Read Ngaju YEREMIA 6 Bible Online

YEREMIA 6 - Ngaju bible

YEREMIA 6

¹Has babungkat keton, o kare oloh Benyamin! Keleh malihi Yerusalem! Pahiau tarompet intu Tekoa, tuntang tokan apui akan tanda intu Bet-Kerem! Kabinasa tuntang calaka hai akan dumah bara utara.

²Lewu Sion bahalap toto, tapi TUHAN akan mampalomose;

³kare oloh panguasa te akan mamangun kemahe intu hete dengan kare tantarae. Hakaliling lewu te ewen akan mampendeng kare kemah ewen, hong kueh je eka karajie.

⁴Ewen akan hamauh, “Tatap arep manyarang Yerusalem! Ayo itah manyarang bentok andau toh!” Tapi limbah te ewen hamauh tinai, “Hakayah, sayup! Andau jari nampara kaput, kare kangkalingen taloh jari nampara panjang.

⁵Keleh itah manyarang hamalem, tuntang marusak kare kotan lewu te.”

⁶TUHAN Je Jaton Tikas Kuasae jari marentah kare oloh je mimbing kuasa te uka maneweng kare batang kayu tuntang mampendeng kare bukit eka manahan mangat mangapong Yerusalem. TUHAN hamauh, “Lewu toh akan ihukumku awi intu huange jari ilalus are toto gawi manindas.

⁷Kilau tahasak danum je harajur mampalua danum katining, tumon te kea lewu te harajur mahasil kapapa. Baya barita tahiu kakaras tuntang rampok bewei je ihining-Ku bara lewu te. Himang tuntang panyakit gitang-Ku hete-hete.

⁸O oloh Yerusalem, keleh kakare kasusah te jadi pampingat akam! Ela sampai Aku malihi ikau tuntang mobah lewum jadi padang pasir je dia ielai oloh.”

⁹TUHAN Je Jaton Tikas Kuasae hamauh dengangku, “Israel akan inggundul sampai lingis kilau kabon anggor je buae jari imutik urase. Tagal te, saraie aton katika, keleh manyalamat je tisae.”

¹⁰Aku tombah, “TUHAN, dengan eweh aku musti hamauh, tuntang eweh je musti iningak awiku? Ewen badungil tuntang dia maku manyeneh. Ewen manatawe tuntang basingi dengan peteh Aim je inyampaiku akan ewen.

¹¹Kasangit Aim dengan ewen buah aku kea, TUHAN! Babehat aku mananggonge.” Palus TUHAN hamauh, “Nusoh kasangit te akan kare anak oloh intu kare jalan hai tuntang akan kare oloh tabela je kanjeran hampumpong. Hatue tuntang bawi akan inawan, tuntang oloh bakas kea dia akan iliwus.

¹² Human ewen akan inenga akan oloh beken, kalote kea kare tana tuntang sawan ewen. Oloh je melai tanah toh akan ihukum-Ku.

¹³Uras ewen hai korik manggau ontong dengan jalan je dia bujur. Nabi tuntang imam haream je omba gawi manipu oloh.

¹⁴ Kare himang ungkup-Ku inirok ewen kilau himang korik bewei. ‘Ceh, dia men ih’ koan ewen, ‘urase bahalap tuntang jaton taloh manderoh’. Padahal samasinde dia.

¹⁵Sapuna ewen mahamen awi jari malalus uras taloh je papa te. Tapi ewen bakapal baue tuntang jaton bara kahawen. Awi te ewen akan halelek kilau oloh beken; tuntang ewen lepah lilap amon Aku mahukum ewen. Aku, TUHAN, jari hakotak.”

¹⁶ TUHAN hamauh dengan kare ungkup Ayue, “Keleh mendeng intu kare simpang jalan, tuntang ite bua-buah! Isek kare jalan je horan, tuntang kueh je paling bahalap bara kare jalan te. Keleh manyak jalan te mangat keton belom sanang.” Tapi ewen hamauh, “Dia, ikei dia handak mahoroi jalan te!”

¹⁷Palus TUHAN raju-rajur mangkat kare oloh jaga je akan mampingat ewen uka mahining tanda auh tarompet. Tapi ungkup hamauh, “Ikei dia mahininge.”

¹⁸Awi te TUHAN hamauh, “Hining, o kare bangsa! Keton musti katawan narai je akan manjadi akan ungkup-Ku.

¹⁹Item, o kalunen! Ungkup-Ku dia handak manarima ajar-Ku tuntang dia manumon auh-Ku. Kilau kajarian kahandak ewen Aku mawi calaka akan ewen.

²⁰Akan en gunae manyan je imbit ewen akang-Ku bara Seba, atawa rarampah bara lewu kejau? Aku dia maku manarima rarampah ewen. Aku dia mangilak kare parapah je ingehu awi ewen.

²¹Aku akan mawi kare oloh te tantarang tuntang balongkang. Bapa tuntang anak, sobat tuntang oloh je hasansila human ewen akan binasa.”

²²TUHAN hamauh, “Ije bangsa je abas teseke dumah bara lewu kejau intu utara. Ewen dumah tantai handak parang.

²³Ewen mimbit panah tuntang lunju; ewen te tulas tuntang jaton kasene asi. Kilau auh gotok tasik, tumon te auh panumah kudan ewen je kanjeran inongkang handak maju manyarang Yerusalem.”

²⁴Mahining barita te oloh Yerusalem palus balemo. Ewen ilambon kikehe, tuntang mangkeme kapehe kilau oloh bawi je handak manak.

²⁵Ewen dia bahanyi mohon akan jalan atawa haguet akan tana, awi intu hete-hete musoh je hapan pakakas parang mampalembut kikeh tuntang katarewen.

²⁶TUHAN hamauh dengan ungkup Ayue, “Kepan tapih kampil tuntang galing arepm hunjun kawo. Keleh manatum tuntang manangis asi-asi kilau oloh manatum pampatei anake je tunggal; awi oloh je mambinasa akan manyarang manyalenga.”

²⁷Palus TUHAN hamauh dengan Yeremia, “Riksa ungkup-Ku kilau ikau mariksa logam. Nantuani gawin ewen!

²⁸Uras ewen oloh parisang je badungil, batekang ateie sama katekange kilau tambaga tuntang sanaman. Ewen mawi kapapa tuntang haguet akan hete-hete uka manyampai barita je mamapa oloh beken.

²⁹Dapur apui jari balasut toto, tapi liken logam dia maku lenyoh tuntang nihau. Ngahus ih ungkup-Ku raju-rajur iriksa uka imparasih, awi kare oloh ayue je papa dia inganan.

³⁰Ewen akan inyewut perak je inganan, awi Aku, TUHAN, jari manganan ewen.”