Read Ngaju YEREMIA 9 Bible Online

YEREMIA 9 - Ngaju bible

YEREMIA 9

¹Bahalap toto jaka takolokku sama kilau kalin danum je kontep danum, tuntang matangku sama kilau pancoran je harajur mahasor. Maka aku olih manangis handau hamalem manatum kare oloh bangsa ayungku je impatei musoh.

²Jaka hong padang pasir tau aku sondau aton podok eka oloh je halisang tau baramalem! Maka aku akan malihi bangsa ayungku tuntang hadari akan kanih, akan mangejau arepku bara ewen. Ewen oloh je darhaka urase kare kawan oloh je dia baketep,

³tuntang harajur sadia uka mananjaro. Intu hapus tanah, kabujur jaton kuasae, tapi taloh je dia bujur lembut intu hete-hete. TUHAN hamauh, “Ungkup-Ku jaton tera-terai malalus kapapa, ewen dia mangaku Aku kilau Hatallan ewen.”

⁴Taharep sobat, genep biti patut rende-rendeng tuntang pahari ije kalambutan kea dia olih imercaya. Awi, kilau Yakob kalote kea ewen, genep bitie manipu paharie. Genep oloh je mananjong akan hete-hete uka mangabar auh je mamapa tuntang auh tanjaro.

⁵Ewen uras hatipu sama arepe, jaton je hakotak bujur. Nyamae jari patuh mananjaro, ewen dia olih malihi dosa. Katulas baka katulas bewe-bewei, tipu baka tipu bewe-bewei raju-rajur ilalus ewen; ewen samasinde dia marajin TUHAN.

⁷Tagal te TUHAN Je Jaton Tikas Kuasae hamauh, “Aku mauji ungkup-Ku kilau mauji logam mangat ewen manjadi tinduh. Narai tinai je tau ilalus-Ku dengan ungkup-Ku je jari mawi kapapa?

⁸Kare kotak ewen paham bahaya, olih mampatei kilau panah bawisa. Kare pander ewen tanjaro samasinde. Kare auh ewen mampipen, tapi katotoe ewen mamasang jarat.

⁹Aku dia tau dia manenga hukuman ije patut akan bangsa je kilau toh. Kareh Aku mambaleh gawin ewen; Aku, TUHAN jari hakotak!”

¹⁰Aku, Yeremia, hamauh, “Aku handak manangis tuntang manatum awi kare padang oru intu padang pasir tuntang intu kare bukit gantong jari keang kamahau tuntang dia ihalau oloh. Auh kawan meto jaton tarahining tinai, kare burong tuntang meto beken jari hadari tuntang lilap.”

¹¹TUHAN hamauh, “Yerusalem akan iawi-Ku jadi tisan duroh derep taloh eka kare aso parak kayu manyahokan. Kare lewun Yuda akan manjadi benyem languen, eka je dia ielai tinai.”

¹²Aku misek, “TUHAN, mbuhen Ikau manalua tanah toh keang kamahau sama kilau padang pasir sampai jaton oloh je mahalaue? En aton oloh je sukop kapintare uka maharati uras taloh toh? Akan eweh Ikau jari puji manarange mangat ie olih manyampaie akan oloh beken tinai?”

¹³TUHAN tombah, “Jete manjadi awi ungkup-Ku dia tinai manumon kare ajar je inenga-Ku akan ewen. Ewen dia manumon auh-Ku, tuntang dia handak malalus parentah-Ku.

¹⁴Ewen badungil tuntang manyembah kare hampatong dewa Baal sama kilau je iajar awi tato hiang ewen.

¹⁵Awi te ite taloh je kareh ilalus awi-Ku, TUHAN Je Jaton Tikas Kuasae, Hatallan Israel: ungkup-Ku akan inenga-Ku taloh imbul je bapait akan indu kinan tuntang pulih akan indu ihop.

¹⁶Ewen akan inyarah awi-Ku akan marak kare bangsa je dia ewen kasenee tuntang dia kea ingasene awi tato hiang ewen. Aku akan raju-rajur mangirim tantara manyarang ewen sampai Aku mambinasa ewen samasinde.”

¹⁷TUHAN Je Jaton Tikas Kuasae hamauh dengan ungkup Ayue, “Ite taloh je metoh manjadi intu tanah toh, tuntang jeleng tehau kare oloh je manatum. Nyoho ewen dumah tuntang manyanyi auh tatum.”

¹⁸Oloh Yuda hamauh, “Soho ewen bajeleng manyanyi auh tatum akan itah samandiai, uka mahasor danum mate mambisa pipin itah.”

¹⁹Intu Sion tarahining auh tangis, “Itah binasa tuntang paham impahawen. Tanah itah toh keleh ilihi awi itah, kare human itah jari lepah baderep karak-karake.”

²⁰Aku hamauh, “Hining auh TUHAN, o keton kakare oloh bawi! Ajar akan kare anakm je bawi nyanyin tatum, akan kare sobatm auh kapehen atei.

²¹Pampatei jari tame mahalau baun sengok, jari tame akan huang istana; ie manangkarap anak oloh intu jalan tuntang oloh tabela intu alun-alun.

²²Hantu hakalampah intu hete-hete kilau rotik intu hunjun petak; kilau gandom je jari inggetem balalu ilihi tuntang dia imumpong tinai. Jete peteh TUHAN je musti ikau mambaritae.”

²³TUHAN hamauh, “Oloh pintar harati dia tau mampatamam arepe awi kapintar karatie, kalote kea oloh abas awi kaabase tuntang oloh tatau awi panataue.

²⁴ Ewen je handak tamam tahiu taloh narai bewei ie patut labih helo mangkeme tamam, awi ie harati tuntang tau mangasene Aku; iete katawan tahiu Aku je sinta tuntang pamasi sampai katatahie tuntang Aku mandehen parentah tuntang kabujur hong kalunen. Uras taloh handiai te manyanang atei-Ku. Aku, TUHAN, jari mansanan te.”

²⁵TUHAN hamauh, “Akan sampai katikae aku mahukum oloh Misir, Yuda, Edom, Amon, Moab tuntang oloh je melai padang pasir je balaue inetek pandak.[5] Ewen uras inyunat kilau oloh Israel, tapi aloh ewen atawa kea oloh bangsa Israel malalus gawie kilau kare oloh je dia inyunat, awi ewen dia mahaga janji je inanda awi sunat te.”