Read Ngaju TATUM 2 Bible Online

TATUM 2 - Ngaju bible

TATUM 2

¹TUHAN malalus gawin kasangit Aie, Sion inyangkulep Awie dengan kakaput! Katinduh-kahain Israel je kagantong langit, jari injakah Awie akan petak. Hong katika TUHAN sangit, human Ayue hong Sion mahin dia Ie padulie.

²Genep padang oru intu tanah Yuda, impahancor Awie tuntang jaton angat asi. Hong kasangit Aie Ie manelak sampai baduroh kare kota je mangalindong lewu te. Karajaan te tuntang kare pamimpin aie, impanjato Awie sampai manjadi eka kajilek.

³Hong kasangit Ayue je hasep, Ie manganan hapus kaabas Israel. Metoh itah inyarang awi musoh, Ie bakulas manenga pandohop. Sama kilau apui je mamok tuntang mangeho taloh samandiai, kalote TUHAN balait dengan itah handiai.

⁴Sama kilau musoh, Ie mangancang panah Ayue, tuntang manintu panah te akan itah. Uras oloh je manyanang atei itah, lepah impatei Awie. Ie manyambur kasangit Aie sama kilau apui akan huang lewu Yerusalem toh.

⁵TUHAN jadi sama kilau musoh; ie mamukul Israel sampai baduroh. Ie jari marusak uras kota tuntang istana, Ie mawi auh tangis tuntang tatum akan oloh hapus tanah Yuda.

⁶Ie marusak human Aie eka ungkup Ayue hapumpong akan manyembah Ie. Ie mawi oloh kalapean andau Sabat tuntang kare andau hai. Awi TUHAN sangit paham, imam tuntang raja jari inolak Awie.

⁷TUHAN manolak mesbeh Ayue je barasih tuntang malihi Human Ayue kabuat; Ie manalua musoh manderep kare dinding kotae. Intu eka itah bihin sombayang tuntang pesta, musoh basasurak awi kamanange.

⁸TUHAN manukas kare dinding lewu Sion induroh. Kare dinding te jari iukur Awie, mangat olih impahancor Awie. Kare dinding tuntang candie, uras jadi tisan derep taloh.

⁹Kare lawange takawok petak, uras kare huite bapelek, raja tuntang kare pagawai uras intu eka tawanan. Parentah TUHAN dia hindai iajar; nabi jari jaton tarima paite bara TUHAN.

¹⁰Kare oloh bakas lewu mondok suni intu petak; ewen mambuwor kawo hunjun takoloke tuntang mahapan pakaian bara benang kampil tanda pehe atei. Kare oloh bawi tabela mahin manyontop takoloke sampai petak.

¹¹Matangku kembang awi harajur manangis, hambaruangku mangkeme kapehe jaton tarasanan. Ateiku hancor mite ampin kaduroh bangsa; mite anak oloh tuntang kare anak awau tujah intu kare jalan kota.

¹²Marak kauyuhe ewen manangis, balaku taloh kinan tuntang taloh ihop dengan indue. Sama kilau oloh bahimang ewen balongkang intu kare jalan, balalu mahutos intu pangkuan indue.

¹³O Yerusalem, lewu Sion je inyinta, ampin duroh derep lewum kahain tasik je lombah. Narai taloh je tau aku manyewute uka manenga ampong? Sabab, dia puji oloh je buah kapehe sama kilau ikau. Toto haliai dia aton je olih mahalalian ampin bitim.

¹⁴Kare taloh je inyampai kare nabi akam, baya tipu tuntang tanjaro bewei. Ewen dia puji mamparahan dosam, awi te ikau dia puji hobah malihi dosa. Kabalikae ewen baya mansanan akam kare auh tanjaro je mampasanang.

¹⁵Uras oloh je mahalau manawah ikau, awi ikau jadi hancor samasinde. Ewen manggiling takoloke tuntang hamauh, “En jete lewu je pangkahalape, lewu eka katamam kalunen?”

¹⁶Uras musohm manampayah baum dengan kasingi; ewen manatawe ikau tuntang mangingi. Ewen hamauh, “Lewu te jari impalomos ikei! Kajariae sampai kea katikae je jari tahi inunggu ikei!”

¹⁷TUHAN jari malalus ancaman Aie je bihin irencana Awie tuntang impingat Awie akan itah. Itah imparotek Awie dengan jaton asi, musoh inenga kamanang. Ie mampahanjak ewen mite kakalah itah.

¹⁸O kare dinding Yerusalem, keleh mantehau TUHAN! Pahasor danum mata sama kilau danum sungei mahasor handau hamalem. Keleh tarus manangis, ela tende sampai bitim heka!

¹⁹Keleh misik lula-luli hapus alem uka mangkariak mansanan kanahuang ataeim akan TUHAN. Lako mangat Ie masi kare anakm je balau tuntang tujah hong genep puting jalan.

²⁰TUHAN, ite ewen je ingapehe Awim te! En aton je puji Ikau mawie kalote? Indu oloh kuman anake je inyinta, imam tuntang kare nabi impatei huang Human Ayum je barasih.

²¹Bakas tabela matei bara lantong intu jalan, oloh hatue-bawi tabela matei awi padang. Hong andau kasangit Aim, Ikau manyambalih ewen tuntang jaton angat kapasim.

²²Ikau marawei kare musoh je paham ingikeh awi ikei akan mawi pesta kadarhaka hakaliling ikei. Ewen mampatei uras je ihaga tuntang inyayang ikei. Hong andau kasangit Aim jaton je tau hadari.