upah, kare anakm buli bara petak danum ain musoh.

¹⁷Aton kaharap akam hong wayah je naharep; kare anakm akan haluli akan lewu humae.

¹⁸Hining-Ku ungkup Israel hamauh dengan kapehen atei, ‘O TUHAN, ikei kilau meto je hindai impalinek; tapi imatohm ikei uka manumon, tuntang toh ikei jari tata puka haluli manempo Ikau. Awi te, imbit ikei haluli, o TUHAN, Hatallan ikei.

¹⁹Ikau jari inalikut ikei, tagal gawi te ikei manyasal. Limbah Ikau mahukum ikei, balalu ikei sontop awi kapehen atei. Ikei mahamen tuntang ihina awi jari badosa metoh katabela.’

²⁰Israel, ikau anak je eka kasayang-Ku, anak je inyinta, eka huang-Ku. Sining katika Aku maancam ikau Aku harajur mingat ikau dengan kataharu. Ikau akan iawi-Ku hapan kontep asi.

²¹Keleh mangkepan kare tanda intu kare jalan; gau jalan je ihoroim bihin. O Israel, keleh buli! Keleh buli akan kare lewum je solake.

²²Sampai hamparea ikau harajur bembang, o bangsa je dia baketep dengang-Ku? Aku jari manjapa taloh je taheta hong kalunen, taloh je heran — sama kilau kaheran amon oloh bawi mangalindong oloh hatue.”

²³TUHAN Je Jaton Tikas Kuasae, Hatallan Israel hamauh, “Amon ungkup-Ku jari iawi-Ku tamam kilau helo, palus intu tanah Yuda tuntang kare kamponge aton tinai oloh hamauh, ‘Keleh TUHAN mamberkat bukit barasih[19] intu Yerusalem, eka melai tantai Akae.’

²⁴Oloh akan melai intu Yuda tuntang kare kamponge. Intu hete akan aton tana tuntang oloh mambelom sapi tuntang tabirie.

²⁵Ewen je heka akan impaabas-Ku, tuntang je balemo awi lau akan imbesoh-Ku.

²⁶Metoh te oloh akan hamauh, ‘Limbah batiroh mangat, aku mangkeme barigas.’

²⁷Aku, TUHAN, hamauh, iete akan dumah katikae tanah Israel tuntang Yuda akan ingontep dengan olon tuntang meto.

²⁸Kilau bihin Aku jari manjaga ewen uka limbah te Aku manjawut, manderep tuntang mamparusak ewen, tumon te kea Aku akan manjaga ewen mangat Aku mandehen tuntang mamangun ewen haluli.

²⁹ Metoh te oloh dia hindai hamauh, ‘Oloh bakas kuman bua je masem, kasingan anake je manyilo,’

³⁰malengkan eweh kuman bua je masem, ie kabuat je akan manyilo kasingae. Genep bitin oloh akan matei awi kasalae kabuat.”

³¹ TUHAN hamauh, “Kareh dumah katikae Aku mawi janji taheta dengan ungkup Israel tuntang Yuda.

³²Tapi janji te dia kilau janji je iawi-Ku dengan tato hiang ewen metoh Aku mangagalan ewen balua bara Misir. Aloh Aku kilau banan ewen, tapi ewen mungkir janjing-Ku dengan ewen.

³³ Jetoh janji taheta je akan iawi-Ku dengan ungkup Israel: Kare parentah-Ku akan ingkes-Ku intu huang ewen, tuntang inyurat-Ku hong atei ewen. Aku akan jadi Hatallan ewen, tuntang ewen akan jadi ungkup-Ku.

³⁴ Dia usah tinai aloh ije biti bara ewen majar sama arepe akan mangasene TUHAN. Awi uras ewen hai korik, akan kasene Aku. Kare kasalan ewen akan ingalapeang-Ku, kare dosan ewen akan iampun awi-Ku. Aku, TUHAN, jari hakotak.”

³⁵Matanandau inyadia TUHAN akan mampalawa amon handau, bulan tuntang kare bintang akan mampalawa amon hamalem. Tasik ingurahe sampai hagalombang, TUHAN Je Jaton Tikas Kuasae, jete Arae.

³⁶TUHAN hajanji, “Katahin atoran langit tuntang petak dia hobah, Israel kea akan tetep aton kilau bangsa.

³⁷Jaka sinde katika langit tau iukur, tuntang galang petak tau ingatawan, metoh te Israel akan ingabele awi-Ku awi kare gawin ewen je papa. Aku, TUHAN, jari hakotak.”

³⁸TUHAN hamauh, “Kareh dumah katikae hapus Yerusalem akan imangun haluli kilau lewung-Ku, bara Candi Hananeel sampai akan Lawang Puting.

³⁹Bara hete garis helat akan manintu Bukit Gareb, palus mambelok akan Goa.

⁴⁰Hapus janah te, je ihapan akan kubur tuntang eka manganan rotik, tuntang uras tana intu saran Sungei Kidron sampai Lawang Kuda akan hila timor, akan iawi-Ku tantai akang-Ku. Lewu Yerusalem dia akan inderep-Ku tinai atawa impahancor.”