Read Ngaju YEREMIA 49 Bible Online

YEREMIA 49 - Ngaju bible

YEREMIA 49

¹ Jetoh je insanan TUHAN tahiu Amon, “Mbuhen petak suku Gad irampas tuntang ielai kare oloh je manyembah Dewa Milkom? En jari jaton tinai oloh Israel je tau mambela tanah te?

²Tapi akan dumah katikae Aku mawi oloh Raba, lewu eka raja Amon mondok marentah, mahining lahap parang. Lewu te akan jadi tuyok derep taloh tuntang kare kampong hakalilinge je tokep lepah bakehu. Palus Israel akan manduan haluli petake bara kare oloh je bihin marampase.

³O oloh Hesbon, keleh manangis, awi lewu Ai jari rusak! O kare bawin oloh lewu Raba, keleh manangis! Kepan tapih kampil tanda kapehe atei. Keleh hadari kanih kate ganan kabingung. Milkom dewam akan iimbit akan eka tawanan hayak kare imam tuntang kare pajabat je marentah!

⁴O keton je dia baketep! Mbuhen keton manara kare janah keton je basiwoh? Narai bukue keton mampaandal panatau keton? Kilen ampie keton tau hamauh manyewut jaton je bahanyi manyarang keton?

⁵Keton akan intakan awi je impadumah-Ku bara hete-hete. Keton akan hadari, genep biti handak manyalamat arep kabuat. Jaton je mamumpong keton tinai.

⁶Tapi hong rahian andau, pambelom bangsa Amon akan ihalalian awi-Ku. Aku, TUHAN, jari hakotak.”

⁷ Jetoh je insanan TUHAN Je Jaton Tikas Kuasae tahiu Edom, “En oloh Edom dia tau bapikir mahapan kapintar kaharati? En kare panasehate dia tinai manasehat ewen? En jari nihau kapintar ewen?

⁸O oloh Dedan, mules tuntang dari! Keleh manyahokan. Aku akan marusak turonan Esau, awi jari sampai katikae Aku mahukum ewen.

⁹Amon oloh mamutik bua anggor, harajur aton je inisae, tuntang amon oloh panakau dumah hamalem, ie baya manduan taloh je eka kahandake.

¹⁰Tapi Aku [28] mampalingis kakare taloh je ayun turonan Esau tuntang mukei rahasia eka ewen manyahokan; ewen dia tau manyahokan tinai. Oloh Edom hayak kare pahari tuntang sobat ewen uras jari imbinasa, jaton oloh je liwus.

¹¹O Edom, lihi kare anak nule aim dengang-Ku, Aku akan mahaga ewen. Keleh kare balo ayum percaya Aku.

¹²Oloh je dia pantas ihukum jadi kea buah hukum, dia badai keton dia? Tantu keton musti buah hukum!

¹³Aku sumpah tagal arang-Ku kabuat iete lewu Bosra akan jadi eka je mangkarieng je ilihi oloh. Oloh akan manatawe ie tuntang mahapan arae kilau auh sapa. Uras kampong hakalilinge je tokepe akan jadi tuyok taloh baderep sampai katatahie. Aku, TUHAN, jari hakotak.”

¹⁴Aku, Yeremia, hamauh, “O Edom, aku jari manarima ije barita bara TUHAN. Je jari manyoho sarohan akan kare bangsa akan manyoho ewen mamumpong tantara tuntang batatap akan manyarang ikau.

¹⁵TUHAN akan manjadian ikau balemo tuntang ihina oloh.

¹⁶Ikau imunga awi kajohom. Jaton ije je mikeh dengam kilau tirokm. Ikau melai intu kare helat batu, kejau hong tantan bukit. Tapi, aloh ikau manampa humam intu eka je gantong toto, tumon kagantong eka sarangan burong nasar, TUHAN akan mampamohon ikau bara hete. TUHAN je mansanan urase jete.”

¹⁷TUHAN hamauh, “Calaka je buah Edom akan paham toto sampai genep oloh je mahalau hete akan tarewen tuntang mikeh.

¹⁸ Kilau Sodom tuntang Gomora impalingis hayak kare kampong tokepe, kalote kea Edom. Jaton oloh je melai tinai intu hete. Aku, TUHAN, jari hakotak.

¹⁹Kilau singa balua bara parak kayu tokep Sungei Yordan tuntang manalih janah eka tabiri kuman oru, kalote kea Aku akan dumah tuntang mawi oloh Edom hadari bara lewun ewen manyalenga. Palus Aku akan mintih ije biti pamimpin akan marentah bangsa te. Eweh tau inyama dengang-Ku? En aton pamimpin je tau malawan Aku?

²⁰Awi te, hining taloh je jari irencana-Ku akan oloh Edom, tuntang taloh je handak ilalus-Ku akan oloh lewu Téman. Kare anak ewen kea akan imbit haguet, tuntang uras oloh akan mikeh.

²¹Amon Edom manjato, akan tarahining karidu je hai sampai hapus kalunen hongge; kare kariak oloh hete akan tarahining sampai akan Tasik Raruju.

²²Kilau burong nasar manyambar dengan palapas imbirang, tumon te musoh akan dumah tuntang manyambar Bosra. Hong andau te tantara Edom mikeh kilau oloh bawi je handak manak.”

²³ Toh je insanan TUHAN tahiu Damaskus, “Oloh lewu Hamat tuntang Arpad mikeh tuntang balisah awi mahining kabar papa. Atei ewen bagisah, tuntang hantung hamba sama kilau galombang tasik.

²⁴Oloh Damaskus balemo, tuntang hadari takikeh. Ewen kapehe kilau oloh bawi je handak manak.

²⁵Lewu je basewut tuntang harajur hanjak hayak rami-rami te, toh jadi eka tunis banyem jaton oloh melaie.

²⁶Hong andau te kare oloh tabelae matei intu kare jalan lewue, tuntang hapus tantarae impahancor.

²⁷Kare dinding Damaskus akan inusul-Ku, tuntang kare istanan Raja Benhadad ingehu awi-Ku. Aku, TUHAN Je Jaton Tikas Kuasae jari hakotak.”

²⁸Toh ie taloh je insanan TUHAN tahiu suku Kedar tuntang kare daerah je inguasa Hasor, je jari irampas Nebukadnesar raja Babel. “O Nebukadnesar, nyarang suku Kedar tuntang patei kare oloh intu hila timor!

²⁹Rampas tabiri, onta, hayak kare kemah ewen dengan kare huange. Kariak akan ewen, ‘Pampikeh manyangkulep keton!’

³⁰O keton oloh Hasor! Aku, TUHAN hamauh: Gulong haguet hadari tuntang manyahokan. Nebukadnesar raja Babel jari marencana akan manyarang keton. Ie hamauh,

³¹‘Ayu miar. Keleh itah manyarang kare oloh je mangkeme dia buah kaderoh tuntang sanang te. Kotan ewen dia ingalindong awi jaton lawange tuntang jaton huite.’ ”

³²TUHAN hamauh tinai dengan Nebukadnesar, “Rampas kare onta tuntang salepah meto ain ewen! Kare oloh je balaue pandak te akan inaburan awi-Ku akan hete-hete. Aku akan mawi calaka akan ewen bara hete-hete.

³³Hasor akan inalua sampai katatahie tuntang jari eka manyahokan aso parak kayu. Jaton oloh je melai intu hete tinai. Aku, TUHAN, jari hakotak.”

³⁴Dia tahi limbah Sedekia jadi raja Yuda, TUHAN Je Jaton Tikas Kuasae hakotak dengangku tahiu lewu Elam.

³⁵TUHAN hamauh, “Aku akan mampatei uras oloh je apik mamanah je mawi Elam abas toto.

³⁶Aku akan mahimon riwut akan Elam bara hete-hete, tuntang manyarah kare oloh akan hete-hete sampai jaton ije lewu je dia inalih awi kare oloh je hadari bara Elam te.

³⁷Aku akan mawi oloh Elam mikeh dengan musoh je handak mampatei ewen. Aku sanggit toto dengan ewen tuntang akan mambinasa ewen. Aku akan mangirim tantara je mangalahi ewen, sampai ewen lepah samasinde.

³⁸Kare raja tuntang kare pajabat ain ewen akan imbinasa awi-Ku. Intu lewun ewen akan impendeng-Ku padadusang-Ku.

³⁹Tapi hong rahian andau, pambelom Elam ilhalaliang-Ku tinai. Aku, TUHAN jari hakotak.”