Read Ngaju YEREMIA 4 Bible Online

YEREMIA 4 - Ngaju bible

YEREMIA 4

¹TUHAN hamauh, “Ungkup Israel, amon ikau handak haluli, keleh haluli dengang-Ku. Kanan helo kare hampatong dewa je inyingi-Ku te, tuntang keleh baketep dengang-Ku.

²Amon ikau sumpah hapan arang-Ku tuntang ikau belom bujur, adil tuntang tinduh, maka uras bangsa akan balaku dengang-Ku mangat mamberkat ewen, tuntang ewen akan manara Aku.”

³ TUHAN hamauh dengan oloh Yuda tuntang Yerusalem, “Nguan petak keton je hindai inguan; ela manawor binyi intu eka onak duhi tumbo.

⁴Imbing janjin keton dengang-Ku, TUHAN keton, tuntang awi arep keton tantai akang-Ku, o oloh je melai tanah Yuda tuntang Yerusalem. Amon dia, kasangit-Ku akan hasep tuntang mangehu kilau apui tuntang dia olih imbelep awi eweh bewei. Uras taloh te akan buah keton awi kare gawin keton je papa.”

⁵Himon tarompet intu hapus tanah! Tehau tara-tarang tuntang hai auh. Soho oloh je melai tanah Yuda tuntang Yerusalem hadari akan kare lewu je hakota.

⁶Tinjok jalan akan Sion, bukit TUHAN, jeleng bindah, ela melai suni. TUHAN metoh mawi calaka tuntang karusak hai bara utara.

⁷Kilau singa balua bara ekae nyahokan kalote kea jari haguet taloh je mambinasa kare bangsa je dumah handak mambinasa Yuda. Kare lewun Yuda akan jadi tisan karak derep huma lewu eka je dia ielai oloh.

⁸Awi te, keleh manangis tuntang manatum, kepan tapih kampil tanda kapehe atei. Awi kasangit TUHAN je hasep hindai kea surut bara Yuda.

⁹TUHAN hamauh, “Hong andau te kare raja tuntang pagawai akan nihau kahanyie; kare imam hagenjeh tuntang kare nabi tarewen.”

¹⁰Palus aku hamauh, “TUHAN Pangkahai, ikau jari manipu oloh Yuda tuntang oloh je melai Yerusalem! Ikau hamauh, akan aton kasanang kamangat, tapi toh tahaseng ikei iancam padang.”

¹¹Katikae akan dumah oloh Yuda tuntang Yerusalem dinon kabar je riwut balasut bara padang pasir kanjeran hakius manintu ewen. Riwut te dia ie riwut je bahut je manantawus apis,

¹²malengkan riwut kancang je dumah awi parentah TUHAN kabuat hapa mahukum ungkup Ayue.

¹³Item, musoh dumah kilau baunandau. Kare kareta parange kilau riwut barat. Kare kudae labih balias bara burong nasar. Hakayah, calaka itah! Itah binasa!

¹⁴Yerusalem, kanan kapapa bara ateim mangat ikau inyalamat. Sampai hamparea kare tirok papa te handak ingkesm huang ateim?

¹⁵Bara lewu Dan, hayak bara kare bukit Epraim jari dumah kare sarohan je mimbit kabar papa.

¹⁶Ewen mampingat kare bangsa tuntang mansanan akan oloh Yerusalem iete musoh[2] tesek dumah bara tanah je kejau, ewen akan mambo auh lahap parang akan kare lewun Yuda.

¹⁷Ewen mangapong Yerusalem sama kilau oloh manjaga tana. Urase taloh te manjadi awi oloh Yuda jari malekak arepe bara TUHAN tuntang malawan TUHAN. TUHAN jari hakotak.

¹⁸Yuda, ikau kabuat je mawi calaka te akam. Cara ikau belom tuntang kare gawim mawi buku uras kapehe te manyodok ateim.

¹⁹Ateiku paham kapehe, dia olihku tinai manahan kapehe. Aku dia olih manyabar arepku usokku ruga-rugap, awi hiningku tarompet mahiau, tuntang auh lahap parang hapengkau.

²⁰Calaka dumah bewe-bewei marusak hapus tanah. Salenga kemahku irusak, kare benange rabit-rabita.

²¹Sampai hamparea aku musti manyaksi oloh je parang mate-matei? Sampai hamparea musti ihiningku auh tarompet je mangaraning?

²²TUHAN hamauh, “Humong toto ungkup-Ku, ewen dia kasene Aku. Ewen kilau anak oloh humong jaton samasinde kaharatie; pintar hong kapapa, dia hong kahalap.”

²³Manintu petak matangku manampayah, ampie buang tuntang keang, aku mananggera manintu langit, hakayah, jaton je balawa.

²⁴Gitangku bukit tuntang lungkoh hagolak paham toto.

²⁵Aku jaton mite olon, kare burong mahin jari uras tarawang.

²⁶Petak basiwoh jadi padang pasir keang, kare lewu hancor, awi TUHAN sangit toto dengan ungkup Ayue. (

²⁷TUHAN hamauh je hapus kalunen akan jadi padang pasir, tapi ie dia akan mampalomose samasinde.)

²⁸Petak akan pehe atei, langit kaput pijem. TUHAN jari hakotak tuntang dia akan mobah rencana Ayue. Ie jari manukas tuntang dia akan undur aloh ije kaingkang.

²⁹Tarahining auh karidu pasukan bakuda tuntang pamanah, mawi genep oloh mandari arepe sampai senge-senge. Parak kayu iname ewen, bukit batu indai ewen. Uras kare lewu manjadi benyem, jaton oloh je handak melai intu hete tinai

³⁰O Yerusalem, ikau jari ilihi tuntang dia olih mawi taloh en-en! Akan narai mahapan baju bahandang tuntang mambungas arep hapan amas perak, hayak mohos mata hapan calak? Ngahus ikau mambungas arepm, awi kare oloh je eka sintam jari manolak ikau, tuntang ewen handak mampatei ikau haream.

³¹Aku mahining, auh tarahing sama kilau oloh bawi tabela je handak manak; sama kilau oloh bawi tabela manak temei, kalote tangis Yerusalem je seke tahasenge. Lengee japang-jimat hayak mungoh, “Calaka aku — aku handak impatei awi musoh!”