Read Ngaju YEREMIA 41 Bible Online

YEREMIA 41 - Ngaju bible

YEREMIA 41

¹ Hong bulan uju nyelo te Ismael anak Netanya tuntang eson Elisama haguet hayak sapuluh biti oloh akan Mispa manyondau Gedalya. (Ismael iete turonan raja, ije bara kare perwira gantong karajaan.) Metoh ewen uras kuman haya-hayak,

²Ismael tuntang sapuluh biti oloh te manyilak padang ewen tuntang mampatei Gedalya, gubernur je iangkat oloh Babel te.

³Ismael mampatei kea uras oloh Yuda je aton dengan Gedalya intu Mispa, tuntang uras tantara Babel je tabarong aton intu hete.

⁴Andau jewue, sahelo bara pampatei Gedalya ingatawan oloh,

⁵aton dumah hanya puluh biti bara Sikhem, Silo tuntang Samaria. Ewen jari manetek janggut, marabit pakaian, tuntang mahiri-hiris bitin ewen. Ewen mimbit gandom tuntang manyan akan parapah intu Human TUHAN.

⁶Palus Ismael balua bara Mispa tuntang haguet manyondau ewen. Sambil manangis, ie hamauh, “Ayo haguet mite Gedalya.”

⁷Sana ewen sampai intu bentok lewu, Ismael dengan kare oloh ayue mampatei ewen. Tapi sapuluh bara ewen hamauh dengan Ismael, “Ela mampatei ikei! Ikei magon aton due macam gandom, tuntang kea undus saitun tuntang mado, urase ina ikei intu ruar lewu.” Awi te Ismael dia mampatei ewen, tapi je beken impateie tuntang hantun ewen injakah akan huang sumur.

⁹Sumur te iete sumur hai je inampa awi Raja Asa metoh ie inyarang Baesa raja Israel.

¹⁰Limbah te Ismael manyingkap kare anak bawi ain raja tuntang kakare oloh je magon aton intu Mispa je jari inyarah awi Nabusaradan uka ihaga awi Gedalya. Ismael manawan ewen palus haguet dengan ewen akan hila tanah Amon.

¹¹Yohanan anak Kareah tuntang uras parwira je hayak dengae mahining tahiu kapapan Ismael.

¹²Palus ewen dengan oloh ayun ewen haguet manggoang ie, tuntang sondau ie intu talaga hai Gibeon.

¹³Mite Yohanan hayak kare parwira te dumah, kare oloh je inawan awi Ismael hanjak toto,

¹⁴palus mules hadari manalih pasukan Yohanan.

¹⁵Tapi Ismael tuntang hanya biti oloh ayue liwus, tuntang hadari akan tanah oloh Amon.

¹⁶Limbah te Yohanan tuntang kare parwirae mamumpong kare tantarae, oloh bawi, anak oloh, tuntang kare pagawai istana je inawan awi Ismael limbah mampatei Gedalya.

¹⁷Uras ewen mikeh dengan oloh Babel, awi Ismael jari mampatei Gedalya je iangkat awi raja Babel jadi gubernur hong tanah te. Balalu ewen hadari akan Misir. Intu benteng jalan, ewen tende intu Kimham tokep Betlehem.