Read Ngaju YEREMIA 50 Bible Online

YEREMIA 50 - Ngaju bible

YEREMIA 50

¹ Toh peteh TUHAN dengangku tahiu lewu Babel tuntang kare oloh je melai hete,

²“Kepan tanda tuntang sanan akan kare bangsa tahiu Babel je jari impakalah! Ela milim taloh te! Merodakh dewae jari imparusak. Kareh hampatonge je bakahawe-hawen jari imparotek, hayak kare taloh je inyembah ewen jari ihina.

³Ije bangsa bara utara akan dumah manyarang Babel tuntang mawi lewu te jadi padang pasir keang kamahau. Olon tuntang meto akan hadari malihie, tuntang jaton je handak melai intu hete tinai.”

⁴TUHAN hamauh, “Hong katika te oloh Israel tuntang Yuda akan dumah haya-hayak sambil manangis manggau Aku, Hatallan ewen.

⁵Ewen akan misek jalan akan Sion, palus mananjong akan hila hete. Ewen akan mawi janji katatahie dengang-Ku, tuntang akan tetep mimbinge.

⁶Ungkup-Ku kilau tabiri je jari inalua layang intu kare petak habukit awi kare sakatike. Ewen malayap bara ije bukit akan bukit je beken tuntang dia katawan tinai intu kueh human ewen.

⁷Ewen inyarang tuntang ingapehe awi eweh je hasondau dengan ewen. Kare musoh ungkup-Ku hamauh, ‘Taloh je iawi itah, dia sala, awi kare oloh te jari badosa taharep TUHAN. Tato hiang ewen percaya dengan TUHAN, jadi je sapunae ewen kea tetep baketep intu Ie.’

⁸ O ungkup Israel, dari bara Babel! Keton je sola-solake musti haguet, mangat je beken manuntut.

⁹Aku akan mirak uras bangsa je aba-abas bara utara uka ewen manyarang Babel. Ewen akan manyadia arepe akan parang malawan Babel tuntang mampakalahe. Ewen te kare oloh je apik mamanah je panahe dia puji sala.

¹⁰Babel akan irampok, tuntang kare parampoke akan manduan uras narai bewei tumon kahandake. Aku, TUHAN, jari hakotak.”

¹¹TUHAN hamauh, “O oloh Babel, keton marampok ungkup-Ku. Keton kajo-kajok hanjak sama kilau kuda je manganda tuntang sama kilau sapi je metoh kuman uro.

¹²Tapi keton akan jadi bangsa je paling jaton regae marak kare bangsa. Lewun keton je hai te akan ihina, tuntang impahawen. Tanah keton akan jadi padang pasir je keang.

¹³Awi Aku sangit, palus Babel akan jadi taloh baderep bakarak tuntang jaton oloh je melaie. Uras oloh je mahalau hete akan tarewen tuntang mangkarieng manampayahe.

¹⁴O keton kare oloh je apik mamanah! Nyadia arep keton uka manyarang Babel tuntang mangaponge. Nintu uras panah keton akan Babel, awi ie jari badosa dengang-Ku.

¹⁵Ambo auh lahap parang hakaliling lewu te! Toh Babel jari manyarah. Kare dindinge jari inelak tuntang imparusak. Aku metoh mambaleh Babel. Awi te lalus taloh akan ewen kilau ewen mawi kare taloh akan oloh beken.

¹⁶Ela manalua oloh bakabon atawa manggetem hong lewu te. Uras oloh bangsa beken je melai intu hete akan buli manalih tanah ewen, awi ewen mikeh dengan tantara je manyarang.”

¹⁷TUHAN hamauh, “Oloh Israel sama kilau kawan tabiri je inggoang awi singa, balalu hadari pisah darai. Solake ewen inyarang awi raja Asur, palus Nebukadnesar raja Babel mangirut kare tulang ewen.

¹⁸Awi te, Aku, TUHAN Je Jaton Tikas Kuasae, Hatallan Israel, akan mahukum raja Nebukadnesar tuntang tanahe sama kilau Aku mahukum raja Asur.

¹⁹Aku akan malian oloh Israel buli akan lewun ewen. Ewen akan kuman bara hasil petak bukit Karmel tuntang tanah Basan. Ewen akan imbesoh awi hasil petak tanah Epraim tuntang Gilead.

²⁰Metoh te Israel tuntang Yuda akan barasih bara dosa. Awi Aku akan mampun kare oloh je inyalamat-Ku. Aku, TUHAN, jari hakotak.”

²¹TUHAN hamauh dengan ije bangsa bara utara,[29] “Nyarang oloh Merataim tuntang Pekod, patei tuntang palepah ewen. Lalus parentah-Ku. Aku, TUHAN, jari hakotak.”

²²Auh parang mangguroh intu lewu, tuntang mampalembut karusak je hai.

²³Hapus kalunen imukul awi Babel sampai ramok, tapi toh gagada sanaman te jari bapelek! Uras bangsa tarewen mahining taloh je manjadi intu lewu te.

²⁴TUHAN hamauh, “Babel, ikau malawan Aku, awi te ikau tajabak huang jarat je inenan awi-Ku akam, tapi ikau dia katawae.

²⁵Gudang eka pakakas parang jari imbangah awi-Ku, tuntang marak kasangit-Ku Aku mampalua kare pakakas parang te, awi Aku TUHAN pangkahai tuntang Je Jaton Tikas Kuasae musti malalus taloh gawi hong Babel.

²⁶Nyarang Babel bara hakaliling, nelak kare gudang gandome! Nuyok kare ramo rampasan sama kilau keton manuyok gandom! Parusak lewu te! Ela aton je batisa!

²⁷Patei uras tantarae! Muno ewen! Calaka bangsa Babel! Jari sampai katikae ewen ihukum!” (

²⁸Kare oloh je hadari akan Yerusalem bara Babel manyarita kilen ampie TUHAN, Hatallan itah mambaleh gawin oloh Babel taharep Human TUHAN.)

²⁹ TUHAN hamauh “Nyoho oloh pamanah manyarang Babel. Irak genep oloh je apik mamanah. Ngapong lewu te, tuntang ela manaluae aloh ije biti mahin dia tau liwus. Mbaleh uras gawie tuntang mbaleh akae tumon gawie. Awi ie jari mawi gawi je kurang ajar taharep Aku, Je Barasih Haliai, Hatallan Israel.

³⁰Hong andau te kare oloh hatue tabela akan matei intu kare jalan lewue, tuntang hapus tantarae impalomos. Aku, TUHAN, jari hakotak.

³¹Babel, ikau lalau bajoho! Awi te, Aku, TUHAN Je Jaton Tikas Kuasae, malawan ikau. Sampai katikae ikau ihukum awi-Ku.

³²Bangsam je bajoho te akan tantarang tuntang balawo. Jaton ije je mandohop ikau hingkat. Kare lewum akan inusul awi-Ku, tuntang uras taloh je tokepe akan impalomos.”

³³TUHAN Je Jaton Tikas Kuasae hamauh, “Oloh Israel tuntang oloh Yuda kapehe. Uras je manawan ewen manjaga ewen toto-toto tuntang dia maku malapas ewen.

³⁴Tapi Aku je manyalamat ewen te abas, arang-Ku TUHAN Je Jaton Tikas Kuasae. Aku kabuat je akan manyalamat ewen tuntang mimbit kasanang kamangat akan kalunen. Tapi akan oloh Babel akan iawi-Ku kaderoh tuntang kikeh.”

³⁵TUHAN hamauh, “Binasa Babel hayak rayat tuntang pajabat je marentah hayak dengan kare oloh pintar harati ain ewen!

³⁶Binasa kare nabin Babel! Ewen pananjaro tuntang humong! Binasa tantara Babel je menteng! Ewen mikeh toto!

³⁷Keleh mampalomos kuda tuntang kareta parange! Tuntang mambinasa kare tantara je inyewae! Ewen balemo toto! Imbit kare ramon panataue!

³⁸Pateah kare sungei tuntang tanae! Awi, Babel kontep dengan hampatong dewa je mampalembut angat mangkarieng, je mawi kare oloh je manyembahe manjadi gila.

³⁹ Awi te Babel akan jadi eka kare ijin tuntang kare roh papa[30] hayak kare burong onta. Sampai katatahie jaton oloh je handak melai intu hete tinai.

⁴⁰ Kilau Aku jari mampalomos Sodom tuntang Gomora hayak kare kampong je tokep hakalilinge, kalote kea Aku akan mampalomos Babel. Jaton ije biti oloh je melai intu hete tinai. Aku, TUHAN, jari hakotak.

⁴¹Ije bangsa je abas kanjeran haguet bara tanah je kejau intu utara. Ewen dumah impahayak are raja handak parang.

⁴²Ewen mahapan panah tuntang lunju; ewen oloh karas tuntang jaton manenga ampun. Kilau auh gotok tasik, tumon te auh darin kuda ain ewen je metoh indari akan haguet manyarang Babel.

⁴³Mahining barita te, Raja Babel halelek bagalabah nihau kaabase. Ie ingalambo kikeh, tuntang manyarenan kapehe kilau oloh bawi je handak manak.

⁴⁴Kilau singa manyalenga dumah bara parak kayu tokep Sungei Yordan balalu manalih janah eka tabiri kuman oru, kalote Aku, TUHAN, akan dumah manyalenga tuntang mawi oloh Babel hadari bara lewun ewen. Palus Aku akan mintih ije biti pamimpin akan marentah bangsa te. Eweh je tau inyama dengang-Ku? Eweh je bahanyi mawi perkara dengang-Ku? En aton pamimpin je olih malawan Aku?

⁴⁵Awi te, hining taloh je jari irencana awi-Ku akan lewu Babel, tuntang kare taloh je handak ilalus awi-Ku dengan kakare oloh je melai hete. Kare anak ewen kea iimbit omba haguet, tuntang kare oloh uras mikeh.

⁴⁶Amon Babel kalah, akan tarahining karidu je paham toto, sampai hapus kalunen hongge; kare auh kariak oloh je melai hete akan tarahining awi kare bangsa beken.”