Read Ngaju YEREMIA 5 Bible Online

YEREMIA 5 - Ngaju bible

YEREMIA 5

¹O oloh Yerusalem, keleh manetei kare jalan intu lewum! Gau intu hete-hete, ite kabuat. Riksa intu alun-alun lewu en aton ije biti oloh bujur ateie je handak baketep dengan Hatalla. Amon aton maka TUHAN akan mampun Yerusalem.

²Ikau hamauh manyewut arepm manyembah TUHAN, padahal ikau jaton kahandakm kalote.

³Ije kapunae taloh je ilaku awi TUHAN iete kaketep atei. TUHAN mamukul ikau, tapi ikau dia paduli. Ie mamparotek ikau, tapi ikau dia maku iajar. Ikau badungil, tuntang dia maku hobah bara dosam.

⁴Aku manirok, “Ceh, ewen baya oloh korik je dia katawan taloh en-en. Ewen malalus kahumong, awi dia katawan taloh je ingahandak tuntang ilaku awi TUHAN, Hatallan ewen.

⁵Keleh aku manalih kare oloh hai, tuntang hakotak dengan ewen. Batantu ewen katawan narai je ingahandak tuntang ilaku TUHAN, Hatallan ewen.” Tapi, ewen uras dia maku irentah awi TUHAN; ewen dia handak manumon auh Ayue.

⁶Awi te ewen akan impatei awi singa bara parak kayu, tuntang imisak-minit awi sarigala bara padang pasir. Macan tutul akan hapampayap manggau panginan tokep kare lewun ewen, tuntang genep oloh je balua akan inangkarape. Uras taloh te manjadi awi ewen jari are dosae, tuntang kinjap manalikut Hatalla.

⁷TUHAN hamauh, “Mbuhen Aku musti mampun kare dosan ungkup-Ku? Ewen jari malihi Aku tuntang manyembah taloh je dia Hatalla. Aku mampakanan ewen sampai ewen besoh, tapi ewen habandong, tuntang kinjap manalih kare lontei.

⁸Ewen kilau kuda hatue je basepot tuntang karas kipee. Genep bitin ewen mipen sawan sobate.

⁹En dia patut Aku mahukum bangsa je macam te tuntang mambaleh taloh je jari ilalus ewen?

¹⁰Aku akan manyoho musoh marusak kabon anggor ewen, tapi dia akan mampalomose. Aku akan manyoho musoh te manetek kare edan kare batang anggor ewen, awi kare edan te dia ayung-Ku.

¹¹Ungkup Israel tuntang Yuda toto-toto jari mandarhaka dengang-Ku. Aku, TUHAN, jari hakotak.”

¹²Ungkup TUHAN mansanan taloh je dia toto tahiu TUHAN. Ewen hamauh, “Ceh, Ie dia akan malalus taloh en-en. Itah dia akan buah calaka tuntang dia akan mangkeme parang atawa lau.

¹³Anggap ih kare nabi te riwut bewei, awi peteh TUHAN jaton intu ewen.”

¹⁴Palus TUHAN Je Jaton Tikas Kuasae hamauh dengang-Ku, “Yeremia, awi kare oloh te hamauh kalote, maka ewen akan buah calaka je manumon ewen dia akan manjadi. Aku akan mawi kare auh-Ku sama kilau apui intu huang nyamam. Bangsa toh akan sama kilau pandok apui, tuntang apui te akan mangehu ewen sampai lepah.”

¹⁵O ungkup Israel, TUHAN teseke mampadumah ije bangsa bara lewu je kejau uka manyarang keton. Bangsa te jari aton bara horan, basae dia keton kasenee. Ewen abas toto,

¹⁶kare ewen te oloh je mahapan panah uras gagah menteng; ewen mampatei oloh jaton asi samasinde.

¹⁷Ewen akan mampalepah hasil petak tuntang panginan keton hayak mampatei kare anak keton. Sapi tuntang tabirin keton akan inyambalih ewen. Kare kabon anggor tuntang kare batang sikon keton akan impalingis ewen. Kare lewu hakota je iandal keton akan imparamok ewen.

¹⁸TUHAN hamauh, “Aloh kalote, hong katika te Aku dia akan mampalomos ungkup-Ku.

¹⁹Tapi amon ewen misek mbuhen Aku malalus kakare taloh te mawi ewen, sanan o Yeremia, iete tumon ampin ewen malihi Aku intu tanah ewen kabuat uka manempo kare dewa bangsa beken, tumon te kea ewen akan jadi rewar kare oloh beken intu tanah beken.”

²⁰TUHAN manyoho aku manyampai peteh toh akan turonan Yakob je melai intu Yuda.

²¹ “Hining, o keton oloh humong tuntang paleng! Keton aton mate tapi dia mite, aton pinding tapi dia mahining!

²² Aku toh TUHAN; mbuhen keton dia mikeh dengang-Ku? Sapunae keton hagenjeh intu taharep-Ku. Aku je mawi pantai akan tikas saran tasik je dia tau inangkalaue sampai katatahie. Tasik tau mangambuar tuntang galombang tau mamok, tapi dia olih manangkalau tikas saran tasik te.

²³Tapi keton badungil tuntang rajin malawan; keton jari mahiwang tuntang malihi Aku.

²⁴Dia puji keton mingat uka mahormat Aku, padahal Aku je manenga ujan, aloh hong tamparan atawa hong lawin wayah pangujan. Aku kea je manenga akan keton wayah getem sining nyelo.

²⁵Tapi kare dosan keton te je manahan uras taloh je bahalap te sampai keton dia mangkemee.

²⁶O ungkup-Ku, hong marak keton aton kare oloh je papa. Kilau oloh je manunggu jarat je inenae hapa manawan burong, tumon te ewen manenan jarat hapa manawan olon.

²⁷Kilau oloh je hamburong manyuang karongae dengan burong, tumon te kea ewen manyuang human ewen dengan kare ramo je dinon manipu. Kalote ewen palus bakuasa tuntang tatau,

²⁸hayak basepot tuntang jaton bara katapas. Kapapan ewen jaton tikase. Ewen dia malalus kaadilan hong kare perkaran anak nule, tuntang dia mandohop kare hak oloh je buah henyek.

²⁹Tapi Aku, TUHAN, akan mahukum ewen awi taloh samandiai te. Aku akan mamaleh hapus gawin bangsa toh.

³⁰Taloh je manarewen tuntang mampikeh jari manjadi hong tanah toh;

³¹kare nabi mananjaro, kare imam malalus gawi manumon kahandake kabuat tuntang keton ungkup-Ku mangilak taloh te. Tapi narai je iawi keton amon dumah andau je kahapuse?”