Read Ngaju YEREMIA 36 Bible Online

YEREMIA 36 - Ngaju bible

YEREMIA 36

¹ Intu nyelo kaepat limbah Yoyakim anak Yosia jadi raja Yuda, TUHAN hamauh dengangku,

²“Duan ije kabalon buku,[20] tuntang nyurat intu hete uras taloh je jari insanang-Ku akam tahiu Israel tuntang Yuda, tuntang tahiu kakare bangsa. Nyurat uras auh-Ku manampara bara sola-solake Aku hakotak dengam metoh raja Yosia marentah sampai andau toh.

³Ayau oloh Yuda akan terai mawi kapapa amon ewen mahining uras calaka je handak iawi-Ku akan ewen. Maka Aku akan mampun dosa tuntang kapapan ewen.”

⁴Awi te aku mantehau Barukh anak Neria tuntang manambawak akae uras taloh je insanan TUHAN akangku. Palus Barukh manyurat taloh handiai intu buku je imbalon te.

⁵Limbah te aku manenga parentah toh akae, “Aku dia inyoho tame Human TUHAN tinai.

⁶Awi te, amon sampai andaue oloh puasa, ikau musti haguet akan kanih, tuntang mambasa uras kare auh je jari inambawak awiku akam hapan auh je hai, mangat ewen uras mahining kakare taloh je insanan TUHAN akangku. Lalus jete intu eka je auhm olih ihining awi genep bitin oloh je aton intu huang Human TUHAN, tuntang kea ihining awi oloh Yuda je dumah bara kare lewun ewen.

⁷Eweh katawae, mikeh awi te ewen akan balakudoa manintu TUHAN, tuntang hobah bara kare gawin ewen je papa. TUHAN sangit toto dengan ewen tuntang mansanan handak mawi ewen.”

⁸Palus Barukh mambasa auh TUHAN intu Human TUHAN, kilau je inyoho awiku.

⁹Hong bulan kajalatien nyelo kalime metoh raja Yoyakim marentah intu Yuda, rayat puasa[21] uka mandino asin TUHAN. Oloh Yerusalem tuntang oloh je dumah bara kare lewu intu tanah Yuda uras puasa.

¹⁰Palus Barukh mambasa bara buku je imbalon te uras taloh je jari insanangku, tuntang uras oloh mahininge. Jete ilalus huang Human TUHAN intu kamar Gemarya, anak Sapan sekretaris karajaan. Kamar te aton intu parantaran hila hunjun, tokep jalan tame akan Lawang Taheta intu Human TUHAN.

¹¹Mikhaya anak Gemarya tuntang eson Sapan mahining Barukh mambasa auh TUHAN bara buku te.

¹²Palus ie haguet akan istana, akan kamar sekretaris karajaan. Intu hete uras pajabat je marentah metohe hapumpong. Delaya anak Semaya, Elnatan anak Akhbor, Gemarya anak Sapan, Sedekia anak Hananya, Elisama ije biti sekretaris, tuntang kare pajabat je beken aton intu hete.

¹³Mikhaya mansanan akan ewen, uras taloh je imbasa Barukh intu Human TUHAN.

¹⁴Palus kare pajabat te manyoho Yehudi (iete anak Netanya, eson Selemya, tuntang buyut Kusi) talih Barukh dengan parentah mangat dumah tuntang mimbit akan ewen buku je jari imbasae te. Palus Barukh mimbit balon buku te,

¹⁵“Has mondok,” koan ewen, “basa buku te akan ikei.” Barukh palus manumon.

¹⁶Limbah ie jari mambasae, ewen hatanture sama arepe impahayak angat kikeh palus hakotak dengan Barukh, “Ikei musti mansanan taloh toh akan raja.”

¹⁷Limbah te ewen misek, “Coba sanan akan ikei kilen ampie ikau manyurat uras taloh toh. En Yeremia je manambawak akam?”

¹⁸“Toto, genep kotak je inyurat hong hetoh jari inambawak awi Yeremia akangku, tuntang aku manyurat te hapan dawat intu buku je imbalon toh,” tombah Barukh.

¹⁹“Ikau tuntang Yeremia musti manyahokan. Ela sampai oloh katawan ekam manyahokan te,” koan ewen.

²⁰Kare pajabat te mingkes balon buku te intu kamar Elisama, sekretaris te, limbah te haguet manalih raja tuntang mansanan taloh handiai te.

²¹Palus raja manyoho Yehudi haguet manduan balon buku te. Limbah manduae bara kamar Elisama, Yehudi mambasae akan raja tuntang akan kakare pajabat je aton mendeng hakalilinge.

²²Metoh te bulan jalatien, tuntang raja metoh mondok intu baun parapen aie hong istana wayah sadingen.

²³Sana Yehudi lepah mambasa telo atawa epat kabaris, raja manetek hila jete mahapan ije lading tuntang manjakahe akan huang apui. Tumon te ilaluse harajur sampai hapus buku te lepah buah papui.

²⁴Aloh Elnatan, Delaya, Gemarya balaku toto-toto uka raja ela mamapui buku te, tapi ie dia maku mahining auh ewen. Aloh raja atawa kare pajabat je mahining auh surat huang buku je imbalon te dia mikeh atawa manyasal.

²⁶Raja marentah anake haream, iete Yerahmeel, hayak Seraya anak Asriel tuntang Selenya anak Abdeel, uka manyingkap aku tuntang Barukh sekretaris ayungku. Tapi TUHAN manyahokan ikei.

²⁷Limbah raja Yoyakim mamapui buku je basurat auh je inambawak awiku akan Barukh te, TUHAN manyoho aku

²⁸manduan balon buku je beken, tuntang manyurat uras je aton tarasurat huang balon buku je solake te.

²⁹TUHAN manyoho aku mansanan kalotoh akan raja, “Ikau jari mamapui buku je imbalon te. Ikau jari misek Yeremia mbuhen ie manyurat je raja Babel akan dumah tuntang mamparusak lewu toh hayak mampatei kare oloh je melai hete dengan kare metoe.

³⁰Awi te, Aku, TUHAN, hamauh dengam, o raja Yoyakim, iete ije biti mahin dia aton bara turonan ayum akan marentah kilau raja turonan Dawid. Hantum akan injakah akan luar, buah lasut andau, tuntang ambon sadingen hamalem.

³¹Ikau, turonam tuntang kare pajabat ayum akan ihukum awi-Ku tagal kare dosa je ilalusm. Aku akan mawi akam calaka je jari iancam-Ku akam, awi aloh ikau atawa oloh Yerusalem tuntang Yuda dia paduli kare ancaman ayungku.”

³²Palus aku manduan balon buku je taheta, tuntang manjuloke akan Barukh sekretaris aingku. Palus ie manyurat uras taloh je inambawak awiku akae, iete surat intu balon buku je solake indahang pire-pire peteh beken je kilau te.