Read Ngaju YEREMIA 51 Bible Online

YEREMIA 51 - Ngaju bible

YEREMIA 51

¹TUHAN hamauh, “Aku akan manyoho riwut je marusak,[31] ihimon manintu Babel tuntang oloh je melai hete.

²Aku akan manyoho kare oloh bangsa beken je akan marusak Babel kilau riwut manambalang upak gandom. Hong andau calaka te ewen akan manyarang tanah te bara hete-hete tuntang mamparusake sampai jaton je batisa.

³Ela manalua tantarae manintu isin panahe atawa manara pakaian parange. Kare anak tabelae ela manaluae belom. Palomos hapus tantarae!

⁴Ewen akan buah himang hai tuntang matei intu kare jalan lewun ewen.

⁵Aku, TUHAN, Hatalla Je Jaton Tikas Kuasae, Hatallan karasih Israel, dia akan malihi Israel tuntang Yuda, aloh ewen jari badosa dengang-Ku.

⁶Nyalamat arepm! Hadari malihi Babel, ela sampai keton tamput matei awi dosae! Awi jetoh katikae Aku mambaleh kapapan Babel, tuntang mahukum ie tumon gawie.

⁷ Babel bihin kilau sangkir amas je imbing awi-Ku tuntang mawi hapus kalunen babusau. Kare raja mihop anggor bara sangkir te, sampai ewen manjadi gila.

⁸Tapi salenga Babel balongkang balalu pusit. Keleh manangis tagal ie tuntang gau tatamba akan kare himange, ayau ie tau keleh.

⁹ Oloh bangsa beken je melai intu hete hamauh sama arepe, ‘Itah jari mancoba mandohop Babel, tapi jari sayup! Labih bahalap itah malihi lewu toh tuntang buli akan lewun itah. TUHAN jari mahukum Babel dia laluen, tuntang marusake samasinde.’ ”

¹⁰Ungkup TUHAN hamauh, “TUHAN jari mamparahan tahiu itah je puna hong pihak je bujur. Ayo akan Yerusalem tuntang manyarita intu hete taloh je jari ilalus awi TUHAN, Hatallan itah.”

¹¹TUHAN jari mangatau kare raja Media, awi Ie handak marusak Babel. Jete carae Ie mambaleh gawin oloh je marusak human Ayue. Kare perwira pasukan parang marentah, “Asa isin panah! Nyadia talawang.

¹²Tenga tanda akan manyarang kare dinding Babel. Nambah kare oloh jaga. Andak oloh jaga. Batatap akan manawan!” TUHAN jari malalus taloh kahandake dengan oloh Babel.

¹³ Lewu te tatau toto tuntang are sungeie, tapi wayah pambelom akae jari lepah; lawin pambelom ayue jari sampai.

¹⁴TUHAN Je Jaton Tikas Kuasae sumpah tagal bitin Aie kabuat je Ie manyoho oloh sama karee kilau sangkalap akan manyarang Babel, tuntang akan basasurak manang.

¹⁵TUHAN manjapa petak hapan kuasan Aie, manampa kalunen hapan pangatawan Aie tahiu kapintar kaharati tuntang mabirang langit hapan kapintar kaharatin Aie.

¹⁶Baya hapan auh parentah Aie, balalu manggotok danum intu langit.[32] Bara saran kalunen akan saran kalunen Ie mampadumah baunandau, tuntang Ie mawi kilat mamancar intu huang ujan, hayak ingirim Awie riwut barat eka Ie mingkes jete.

¹⁷Awi mite uras taloh te, olon palus katawan, je ie te humong tuntang jaton kaharatie. Kare tukang amas jari mahamen, awi hampatong dewa tampan aie te dia toto tuntang jaton bara pambelom.

¹⁸Kare hampatong dewa te dia barega, patut ihababaka tuntang inatawe. Amon sampai katikae, ewen akan binasa.

¹⁹Hatallan Yakob dia sama kilau kare hampatong dewa te; Ie je manjapa taloh handiai. Aran Ayue iete TUHAN Je Jaton Tikas Kuasae; Ie jari mintih Israel jadi ungkup Ayue.

²⁰TUHAN hamauh, “Babel ikau kilau tukul, pakakas je hapaku baparang. Ikau ihapa-Ku akan mawi kare bangsa tuntang kare karajaan.

²¹Ikau ihapa-Ku mampahancor kuda tuntang oloh je manongkange.

²²Ikau ihapa-Ku mampatei oloh hatue tuntang oloh bawi, bakas tuntang tabela, oloh bawi atawa oloh hatue bujang.

²³Ikau ihapa-Ku mambinasa sakatik tuntang metoe, oloh pamalan tuntang sapie je ihapae maluku, oloh je inenga kuasa tuntang kare perwira gantong.”

²⁴TUHAN hamauh, “Ite kabuat kilen ampie Aku metoh toh mambaleh mawi Babel tuntang kakare oloh je melai hete, tagal kare kapapa je ilalus ewen taharep Yerusalem.

²⁵O Babel, ikau sama kilau bukit je marusak hapus kalunen. Tapi Aku, TUHAN, akan malawan ikau. Ikau akan inunda tuntang inggaling awiku hayak inalua-Ku bakehu jadi kawo.

²⁶Ije kabawak batu mahin jaton bara kare taloh je baderep te ihapan tinai hapa mamangun. Ikau akan jadi sama kilau padang pasir katatahie. Aku, TUHAN, jari hakotak.”

²⁷“O raja bara utara![33] Nenga tanda akan manyarang! Pahiau tarompet uka kare bangsa mahining! Irak kare bangsa akan parang malawan Babel! Nyoho karajaan Ararat, Mini tuntang Askenas manyarang. Angkat ije biti pangkalima uka mamimpin kare pasukan. Irak kare kuda sampai karee kilau agas sangkalap.

²⁸Natap kare bangsa uka parang malawan Babel. Tehau kare raja Media hayak kare oloh je inenga kuasa tuntang kare oloh basewut hayak kare tantara bara kakare lewu je inguasa ewen.

²⁹Kalunen hagerek tuntang hongge awi Aku metoh malalus rencana-Ku akan mawi Babel manjadi eka je keang kemahau je dia ielai awi olon.

³⁰Tantara Babel jari terai parang hayak melai intu kare kota. Ewen nihau kahanyie tuntang jaton kaabase. Kare lawang lewu jari inelak, tuntang kare huma ingehu.

³¹Kare sarohan hadari hasanselo uka mansanan akan raja Babel tahiu lewue je jari inyarang bara hete-hete hakaliling.

³²Eka dimpah jari inguasa musoh, tuntang kare kota eka bakalindong jari inusul. Tantara Babel dia katawan narai taloh je akan iawie.

³³Dia tahi hindai ewen impakalah tuntang impijak-inandik awi musoh kilau oloh mihik gandom intu eka mihik. Aku, TUHAN Je Jaton Tikas Kuasae, Hatallan Israel, jari hakotak.”

³⁴Yerusalem impalomos tuntang lepah kinan awi raja Babel; ie mambuang lewu te kilau oloh mambuang kasa. Kilau ije kongan meto hai, ie manelen Yerusalem tuntang manyuang kanaie dengan uras taloh je bahalap bara lewu te, palus manganan tisae.

³⁵O oloh Sion, keleh hamauh, “Keleh Babel buah kapehe sama kilau je iawie akan itah!” Oloh Yerusalem, keleh hamauh, “Keleh Babel buah kapehe sama kilau je iawie akan itah!”

³⁶Awi te TUHAN hamauh dengan oloh Yerusalem, “Aku akan kalahi akam tuntang mambaleh kare gawin musohm dengam. Kare tahasak danum tuntang kare sungei intu Babel akan impateah-Ku.

³⁷Lewu te akan jadi buring tuntang tuyok derep taloh, eka aso parak kayu manyahokan. Oloh mangkarieng mitee, tuntang jaton ije biti oloh handak melai intu hete.

³⁸Oloh Babel manyakungkong kilau singa, tuntang mangareheng kilau anak singa.

³⁹Metoh ewen paham belaie kuman, Aku akan manatap panginan akan ewen. Aku mawi ewen sampai babusau tuntang pehe takolok sampai tapatiroh, tuntang dia misi-misik tinai.

⁴⁰Ewen akan iimbit awi-Ku uka inyambalih sama kilau anak tabiri, kambing, tuntang tabiri hatue. Aku, TUHAN, jari hakotak.”

⁴¹TUHAN hamauh, “Babel je inara intu hapus kalunen jari irampas tuntang inguasa! Lalehan kapapae lewu te akan kare bangsa.

⁴²Danum tasik mampaleteng Babel; kare galombang hagotok mawi lewu te.

⁴³Kare lewue jadi eka je mangkarieng, kilau padang pasir je keang kamahau. Jaton oloh je handak melai atawa mahalau hete.

⁴⁴Bel, dewa tanah Babel, akan ihukum-Ku. Aku akan manjadian ie uka malian kare taloh je jari irampase. Kare bangsa dia akan manyembah ie tinai. Kare dinding kota ain Babel jari baduroh.

⁴⁵Awi te, dari bara hikau, o ungkup Israel! Nyalamat arepm bara kasangit-Ku je hasep.

⁴⁶Ela mikeh atawa bagisah awi kare auh barita je ihining keton. Genep nyelo aton kabar je hakabeken — kabar tahiu katulas huang lewu tuntang tahiu kare raja je hasarang sama arepe.

⁴⁷Percaya bewei, katikae akan sampai Aku mahukum kare hampatong dewa Babel. Hapus lewu te akan ihina, tuntang hapus oloh je melai intu hete uras impatei.

⁴⁸ Taloh samandiai hong langit tuntang hunjun petak akan basasurak hanjak amon Babel manjato akan lengen bangsa bara utara je dumah akan mamparusake.

⁴⁹ Are oloh intu hapus kalunen jari matei awi Babel, tapi toh Babel akan impakalah tagal oloh Israel je jari impatei. Aku, TUHAN, jari hakotak.”

⁵⁰TUHAN hamauh dengan oloh Israel hong Babel, “Keton jari liwus bara pampatei! Jadi, keleh haguet katika toh kea! Aloh keton kejau bara huma, keleh mingat Aku, TUHAN keton, tuntang dengan Yerusalem.

⁵¹Keton hamauh, ‘Ikei ihina tuntang impahawen; ikei jari jaton bara mata bau awi kare bangsa beken jari melai huang eka barasih huang Human TUHAN.’

⁵²Toh, nyeneh auh-Ku toh. Kareh dumah katikae Aku mahukum kare hampatong dewa Babel. Intu hapus lewu te akan aton auh oloh manarahing awi bahimang hai.

⁵³Aloh Babel tau mandai akan langit tuntang mamangun ekae bakalindong je dia tau inyampai, Aku tetep akan mangirim oloh uka mamparusake. Aku, TUHAN, jari hakotak.”

⁵⁴TUHAN hamauh, “Hining! Intu Babel oloh mangkariak tuntang manangis pehe atei awi karusak lewu te.

⁵⁵Aku metoh marusak Babel tuntang mapatende kare auh karamie. Musoh dumah kilau galombang hagotok tuntang tantarae manyarang dengan kare auh lahap parang.

⁵⁶Ewen dumah akan marusak Babel, manyingkap kare tantarae tuntang mamelek kare pakakas parang ewen. Aku TUHAN, je mahukum kapapa, tuntang Babel akan imbaleh awi-Ku tumon gawie.

⁵⁷Aku kareh mambusau kare pajabat ayun Babel — kare oloh pintar, kare pamimpin tuntang tantara. Ewen akan dia misi-misik tinai, tapatiroh sampai katatahie. Aku jari hakotak; Aku toh raja, Aku TUHAN Je Jaton Tikas Kuasae.

⁵⁸Kota ain lewu Babel je dehen akan impahancor awi-Ku sampai manjadi rata dengan petak. Kare lawange je ganto-gantong akan inusul awi-Ku sampai lepah. Ngahus bewei kaheka kare bangsa, awi uras kare hasil gawin ewen akan lepah kinan apui. Aku, TUHAN Je Jaton Tikas Kuasae, jari hakotak.”

⁵⁹Oloh je manjaga Raja Sedekia iete Seraya anak Neria eson Mahseya. Hong nyelo kaepat metoh raja Sedekia marentah Yuda, Seraya manuntut Sedekia akan Babel. Palus aku manenga akae ije gawi.

⁶⁰Uras calaka je akan buah Babel tuntang taloh beken tahiu lewu te jari inyuratku intu ije buku te.

⁶¹Palus aku hamauh dengan Seraya, “Limbah ikau jari sampai intu Babel, te ikau mambasa uras taloh je inyurat huang buku toh akan kare oloh hong kanih.

⁶²Limbah te keleh ikau balakudoa kalotoh, ‘TUHAN, Ikau jari hamauh, tahiu lewu toh je akan irusak Awim sampai aloh olon aloh meto akan binasa urase. Eka toh sama kilau padang pasir katatahie.’

⁶³ Limbah ikau jari mambasa surat intu buku toh akan kare oloh te, meteng batu intu balon buku toh, palus manting akan bentok Sungei Euprat,

⁶⁴sambil hakotak, ‘Kilau toh akan manjadi dengan Babel. Lewu toh akan leteng tuntang dia lembut tinai awi calaka je iawi TUHAN akae.’ ” Kare auh Yeremia hapus intu hetoh.