Read Ngaju YEREMIA 42 Bible Online

YEREMIA 42 - Ngaju bible

YEREMIA 42

¹Limbah te uras oloh, hai korik, hayak kare parwira, tuntang Yohanan anak Kareah kea tinai Asarya anak Horaya manalih

²aku tuntang hamauh, “Kilau je gitam kabuat, ikei toh bihin are jumlah bitie, toh batisa isut ih. Ikei balaku uka ikau handak balakudoa akan ikei intu TUHAN, Hatalla je inyembah awim. Laku akan ikei je magon batisa toh,

³uka TUHAN, Hatalla mamparahan akan ikei akan kueh ikei musti haguet tuntang narai je musti ilalus ikei.”

⁴Aku tombah, “Yoh, aku manarima palakun keton te. Aku akan balakudoa manintu TUHAN, Hatallan itah, tuntang narai bewei panombahe, akan insanangku urase; jaton ije je inyahokangku bara keton.”

⁵Ewen hakotak dengangku, “Ikei balaku uka ikau balakudoa intu TUHAN, Hatallan itah, awi ikei handak baketep dengae, mangat pambelom ikei bahalap. Papa atawa bahalap panombah TUHAN te, ikei handak manumoe. Keleh TUHAN jadi saksi je bujur tuntang baketep dengan ikei, amon ikei dia manumon uras parentah je inenga TUHAN akan ikei hajamban ikau.”

⁷Sapuluh andau limbah te TUHAN hamauh dengangku.

⁸Palus aku mantehau Yonatan tuntang kare parwirae tuntang uras oloh beken je dumah hayak dengae.

⁹Aku hamauh dengan ewen, “Keton manyoho aku manyampai palakun keton dengan TUHAN, Hatallan Israel, TUHAN hamauh,

¹⁰‘Amon keton handak tetep melai hong tanah toh, aku akan manggatang keton, dia mampajatoe; aku akan mampendeng keton dia mampalihange. Aku paham kapehe atei awi jadi mawi calaka akan keton.

¹¹Ela tinai mikeh dengan raja Babel te. Aku aton intu marak keton akan mandohop tuntang maliwus keton bara kuasae.

¹²Awi aku masi keton, aku akan mawi raja Babel masi keton tuntang manyoho keton buli. Aku, TUHAN, jari hakotak.’ ”

¹³Tapi keton je magon melai intu Yuda, ela malawan TUHAN, Hatallan keton, tuntang ela hamauh, “Ikei dia handak melai intu lewu toh. Ikei handak tolak akan Misir tuntang melai intu lewu te. Intu kanih ikei dia tinai mangkeme parang, dia mahining auh tarompet je mantehau akan kalahi, tuntang dia kea buah lau.” Amon keton jua-juan tolak akan Misir tuntang melai intu kanih, toh peteh TUHAN Je Jaton Tikas Kuasae, Hatallan Israel, akan keton.

¹⁶“Parang tuntang lau je ingikeh keton te akan manggoang keton sampai akan Misir, tuntang keton akan matei intu lewu te.

¹⁷Uras oloh je jua-juan haguet akan Misir tuntang melai intu kanih akan matei awi parang, atawa lau atawa panyakit. Jaton ije je liwus bara calaka je akan inenga-Ku akan ewen; urase akan matei.

¹⁸Kilau Aku, TUHAN, Hatallan Israel, manusoh kalait tuntang kasangit-Ku akan oloh Yerusalem, kilau te kea akan manusoh kasangit-Ku akan keton je haguet akan Misir. Oloh akan mangkarieng mite keton; keton ihina, tuntang aran keton akan indu sapan oloh. Keton dia akan mite petak danum keton toh tinai.”

¹⁹Palus aku hamauh tinai, “TUHAN jari marentah uka keton je batisa intu Yuda dia haguet akan Misir. Awi te Aku mampingat keton katika toh

²⁰iete, keton jari mawi kasalan hai. Keton balaku aku balakudoa manintu TUHAN, Hatallan itah, akan keton; tuntang keton hajanji akan malalus uras taloh je insanan awi TUHAN.

²¹Toh aku jari manyampai peteh TUHAN, Hatallan itah akan keton, tapi keton dia maku manumon peteh te.

²²Awi te, ingat: intu lewu je inalih eka keton manetep te, keton akan matei huang parang, atawa awi lau atawa panyakit.”