Read Ngaju YEREMIA 39 Bible Online

YEREMIA 39 - Ngaju bible

YEREMIA 39

¹Hong bulan kasapuluh nyelo kajalatien metoh jaman raja Sedekia marentah Yuda, Nebukadnesar raja Babel dengan hapus pasukan parang ayue dumah tuntang manyarang Yerusalem.

²Hong tanggal due bulan epat intu nyelo kasawalas metoh raja Sedekia marentah, dinding lewu inelak musoh,

³tuntang Yerusalem irampas.[23] Palus uras pajabat ain raja Babel lula-luli mondok intu Lawang Bentok. Intu marak ewen aton Nergal-Sareser, Samgar Nebo, Sarsekim kapala urusan istana, Nergal-Sareser Rabmag tuntang kare perwira je beken.[24]

⁴Metoh raja Sedekia tuntang hapus tantarae mite taloh je manjadi te, ewen handak hadari manintu janah Yordan alem te kea. Ewen mahoroi kabon istana, palus balua mahalau lawang je manontong due dinding batu intu eka te.

⁵Tapi tantara Babel manggoang ewen tuntang manyingkap Sedekia intu janah Yerikho. Limbah te ie iimbit manalih raja Nebukadnesar intu lewu Ribla intu tanah Hamat, uka ihukum.

⁶Hong lewu te kea kare anake impatei intu taharep baue, tuntang uras kare pajabat je marentah Yuda impatei kea.

⁷Limbah te Sedekia ingaruit matae, palus imasong tuntang imbit akan Babel.

⁸Metoh te kea kare oloh Babel manusul istana raja tuntang kare human rayat, hayak manderep kare dinding kota Yerusalem.

⁹Kajariae rayat je magon aton intu lewu, hayak kare oloh je jari hadari akan pihak oloh Babel, iimbit akan Babel awi Nebusaradan, komandan pasukan Babel.

¹⁰Belahe bara rayat je paling susah belom tuntang jaton tempon ramo, ilihie intu Yuda hayak inenga kabon anggor tuntang tana.

¹¹Raja Nebukadnesar jari manyoho Nabusaradan, komandan pasukan ayue, mampalua parentah kalotoh,

¹²“Keleh haguet manggau Yeremia tuntang jaga ie bua-buah. Ela mawi taloh nara-narai dengae; lalus taloh je ilakue.”

¹³Palus Nabusaradan haya-hayak dengan due parwira ayue je gantong pangkate, Nebusasban tuntang Nergal-Sareser hayak uras parwira Babel je beken,

¹⁴manduan aku bara parantaran istana. Palus aku inyarah akan Gedalya anak Ahikam tuntang eson Sapan, je musti magah aku buli dengan salamat. Palus aku melai marak rayat.

¹⁵Metoh aku magon inahan intu parantaran istana, TUHAN manyoho aku

¹⁶mansanan akan Ebed-Melekh oloh Etiopia te, iete TUHAN Je Jaton Tikas Kuasae, Hatallan Israel, hakotak kalotoh, “Kilau je insanang-Ku bihin, Aku akan mampadumah calaka akan lewu toh, tuntang jaton kasanang kamangat. Ikau akan mite taloh je manjadi.

¹⁷Tapi Aku, TUHAN akan mangalindong ikau. Ikau dia akan inyarah akan kare oloh je ingikehm.

¹⁸Ikau dia akan impatei, awi Aku akan manyalamat ikau. Hambaruam akan salamat awi ikau basinggoh intu Aku. Aku, TUHAN, je hakotak.”