Read Ngaju YEREMIA 8 Bible Online

YEREMIA 8 - Ngaju bible

YEREMIA 8

¹Hong katika te kare tulang ain kare raja tuntang kare pejabat je marentah hong Yuda, tuntang kea kare tulang ain kare imam, nabi tuntang oloh Yerusalem je beken akan impalua bara kubur ewen,

²dia akan imumpong tuntang ingubur tinai, malengkan inalua intu petak kilau rotik. Kare tulang ain kare oloh te akan hakalampah intu taharep matanandau, bulan tuntang kare bintang je inyembah, inyinta, inempo, impahai, intehau awi ewen.

³Palus kare oloh je magon belom bara bangsa je papa toh jari inaburan awi-Ku akan hete-hete akan labih rajin matei bara belom. Aku, TUHAN Je Jaton Tikas Kuasae jari hakotak.”

⁴TUHAN manyoho aku mansanan kalotoh akan ungkup Ayue, “Amon oloh lawo, batantu ie akan hingkat tinai; tuntang amon oloh layang hong jalan, batantu ie akan haluli.

⁵Tapi mbuhen keton ungkup-Ku jua-juan mahiwang tuntang malihi Aku! Keton harap toto dengan dewan keton, tuntang dia maku haluli talih Aku!

⁶Aku jari manyeneh bua-buah, tapi keton dia hakotak tumon kapatute. Jaton ije bara keton je manyasal dengan gawie je papa. Jaton ije je hamauh, ‘Narai kasalangku?’ Uras keton manumon jalan keton kabuat kilau kuda hadari handak parang.

⁷Kare burong bangau katawan katikae akan haluli; burong kuku, kalialang tuntang kajajau kea katawan katikae akan bindah ekae. Tapi keton, ungkup-Ku dia kasene kare parentah je inenga-Ku akan keton.

⁸Bahanyi toto keton hamauh manyewut arep keton pintar, tuntang katawan kare parentah-Ku! Coba ite kilen ampie kare parentah te iobah awi kare guru agaman keton je dia bujur!

⁹Kare oloh pintar intu bentok keton akan impahawen. Ewen akan bembang tuntang imunga. Ewen dia maku manarima nasehat-Ku; toh, kapintar kaharati en je magon aton intu ewen?

¹⁰ Awi te Aku akan manenga tanan ewen akan oloh pamalan je beken, tuntang sawan ewen akan oloh beken. Uras ewen, hai korik, manggau kaontong dengan jalan je dia bujur. Sampai nabi tuntang imam mahin manipu oloh.

¹¹ Kare himang intu ungkup-Ku itong ewen kilau himang je korik bewei. ‘Dia men,’ koan ewen, ‘uras bahalap tuntang jaton je manderoh.’ Padahal samasinde dia.

¹²O ungkup-Ku, sapunae keton mahamen awi jari malalus uras kare taloh je papa te! Tapi keton bakapal bau tuntang dia bara kahawen. Awi te keton akan balawo kilau oloh beken je jari halelek; tuntang keton lepah lilap amon Aku mahukum keton.

¹³Handak toto Aku mamumpong ungkup-Ku kilau oloh mamumpong hasil petake. Tapi, ungkup-Ku sama kilau batang anggor tuntang sikon je dia mamua, je kare dawee mahin jari balayu. Awi te Aku jari manyoho oloh bangsa beken dumah tuntang manguasa lewun ewen. Aku, TUHAN jari hakotak.”

¹⁴“Mbuhen itah dia malalus taloh en-en?” koan ungkup Hatalla. “Ayo itah haya-hayak akan kare lewu je hakota nauhe itah matei intu hete. TUHAN, Hatallan itah jari manukas tahiu itah je musti binasa. Ie jari manenga akan itah pulih akan ihop, awi itah badosa intu Ie.

¹⁵Hayang bewei itah maharap kasanang tuntang wayah imparigas, awi je aton baya taloh je mampikeh tuntang manarewen.

¹⁶Musoh jari aton intu lewu Dan; auh kudan ewen jari sampai, tuntang hapus tanah uras mikeh. Musoh dumah akan mamparusak hapus lewun itah, kare lewun itah tuntang uras oloh je melai hete.”

¹⁷“Item!” koan TUHAN, “Toh Aku manyoho kare handipe akan bentok keton uka manotok keton, handipe tada je dia olih inawar hapan basan kaji.”

¹⁸Ateiku angat ihiris kapehe paham, kapehen ateiku dia tara tatamba.

¹⁹Hining! Intu hapus lewu tarahining kariak tangis bangsa ayungku je misek, “En TUHAN jadi dia melai Sion tinai? Intu kueh rajae katika toh?” TUHAN tombah, rajan ewen, “Mbuhen ikau sontop manyembah kare dewa je samasinde jaton baguna? Mbuhen ikau mangapehe atei-Ku awim manyembah kare hampatong dewa?”

²⁰Ungkup Israel hamauh, “Wayah getem tuntang wayah pandang toh jari mahalau, tapi itah hindai kea salamat.”

²¹Ateiku lenyoh bangsa ayungku haban paham; aku manatum tuntang balisah.

²²Narai kea taloh je mawi buku bangsa ayungku sampai toh hindai keleh? En hapus Gilead[4] jaton dokter atawa tatamba?