Read Ngaju YEREMIA 7 Bible Online

YEREMIA 7 - Ngaju bible

YEREMIA 7

¹TUHAN manyoho aku haguet akan Human Ayue tuntang mendeng intu lawang je ihalau awi oloh Yuda je dumah sombayang. Ie manyoho aku mansanan peteh toh akan ewen, “Obah gawin keton tuntang ampin pambelom keton, palus Aku, TUHAN Je Jaton Tikas Kuasae, Hatallan Israel akan manyoho keton tetep melai intu hetoh.

⁴Ela percaya dengan oloh panipu je hamauh, ‘Itah mangat hetoh, jaton je manderoh itah awi jetoh Human TUHAN. Toto jetoh Human TUHAN!’

⁵Obah pambelom keton tuntang ampin gawin keton. Lalus kaadilan sama arep keton.

⁶Ela tinai mahenyek mangapehe oloh beken, anak nule, tuntang kare oloh bawi balo. Ela mampatei oloh je jaton kasalae intu tanah toh. Ela manyembah kare hatalla beken, awi taloh te akan mambinasa keton.

⁷Amon keton mobah ampin pambelom keton tuntang terai malalus kare taloh te, Aku akan manyoho keton tetep melai intu tanah toh je jari inenga-Ku kilau tanah pusaka akan tato hiang keton.

⁸Tapi, toto hayang bewei keton percaya dengan kare auh tanjaro.

⁹Keton manakau, mampatei, habandong, mananjaro, maluput parapah akan Baal, tuntang manyembah kare dewa je dia keton kasenee.

¹⁰Limbah keton jari malalus kare taloh te, keton dumah manaharep Aku intu hetoh intu Humang-Ku kabuat, tuntang hamauh, ‘Ikei mangat jaton je manderoh ikei!’ Limbah te keton manontong gawin keton je papa te?

¹¹ En keton manirok Humang-Ku toh human parampok? Uras gawin keton jari gitang-Ku.

¹² Keleh haguet akan Silo,[3] lewu je bihin jari intih-Ku akan eka sombayang akang-Ku. Tampayah taloh je iawi-Ku akan eka te tagal dosan ungkup-Ku Israel.

¹³Aloh kinjap Aku hakotak dengan keton, keton dia maku manyeneh. Keton malalus kakare dosa te, tuntang dia handak tombah amon Aku mantehau.

¹⁴Humang-Ku je iandal keton, tuntang eka je inenga-Ku akan tato hiang keton tuntang akan keton toh, akan iawi-Ku kilau Silo horan.

¹⁵Keton akan iharak-Ku bara baung-Ku kilau Aku jari maharak tundah kolan keton, ungkup Israel.”

¹⁶TUHAN hamauh, “Yeremia ela balakudoa akan kare oloh toh. Ela balaku dohop atawa balakudoa akan ewen; ela mamaksa Aku, awi Aku dia maku mahining palakun ewen te.

¹⁷Ikau jari mite kabuat taloh je jari ilalus ewen intu kare tanah Yuda tuntang hong kare jalan intu Yerusalem!

¹⁸ Kare anak oloh mamumpong kayu pandok, oloh hatue mantokan apui, tuntang oloh bawi mupet tepong akan hapa mawi wadai akan raja bawi je inggare ewen Ratu Sorga. Tuntang akan mangapehe atei-Ku ewen kea maluput parapah danum anggor akan kare hatalla beken.

¹⁹Tapi sapunae, dia Aku je ingapehe ewen, malengkan arep ewen kabuat sampai ewen mahamen.

²⁰Aku TUHAN Pangkahai, akan manusoh kasangit-Ku je paham mawi huma sombayang toh, mawi olon tuntang meto, tuntang kea mawi batang kayu tuntang hasil petak. Kasangit-Ku akan banyala kilau apui je dia tau belep.”

²¹TUHAN hamauh, “Keton katawan iete parapah je iluput keton intu hunjun mesbeh musti ingehu sampai lepah, tuntang parapah je beken tau keton kumae. Tapi Aku, TUHAN, hamauh, keleh kinan bewei urase!

²²Metoh Aku mimbit tato hiang keton balua bara Misir, Aku dia manenga akan ewen atoran tahiu parapah je ingehu atawa parapah je beken.

²³Aku baya manyoho ewen uka manumon auh-Ku mangat Aku manjadi Hatallan ewen, tuntang ewen jadi ungkup-Ku. Aku manyoho ewen belom manumon kare parentah-Ku mangat ewen sanang.

²⁴Tapi ewen dia maku mahining tuntang dia maku manumon. Ewen manumon kahandak atei ewen kabuat je badungil tuntang papa te. Ewen te dia ie manjadi bahalap tapi manjadi labih papa haream.

²⁵Bara katika tato hiang keton balua bara Misir sampai andau toh Aku harajur manyoho kare rewar-Ku, kare nabi, manalih keton.

²⁶Tapi jaton ije oloh je mahining atawa padulie. Tapi keton jadi labih papa haream tuntang darhaka bara tato hiang keton.”

²⁷Limbah te TUHAN hamauh, “Tagal te, o Yeremia, aloh ikau mansanan urase taloh te akan ungkup-Ku, ewen dia akan manumon kare auhm. Aloh ikau mantehau ewen, ewen dia akan tombah.

²⁸Jadi, suman ih akan ewen tahiu ewen je ije bangsa je dia maku manumon auh-Ku, TUHAN, Hatallan ewen. Ewen dia maku bajar bara hukuman je jari ingkemee. Kaketep ewen dengang-Ku jari lilap, dia puji inahiu tinai.”

²⁹TUHAN hamauh, “O oloh je melai Yerusalem, keleh manatum! Keleh netek balaum palus nganan! Keleh manyanyi auh lagun tatum intu hunjun kare tantan bukit, awi Aku, TUHAN, kanjeran sangit tuntang jari dia marajin kakare keton.

³⁰Oloh Yuda jari malalus kapapa. Kare dewan ewen je eka kasingi-Ku te jari ingkes ewen intu Humang-Ku, balalu mamapa humang-Ku.

³¹ Ije mesbeh je bagare Topet jari impendeng ewen intu Janah Hinom eka maluput kare anak ewen kilau parapah je ingehu. Padahal Aku dia puji manyoho ewen malalus taloh te, tuntang taloh je kilau te mahin dia puji lembut intu tirok-Ku.

³²Tagal te, akan dumah katikae eka te dia akan inyewut tinai Topet atawa janah Hinom, malengkan Janah Pampatei. Petak te akan jadi petak eka mangubur awi jaton eka je beken.

³³Kare hantun ewen akan jadi panginan burong tuntang meto basiak, jaton je mangguleie.

³⁴ Tanah toh akan jadi petak keang kamahau. Auh kahanjak tuntang auh pesta kawin impaterai-Ku intu kare lewun Yuda tuntang hong kare jalan intu Yerusalem.