Read Ngaju YEREMIA 33 Bible Online

YEREMIA 33 - Ngaju bible

YEREMIA 33

¹Metoh aku magon inahan hong parantaran, aku mandino peteh beken bara TUHAN

²je manjapa kalunen tuntang manampae hayak mingkese intu ekae. Ie hamauh,

³“Tehau Aku, maka Aku akan tombah; akan insanang-Ku akam kare taloh je bahalap tuntang heran je hindai ikau katawae.

⁴Istana raja Yuda tuntang kare huma intu Yerusalem jari induroh hapa mandehen eka bakalindong manahan kapong bara musoh je handak manyarang. Tapi Aku, TUHAN, Hatallan Israel, hamauh iete,

⁵jaton gunae malawan oloh Babel, awi jete baya mawi lewu toh kontep hantun oloh je impatei-Ku hong kasangit-Ku tuntang kalait-Ku dengan ewen. Aku dia handak mite lewu toh tinai, awi kare oloh lewu toh jari mawi taloh papa.

⁶Tapi rahian andau Aku akan mahalalian ampin lewu toh tuntang kare oloh lewu toh; ewen akan abas tinai. Aku kareh manenga akan ewen kasanang tuntang kamangat je hakutoh.

⁷Aku handak mampahalap Yuda tuntang Israel kilau helo tuntang ewen akan hingkat tinai jadi ungkup ayung-Ku.

⁸Aku akan mamparasih ewen bara kare dosa je jari ilalus ewen dengang-Ku; kare dosa tuntang kadarhakan ewen akan iampun awi-Ku.

⁹Yerusalem akan jadi kahanjak tuntang kakilak-Ku. Uras bangsa hong kalunen akan mikeh tuntang hagenjeh, hayak mahormat Aku, amon mahining tahiu uras kahalap je ilalus akan Yerusalem, tuntang tahiu kasanang je inenga-Ku akan lewu te.”

¹⁰TUHAN hamauh, “Oloh hamauh tahiu eka toh je kilau padang pasir, jaton olon atawa meto je melai hete. Auh te puna toto, awi kare lewun Yuda tuntang kare jalan intu Yerusalem jari buang urase; jaton olon atawa meto je melai intu hete.

¹¹ Tapi hong kare eka te akan tarahining tinai auh kahanjak tuntang karami hayak auh pesta kawin. Akan tarahining kea auh nyanyin oloh je mimbit parapah tarimakasih akan humang-Ku. Ewen akan hamauh, ‘Tarimakasih akan TUHAN Je Jaton Tikas Kuasae, awi Ie bahalap tuntang sintan Aie palus katatahie.’ Lewu toh akan impasanang awi-Ku sama kilau solake bihin. Aku, TUHAN, jari hakotak.”

¹²TUHAN Je Jaton Tikas Kuasae hamauh, “Petak danum tuntang kare lewue je sama kilau padang pasir toh dia ielai awi olon atawa meto. Tapi aloh kalote, hong rahian andau akan aton tinai kare padang oru eka oloh manyakatik kare tabirie.

¹³Intu kare lewu hong petak je habukit, pain bukit, daerah Yuda salatan, tuntang intu tanah Benyamin hayak hong kare kampong hakaliling tokep Yerusalem, intu kare lewun Yuda, kare sakatik akan mise tinai jumlah kare tabirin ewen. Aku, TUHAN, jari hakotak.”

¹⁴ TUHAN hamauh, “Kareh sampai katikae Aku malalus janji je jari iawi-Ku dengan Isarel tuntang Yuda.

¹⁵Intu wayah te ije biti oloh je adil bara turonan Dawid akan iintih awi-Ku jadi raja. Raja te akan malalus taloh je adil tuntang bujur intu hapus tanah.

¹⁶Oloh Yuda tuntang oloh Yerusalem akan inyalamat tuntang belom sanang mangat. Lewu Yerusalem akan inyewut ‘TUHAN je manyalamat itah’.

¹⁷ Aku, TUHAN, hajanji je harajur akan aton ije biti bara turonan Dawid je manjadi raja Israel;

¹⁸ harajur akan aton kare imam bara suku Lewi je bagawi akang-Ku tuntang maluput parapah meto, gandom tuntang parapah je ingehu.”

¹⁹TUHAN hamauh dengangku,

²⁰“Aku jari mempendeng janji dengan andau tuntang alem, uka andau tuntang alem harajur dumah tumon katikae; janji te dia tau inganan.

²¹Kalote kea Aku jari mampendeng janji dengan rewar-Ku Dawid, je bara turonae akan harajur aton ije biti oloh je jadi raja; tuntang Aku jari mampendeng janji dengan kare imam turonan Lewi tahiu ewen je harajur akan bagawi akang-Ku. Kare janji te dia tau inganan.

²²Aku akan mandahang turonan Dawid tuntang kare imam suku Lewi, sampai karee kilau baras hong saran tasik tuntang bintang hong langit je dia olih ise.”

²³TUHAN hamauh dengangku,

²⁴“En jari ikau mahining taloh je insanan oloh akan Israel tuntang Yuda? Ewen hamauh je Aku jari manganan due bangsa je jari intih-Ku te. Jete bukue ewen manawah ungkup-Ku, tuntang dia tinai mitong ewen kilau ije bangsa.

²⁵Tapi sama kilau Aku, TUHAN, jari mawi janji dengan andau tuntang alem, tuntang mawi atoran je mator langit tuntang petak,

²⁶tumon te kea Aku akan tetep mimbing janjing-Ku dengan turonan Yakob tuntang dengan rewar-Ku Dawid. Ije bara turonan Dawid akan intih-Ku uka marentah turonan Abraham, Ishaak tuntang Yakob. Aku akan masi ungkup-Ku, tuntang mawi ewen sanang jaton bara katapase tinai.”