Read Ngaju TATUM 4 Bible Online

TATUM 4 - Ngaju bible

TATUM 4

¹Amas je malinyau manjadi kawus kare batun Human Hatalla hakalampah intu jalan.

²Bihin kare anak tabela lewu Sion sama kilau amas je barega, tapi toh iawi sama kilau balanai bara petak.

³Indu sarigala mahin mampatuso anake, tapi ungkup ayungku lalau karaskilau burong onta intu janah.

⁴Kare awau dia impatuso, sampai matei awi teah belai. Kare anak oloh balaku panginan, tapi jaton je manenga.

⁵Ewen je patuh mangkeme panginan je manga-mangat, tuntang belom hong kasanang, toh mangkawang manggau panginan hong tuyok rotik, tuntang matei balau intu kare jalan.

⁶ Ungkup ayung-Ku jari ihukum labih babehat bara oloh Sodom je hong ije kapijep mate ramok awi lengen Hatalla dia awi lengen olon.

⁷Bihin kare pamimpin ikei tinduh sama kilau kapas je baputi lentah. Ewen tagap tuntang abas tuntang barigas toto.

⁸Tapi toh baun ewen labih babilem bara sale,[3] bara lantung intu kare jalan hayak jaton je tau mangasene ewen. Upak ewen kambareut hong kare tulang sama kilau kayu je keang.

⁹Ewen kapehe tuntang matei rangka-rangkah, awi samasinde jaton panginan; je matei intu eka parang, labih untung bara matei balau.

¹⁰ Paham hai calaka te je mawi ungkup ayung-Ku sampai kare indu je balemo atei malontoh anake kabuat akan suang kanaie.

¹¹TUHAN manusoh kasangit Aie tuntang manusul lewu Sion sampai rata dengan petak.

¹²Marak kare raja tuntang oloh hong kalunen jaton je percaya je kare lawang Yerusalem tau iname musoh.

¹³Tapi taloh je manjadi, awi dosan kare imam tuntang nabi. Ewen jari manusoh daha, bara oloh je dia sala.

¹⁴Kilau oloh babute manamuei intu kare jalan kalote kare pamimpin lewu Yerusalem. Pakaian ewen papa awi daha sampai jaton je maku manigong ewen.

¹⁵Oloh hamauh, “Dari bara hetoh! Keton oloh pali ela mimbing ikei!” Ewen palus haguet tuntang manamuei marak kare bangsa, tapi dia inyoho manetep awi eweh bewei.

¹⁶TUHAN dia tinai manantuani ungkup Ayue; Ie kabuat je mamisah-darai ewen, tuntang mawi kare imam dia tinai irega; kare pamimpin jaton je masi.

¹⁷Matan ikei jari heka manampayah, mentai pandohop je dia duma-dumah. Ikei maharap pandohop ije bangsa, je katotoe puna dia tau manenga taloh en-en.

¹⁸Ikei dia tau balua akan jalan, awi harajur impa musoh. Lawin pambelom ikei sasar tokep, awi kare andau ikei jadi genep.

¹⁹Kare oloh je manggoang ikei balias haliai kejau labih balias bara burong nasar. Ewen manggoang ikei intu bukit, tuntang mimpa ikei intu padang pasir.

²⁰Ewen manawan raja paintih TUHAN, oloh je inamam ikei kilau je manenga pambelom tuntang je mangalindong bara musoh.

²¹O bangsa Edom tuntang Us, keleh tatawe, keleh hanjak, katahin magon tau! Calaka kareh dumah kea akam tuntang awi babusau ikau akan mampalowai arepm.

²²Sion jari mananggong hukumae awi kare dosa je jari iawie; toh ikei dia akan inalua TUHAN tuntang dia tinai imbit akan eka tawanan. Tapi ikau, o Edom, akan ihukum TUHAN. Kare dosam akan imparahan.