Read Ngaju YEREMIA 38 Bible Online

YEREMIA 38 - Ngaju bible

YEREMIA 38

¹TUHAN manyoho aku manyampai peteh toh akan rayat, “Lewu toh akan inenga-Ku akan tantara Babel, tuntang ewen akan mampakalahe. Eweh bewei je melai intu lewu akan matei huang parang atawa awi lau, atawa panyakit. Tapi eweh je balua tuntang manyarah arep akan oloh Babel, dia akan impatei; tahasenge akan salamat.” Sepaca anak Matan, Gedalya anak Pashur, Yukhal anak Selemya, tuntang Pashur anak Malkia mahining uras kare taloh je insanangku te.

⁴Palus kare pajabat te manalih raja tuntang hamauh, “Oloh toh musti ihukum matei. Awi tagal ie hamauh kalote ie mampalemo samangat uras tantara tuntang oloh beken je magon melai intu lewu toh. Ie dia mandohop rayat, tapi mancalaka ewen.”

⁵Raja Sedekia tombah, “Yoh! Awi tumon kahandak keton, aku dia tau mangahana keton.”

⁶Palus ewen manduan aku tuntang moloh aku hapan tali akan huang sumur ayun Malkia anak raja, je aton intu parantaran istana. Sumur te jaton danum intu huange, baya lumpur, tuntang aku tame akan huang lumpur te.

⁷Metoh te aton ije biti oloh Etiopia je bagawi intu istana ain raja. Arae Ebed-Melekh. Ie mahining tahiu aku je jari inamean huang sumur te. Metoh raja kanjeran mamimpin pumpong intu Lawang Benyamin,

⁸Ebed-Melekh haguet akan hete tuntang hamauh dengan raja,

⁹“Tuan Raja, je paham ihormat, gawin kare oloh te dia bahalap. Ewen jari manamean nabi Yeremia akan huang sumur; ie batantu akan matei balau intu hete, awi panginan jari lepah intu lewu toh.”

¹⁰Palus raja marentah Ebed-Melekh, “Imbit telo[22] biti tuntang palua Yeremia bara sumur te sahelo bara ie matei.”

¹¹Palus Ebed-Melekh haguet dengan telo biti oloh te akan gudang istana. Ewen manduan kare pakaian kupit bara hete, palus molohe dengan tali akangku intu huang sumur.

¹²Ebed-Melekh manyoho aku mahapit kare pakaian te penda katiakku, mangat tali te dia mangapehe aku. Palus aku manumon parentah Ebed-Melekh.

¹³Balalu ewen manjijit aku akan hunjun, balua bara sumur te. Limbah te aku inahan intu parantaran istana te.

¹⁴Hong sinde katika, raja Sedekia manyoho oloh mimbit aku manaharep ie intu lawang katelo hong Human TUHAN. Ie hamauh dengangku, “Aku handak misek ikau, tuntang ikau musti tombah tara-tarang. Ela manyahokan taloh en-en.”

¹⁵Aku tombah, “Amon aku mansuman je toto, batantu Raja manenga hukum matei akangku; tuntang amon aku manenga nasehat, Raja dia akan handak manumon nasehat te.”

¹⁶Raja Sedekia suni-suni hajanji dengangku, koae, “Tagal Hatalla je belom, Hatalla je manenga pambelom akan itah, aku sumpah iete aku dia akan mampatei ikau atawa manyarah ikau akan kare oloh je handak mampatei ikau.”

¹⁷Palus aku mansanan akan raja Sedekia iete TUHAN Je Jaton Tikas Kuasae, Hatalla je inyembah awi oloh Israel, hakotak kalotoh, “Amon ikau manyarah arepm akan kare pajabat ain raja Babel, ikau dia akan impatei, tuntang lewu toh kea dia akan inusul. Ikau tuntang keluargam akan salamat.

¹⁸Tapi amon ikau dia maku manyarah, lewu toh akan manjato akan lengen oloh Babel. Ewen akan manusule sampai lepah, tuntang ikau dia akan liwus.”

¹⁹Raja tombah, “Aku mikeh dengan kare oloh bangsa itah je jari hadari akan tanah oloh Babel. Ela-ela aku akan inyarah akan ewen tuntang ingapehe.”

²⁰“Dia,” koangku, “Raja dia akan inyarah akan ewen, aku balaku toto-toto uka Raja manumon peteh TUHAN; kareh taloh handiai uras manjadi bahalap tuntang Raja dia akan impatei.

²¹Tapi amon Raja dia handak manyarah arep, TUHAN jari mamparahan akangku taloh je akan manjadi.

²²Hong paite te aku manampayah uras oloh bawi je magon aton intu istana Yuda imbit balua manalih pajabat ain raja Babel. Sambil mananjong ewen hamauh, ‘Raja jari imunga awi kare, sobate je heret dengae, tuntang inguasa awi ewen. Toh, limbah paie tambohos hong lumpur, ewen uras undur.’ ”

²³Aku hamauh tinai, “Uras anak sawan Raja akan iimbit balua manalih oloh Babel. Raja kabuat kea dia akan liwus bara ewen. Raja akan inyingkap awi raja Babel, tuntang lewu toh inusul lepah.”

²⁴Palus Sedekia hamauh, “Ela mansanan akan eweh bewei tahiu pander itah toh, mangat jaton je mimes tahasengm.

²⁵Amon kare pajabat mahining tahiu aku je jari hakotak dengam, ewen akan dumah tuntang misek dengam tahiu pander itah. Ewen akan hajanji akan dia mampatei ikau, amon ikau mansanan urase kare pander te akan ewen.

²⁶Sanan ih tahiu ikau je mangatau aku, mangat aku dia manamean ikau haluli akan penjara tuntang matei intu hete.”

²⁷Dia tahi limbah te uras kare pajabat te dumah tuntang misek aku. Aku mansuman akan ewen tumon taloh je irentah Raja akangku. Palus ewen dia tau mawi taloh en-en, awi jaton oloh je mangatawan pander Raja denganku.

²⁸ Aku tetep inahan intu parantaran sampai andau Israel irampas awi musoh.