Read Ngaju YEREMIA 34 Bible Online

YEREMIA 34 - Ngaju bible

YEREMIA 34

¹ Metoh Nebukadnesar raja Babel dengan pasukan parang ayue je indahang awi kare pasukan bara kare bangsa tuntang karajaan je mamenda ie dumah manyarang Yerusalem tuntang kare lewu je tokep hakalilinge, TUHAN hakotak dengangku.

²Ie manyoho aku manalih Sedekia raja Yuda, tuntang hamauh kalotoh, “Aku, TUHAN, Hatallan Israel, akan manyarah lewu toh akan raja Babel tuntang ie akan manusule.

³Ikau dia akan liwus, malengkan buah singkap tuntang inyarah akae. Ikau akan hasondau tuntang hakotak kabuat dengae, palus ikau kareh haguet akan Babel.

⁴Tapi hining auh-Ku toh tahiu ikau, Sedekia! Ikau dia akan matei hong parang,

⁵malengkan matei dengan kasanang. Tuntang kilau rayat mamapui manyan metoh mangubur tato hiangm je marentah helo bara ikau, kalote kea rayat akan mamapui manyan akam. Ewen akan manatum tuntang hamauh, ‘Hakayah! Rajan ikei jari jaton!’ Aku, TUHAN, jari hakotak.”

⁶Palus peteh TUHAN te inyampaiku akan Sedekia hong Yerusalem,

⁷metoh pasukan raja Babel manyarang lewu te. Ewen kea manyarang lewu Lakhis tuntang Aseka, due lewu hakota je magon olih tahan intu Yuda.

⁸Raja Sedekia tuntang oloh Yerusalem mawi janji akan malapas

⁹kare jipen oloh Ibrani ain ewen aloh hatue atawa bawi uka jaton ije bara bangsa Israel je mahajipen oloh je sama bangsa dengae.

¹⁰Sahapus rayat tuntang kare pajabat je marentah je jari mawi janji akan malapas kare jipen ain ewen tuntang dia mahanjipee tinai, puna toto-toto mambebas kare jipen ewen te.

¹¹Tapi limbah te ewen hobah tiroke, palus manduan haluli kare jipen te, tuntang mamaksae jadi jipen tinai.

¹²Palus TUHAN, Hatallan Israel, manyoho Aku hakotak kalotoh akan kare oloh te, “Metoh Aku mimbit tato hiang keton balua bara Misir tuntang mambebas ewen bara kahajipen, Aku jari mawi janji dengan ewen.

¹⁴ Aku hamauh tahiu jipen je oloh Ibrani je jari bagawi jahawen nyelo katahie, musti uras imbebas hong nyelo kauju. Tapi tato hiang keton dia maku manyeneh narai je ingotak awi-Ku te.

¹⁵Pire-pire andau je halau keton mobah gawin keton tuntang malalus taloh je manyanang atei-Ku. Keton uras maku mambebas kare jipen je sama-sama bangsa keton, tuntang mawi janji dengang-Ku intu huang Humang-Ku.

¹⁶Kare pajabat je marentah Yuda tuntang Yerusalem hayak kare pagawai istana, kare imam tuntang uras oloh je tukang nantuani petak keton jari marusak janji te dengan manyambalih sapi, maneteke jadi due, tuntang mananjong mahalau helat teteke te. Tapi limbah te keton mobah tirok tuntang mahina Aku. Kare jipen je jari imbebas keton tumon kahandak ewen, induan keton haluli tuntang imaksa jadi jipen tinai. Awi te, Aku, TUHAN, hamauh je keton te jari malanggar parentah-Ku, tuntang dia manumon kare auh tukas, awi keton dia mambebas sama arep keton bangsa Israel. Awi te toh Aku manyoho keton mintih manumon angat kahandak atei keton: en keton mintih matei hong parang, atawa awi panyakit, atawa awi lau. Aku akan mawi keton kilau keton mawi sapi je inyambalih keton te. Aku akan mawi uras bangsa hong kalunen mangkarieng mite taloh je iawi-Ku akan keton.

²⁰Aku akan manyarah keton akan musoh je handak mampatei keton. Hantun keton akan kinan burong tuntang meto basiak.

²¹Raja Sedekia tuntang kare pajabat je marentah Yuda akan inyarah-Ku akan kare oloh je handak mampatei ewen. Aku akan manyarah ewen akan tantara Babel, je katika toh jari malihi keton.

²²Aku akan manenga tanda mangat ewen haluli akan lewu toh, palus manyarang, marampas tuntang manusule. Kare lewun Yuda akan iawiku sama kilau padang pasir je dia ielai oloh. Aku TUHAN, jari hakotak.”