Read Ngaju YEREMIA 37 Bible Online

YEREMIA 37 - Ngaju bible

YEREMIA 37

¹ Metoh Nebukadnesar raja Babel mampaterai Yoyakhin anak Yoyakim, ie mangkat Sedekia anak Yosia jadi raja Yuda.

²Tapi aloh Sedekia atawa kare pajabat je marentah tuntang rayat ayue dia manumon peteh TUHAN je inenga Awie hajamban aku.

³Raja Sedekia manyoho Yukhal anak Selemya, tuntang imam Sepanya anak Maaseya manalih aku, uka balaku mangat aku balakudoa manintu TUHAN, Hatalla akan bangsa toh.

⁴Metoh te aku hindai inamean akan huang penjara tuntang magon tau haguet akan kueh bewei marak kare rayat.

⁵Tantara Babel kanjeran mangapong Yerusalem, tapi sana ewen mahining tantara Misir jari haguet bara Misir akan parang, ewen undur.

⁶TUHAN, Hatallan Israel, manyoho aku

⁷hakotak kalotoh akan sarohan raja Sedekia: “Sanan akan Sedekia, tantara Misir je metoh toh haguet akan hetoh akan mandohop ikau, akan mules buli.

⁸Palus oloh Babel akan haluli tuntang manyarang lewu toh, hayak mampakalah tuntang manusule.

⁹Aku, TUHAN, mampingat ikau, uka ela manipu arepm tuntang manirok je oloh Babel jari haguet buli tuntang dia akan haluli. Awi ewen musti akan haluli tinai akan hetoh.

¹⁰Jakae bewei keton olih mampakalah lepah tantara Babel, palus je batisa baya oloh je bahimang paham intu huang kare kemah ewen, tapi ewen kareh hingkat tuntang manusul hapus lewu toh.’ ”

¹¹Tantara Babel undur bara Yerusalem awi tantara Misir miar manintu lewu te.

¹²Palus aku malihi Yerusalem tuntang melai intu tanah Benyamin uka manarima bagin waris ayungku bara petak ayun keluarga ain ikei.

¹³Tapi sana aku sampai intu Lawang Benyamin, komandan tantara je bajaga intu hete manahan aku tuntang hamauh, “Ikau handak hadari omba pihak oloh Babel!” (Parwira te bagare Yeria; ie anak Selemya tuntang eson Hananya.)

¹⁴Aku mambaleh, “Dia toto! Aku dia handak hadari omba pihak musoh.” Tapi Yeria dia paduli auhku. Ie manyingkap tuntang mimbit aku manaharep kare pajabat je marentah.

¹⁵Ewen sangit toto dengangku, tuntang marentah mangat aku imukul tuntang ingurong intu human Yonatan, sekretaris karajaan. Huma te iawi jadi penjara.

¹⁶Aku inamean akan huang ije talaga hong penda petak, tuntang tahi inahan intu hete.

¹⁷Limbah te raja Sedekia manyoho oloh mimbit aku manaharep ie intu istana. Intu hete ie suni-suni misek dengangku mikeh aton peteh bara TUHAN. “Aton,” koangku. Palus indahangku, “Raja akan inyarah akan raja Babel.”

¹⁸Limbah te aku misek, “Narai kasalangku dengam atawa dengan kare pajabat ayum atawa rayat, sampai ikau manamean aku akan penjara?

¹⁹Intu kueh kare nabim je mansanan tahiu raja Babel je dia akan manyarang ikau tuntang lewu toh?

²⁰Toh, o Raja je paham ihormat, keleh ikau mahining palakungku toh. Ela Raja mingkes aku haluli akan penjara intu human Yonatan te, kareh aku akan matei hong hete.”

²¹Palus raja Sedekia marentah uka aku inahan intu parantaran istana. Balalu aku melai intu hete, tuntang genep andau aku mandino rote bara eka mawi rote sampai kare rote intu lewu te jari lepah urase.