Read Ngaju YEREMIA 35 Bible Online

YEREMIA 35 - Ngaju bible

YEREMIA 35

¹ Metoh Yoyakim anak Yosia jadi Raja Yuda, TUHAN hamauh dengangku,

²“Keleh haguet hakotak dengan kare oloh jalahan Rekhab. Imbit ewen akan ije kamar huang Humang-Ku, tuntang nyarongan anggor akan ewen.”

³Palus aku haguet manduan hapus jalahan Rekhab, iete Yaasanya (anak ije biti oloh je arae Yeremia anak Habasinya) hayak kakare paharie tuntang anake je hatue.

⁴Aku mimbit ewen akan Human TUHAN akan kamar kare murid nabi Hanan anak Yigdalya. Kamar te aton hong hunjun kamar Imam Maaseya anak Salum, tokep kamar kare pajabat je beken. Maaseya te pagawai bapangkat gantong je manantuani kare bauntonggang hong Human TUHAN.

⁵Limbah te Aku mingkes intu taharep kare oloh ain Rekhab te kare sangkir kontep anggor, tuntang kare galas. Palus Aku hamauh dengan ewen, “Has, ihop anggor toh.”

⁶Tapi ewen tombah, “Ikei dia mihop anggor. Tato hiang ikei Yonadab anak Rekhab mangahana ikei tuntang turonan ikei mihop anggor. Parentah te ilalus katatahie.

⁷Ikei dia tau mimbul taloh imbul, tuntang dia kea tau bakabon anggor. Saumur belom ikei kea dia tau mampendeng huma. Ikei musti melai intu huang kemah, uka tau manetep hong eka toh kilau oloh tamuei bara bangsa beken.

⁸Uras je irentah Yonadab akan ikei jari inumon ikei. Saumur belom, ikei dengan anak sawan ikei dia mihop anggor.

⁹Ikei dia mampendeng huma akan eka ikei melai, tapi ikei melai huang kemah. Ain ikei kea jaton kabon anggor, tana atawa kea paung gandom akan imbul. Jadi, uras taloh je irentah awi tato hiang ikei Yonadab te, inumon ikei urase.

¹¹Tapi metoh raja Nebukadnesar manyarang lewu toh, ikei manukas akan hadari mahakan bara tantara Babel tuntang tantara Siria, tuntang bindah akan Yerusalem. Jete bukue ikei melai hetoh.”

¹²Palus TUHAN Je Jaton Tikas Kuasae, Hatallan Israel, manyoho aku manalih oloh Yuda tuntang Yerusalem, tuntang manyampai peteh toh akan ewen, “Aku, TUHAN, misek mbuhen keton dia maku mahining auh-Ku, tuntang dia maku manumon kare parentah-Ku.

¹⁴Yonadab mangahana turonae mihop anggor, tuntang ewen pahias manumon parentah te. Sampai andau toh jaton bara ewen je mihop anggor. Tapi aku raju-rajur hakotak dengan keton, tuntang keton dia maku mahining.

¹⁵Raju-rajur Aku manyoho uras rewar-Ku kare nabi manalih keton, tuntang ewen jari manasehat keton uka mangambuah ampin pambelom keton tuntang terai mawi kapapa. Ewen mampingat keton uka ela manyembah kare hatalla beken tuntang dia manempo ewen, mangat keton tau tetep melai intu tanah toh je jari inenga-Ku akan keton tuntang akan tato hiang keton. Tapi keton dia maku manumon tuntang manyeneh auh-Ku.

¹⁶Turonan Yonadab baketep manumon parentah tato hiang ewen, tapi keton dia maku manumon auh-Ku.

¹⁷Awi te, Aku, TUHAN Je Jaton Tikas Kuasae, Hatallan Israel, akan manenga akan keton — oloh Yuda tuntang Israel — uras calaka je jari inukas-Ku akan keton kilau je jari insanang-Ku. Taloh te ilalus-Ku awi keton dia maku mahining amon Aku hakotak dengan keton. Keton dia maku tombah katika Aku mantehau keton.”

¹⁸Palus aku hamauh dengan kare oloh bangsa Rekhab tahiu TUHAN Je Jaton Tikas Kuasae, Hatallan Israel, jari hamauh kalotoh, “Keton jari manumon auh tato hiang keton Yonadab; uras parentahe jari inumon tuntang ilalus awi keton.

¹⁹Awi te Aku, TUHAN Je Jaton Tikas Kuasae, Hatallan Israel, hajanji iete, bara turonan Yonadab anak Rekhab akan harajur aton oloh hatue je bagawi akang-Ku.”