Read Ngaju TATUM 3 Bible Online

TATUM 3 - Ngaju bible

TATUM 3

¹Aku oloh je jari mangkeme kasusah, awi buah kasangit Hatalla.

²Sasar kejau aku iihir Awie akan huang eka je kaput pijem.

³Aku kinjap imukul pire-pire tingkat, jaton asi hapus andau.

⁴Ie mawi bitingku bahimang hai, tuntang kare tulangku bapelek.

⁵Ie manyangkulep aku hapan kapehe.

⁶Aku imaksa Awie melai hong kakaput sama kilau oloh je matei intu jaman je jari halau.

⁷Dengan pasung je dehen Ie mameteng aku sampai aku dia tau balua.

⁸Aku mangkariak balaku awat, tapi Hatalla dia maku mahininge.

⁹Ie mangampeng jalangku dengan kare dinding batu.

¹⁰Sama kilau bahuang ie manunggu, sama kilau singa ie mimpa aku.

¹¹Ie manggoang aku sampai mahiwang bara jalan, palus aku imisak-minit tuntang ilihi.

¹²Ie mangancang panah Aie, tuntang aku jadi tintun panah te.

¹³Panah te manembus bitingku, sampai manusok jantungku.

¹⁴Hapus andau aku inatawe awi uras oloh tuntang iawi indu kotok tahiu.

¹⁵Baya kapait je inenga akangku akan panginan tuntang taloh ihopku.

¹⁶Baungku iudar Awie hong petak, kasingangku ihantok intu batu sampai bapelek.

¹⁷Jari tahi aku dia mangkeme kasanang; jari kalapeangku kilen angat kahanjak.

¹⁸Aku jari dia basewut tinai, nihau kaharapku dengan TUHAN.

¹⁹Manirok panamuei tuntang kasialku sama kilau kuman pulih je bapait.

²⁰Raju-rajur taloh te inirokku, sampai pehe huangku.

²¹Aloh kalote kaharapku haluli aton, metoh aku mingat taloh toh:

²²Asin TUHAN katatahie sintan Ayue dia puji lepah,

²³harajur taheta sining hanjewo toto, TUHAN baketep!

²⁴Panatau aingku baya tikas TUHAN bewei. Awi te aku harap dengae.

²⁵TUHAN bahalap dengan oloh je harap intu Ie, tuntang dengan oloh je manggau Ie.

²⁶Awi te, keleh itah nahuang mentai sampai TUHAN dumah mandohop;

²⁷keleh itah bajar jadi oloh je tahan uji bara metoh itah tabela.

²⁸Metoh TUHAN manenga kajake, keleh itah mondok manyuni arep kabuat.

²⁹Keleh itah mamparandah arep tuntang manyarah, mikeh kaharap magon aton.

³⁰Aloh inampar tuntang imapa, keleh taloh handiai te itah manarimae.

³¹Sabab, TUHAN dia akan manolak itah katatahie.

³²Limbah Ie manenga kapehe Ie palus masi, awi Ie tetep sinta itah dengan asi je jaton tikase.

³³Ie dia dengan kahias ateie manalua itah buah kajake tuntang pehe atei.

³⁴Amon angat paham kaseke huang itah huang tahanan,

³⁵amon itah nihau hak je inenga TUHAN,

³⁶awi kaadilan inambalik, batantu TUHAN mangatawae tuntang mitee.

³⁷Amon TUHAN dia nahuang taloh en-en, batantu olon dia olih mawi en-en kea akan taloh te.

³⁸Taloh bahalap tuntang papa ilalus baya tumon parentah TUHAN.

³⁹Mbuhen oloh balalu bakotok amon ie ihukum awi kare dosae? [2]

⁴⁰Keleh itah mariksa pambelom itah, tuntang mules haluli manempo TUHAN, Hatalla hong sorga. Keleh itah muap atei tuntang balakudoa,

⁴¹

⁴²“Ikei badosa tuntang malekak arep ikei bara Ikau o TUHAN, tuntang Ikau dia manenga ampun.

⁴³Ikei inggoang tuntang impatei Awim, asin Aim basahokan huang kasangit Aim.

⁴⁴Kasangit Aim sama kilau baun andau je bakapal toto sampai dia olih inembus awi kare lakudoan ikei.

⁴⁵Ikei jari Awim kilau rotik hong matan oloh hapus kalunen.

⁴⁶Ikei inawah awi uras kare musoh ikei tuntang inatawe;

⁴⁷ikei buah calaka tuntang kabinasa, hayak belom huang bahaya tuntang kikeh.

⁴⁸Danum matangku mahasor kilau sungei awi bangsa ayung-Ku jari impakalah.

⁴⁹Aku akan manangis raju-rajur,

⁵⁰sampai ikau, o TUHAN hong sorga manantuani ikei.

⁵¹Ateiku kapehe mite kajarian kare oloh bawi hong lewun ikei.

⁵²Sama kilau burong aku inggoang musoh je jaton bara bukue manyingi aku.

⁵³Akan huang kalin danum je keang ewen manjakah aku belo-belom palus manimbok aku hapan batu.

⁵⁴Danum mandai sampai takolokku, tuntang aku manirok — ‘Lepah jari umurku!’

⁵⁵O TUHAN, aku mantehau Ikau, bara palempang kalin danum te.

⁵⁶Aku balaku toto-toto ela matep pinding Aim bara auh lakungku, uka Ikau mawat aku. Palus lakudoangku ihining Awim, tuntang Ikau dumah manokep, Ikau hamauh, ‘Ela mikeh.’

⁵⁷

⁵⁸Ikau dumah mampamanang perkarangku, o TUHAN, hambaruangku jari inyalamat Awim.

⁵⁹Ikau mite kapapa je ilalus akangku, rencana papa ain musoh je basingi dengangku. Awi te, o TUHAN, pamanang perkarangku.

⁶⁰

⁶¹Ikau, TUHAN, mahining aku inawah; Ikau katawan uras rencana ain ewen.

⁶²Ewen manahiu aku hapus andau. Akan mawi aku, ewen malalus rencana je papa.

⁶³Bara hanjewu sampai hamalem aku ihababaka.

⁶⁴Hukum ewen, tumon gawin ewen, o TUHAN.

⁶⁵Nyapa ewen, keleh ewen melai hong angat kaharap je bageto.

⁶⁶Goang tuntang keleh mambinasa ewen sampai ewen lepah lingis bara kalunen.”