Read Ngaju YEREMIA 43 Bible Online

YEREMIA 43 - Ngaju bible

YEREMIA 43

¹Peteh TUHAN, Hatallan Israel, je musti inyampaiku akan rayat jari inyampaiku urase.

²Palus Asarya anak Hosaya tuntang Yonatan anak Kareah dengan uras oloh beken je bajoho te hamauh dengangku, “Ikau mananjaro. TUHAN, Hatallan ikei dia mangahana ikei melai intu Misir.

³Barukh anak Neria te je manyoho ikau malawan ikei, mangat oloh Babel manguasa ikei tuntang tau mampatei tuntang mimbit ikei akan Babel.”

⁴Aloh Yohanan kalote kea kakare parwira tuntang rayat dia maku manumon parentah TUHAN uka tatap melai intu tanah Yuda.

⁵ Yohanan tuntang uras perwira te mimbit haguet akan Misir genep oloh je magon melai intu Yuda, tuntang uras oloh je jari buli bara tanah beken eka ewen kasaburan.

⁶Hatue, bawi, anak oloh, tuntang kare anak bawi ain raja je inyarah Nabusaradan uka injaga awi Gedalya, tatamput aku tuntang Barukh, urase imbit akan Misir.

⁷Ewen malawan parentah TUHAN, tuntang haguet akan Misir sampai akan lewu Tahpanhes.

⁸Intu hete TUHAN hamauh dengangku,

⁹“Duan kare batu je hai, ngawok huang petak intu hila baun bauntonggang tame akan huma eka kantor pamarentah lewu te. Saoli-olih metoh ikau malalus gawi te, uras oloh Yuda mite taloh gawim te.

¹⁰Palus suman akan ewen iete Aku, TUHAN Je Jaton Tikas Kuasae, Hatallan Israel, akan mampadumah rewar-Ku Nebukadnesar raja Babel, akan eka te. Tuntang intu hunjun kare batu je ingawokm te ie akan mampendeng padadusae hayak mambirang kemah karajaae.

¹¹Nebukadnesar akan dumah tuntang mampakalah Misir. Tuntang kare oloh je jari inukas akan matei awi panyakit akan matei awi panyakit. Ewen je jari inukas akan iimbit kilau tawanan akan iimbit kilau tawanan; tuntang je inukas akan matei huang parang akan matei huang parang.

¹²Aku[25] akan mantokan apui intu kare human kare dewa Misir, tuntang Raja Babel akan manusul kare hampatong dewa intu eka huma te atawa mimbite akan lewue. Kilau ije biti sakatik je marasih pakaiae bara tome, kalote kea raja Babel akan mampalomos Misir palus haguet tinai hayak jaton je manderohe.

¹³Kare tugu batu ain dewa intu Heliopolis[26] hong Misir, akan imparotek, tuntang kare human dewa Misir akan lepah inusul.”