Read Ngaju TATUM 5 Bible Online

TATUM 5 - Ngaju bible

TATUM 5

¹Ingat, o TUHAN, taloh je manjadi buah ikei. Tampayah ikei, tuntang ite kabinasan ikei.

²Ramo warisan ikei manjato akan oloh beken, kare human ikei ielai awi oloh bangsa beken.

³Bapa ikei jari impatei musoh; toh indu ikei balo, tuntang ikei nule.

⁴Danum ihop tuntang pandok kayu imili ikei!

⁵Sama kilau meto, ikei imaksa bagawi babehat, ikei heka, tapi diainenga katika malayan kaheka.

⁶Ikei haguet balaku sadakah intu Misir, ikei balaku panginan intu Asur.

⁷Tato hiang ikei badosa, toh ewen jari jaton; tapi ikei je buah kapehe, awi kare dosan ewen.

⁸Ikei irentah awi kare oloh je dia labih bara rewar; jaton je kuasa malapas ikei bara ewen.

⁹Intu ruar lewu, pamuno tetep tayap; tahaseng ikei harajur iancam metoh manggau panginan.

¹⁰Ikei buah lau, sampai upak bitin ikei marandang kilau parapen.

¹¹Kare bawin Sion irayap, kare oloh bawi bujang irayap intu kare kampong Yuda.

¹²Kare pamimpin ikei inyingkap tuntang inggantong, kare oloh bakas ikei dia tinai ihormat.

¹³Kare oloh hatue tabela ain ikei imaksa bagawi intu eka manggiling, kare anak hatue penyet kayu pikul sampai tujah.

¹⁴Oloh baka-bakas dia tinai hapumpong intu lawang kota, musik jaton tinai tarahining marak kare oloh tabela.

¹⁵Ikei jari nihau kasanang; tandak jari hobah jadi tatum.

¹⁶Angat katamam ikei jari jaton, ikei calaka awi jari badosa.

¹⁷Bukit Sion benyem tuntang ilihi; bara kanih aso parak kayu hapampayap. Awi te atei ikei balisah, ikei manangis sampai tampayah matan ikei kawus.

¹⁹Tapi Ikau, o TUHAN, tetep kuasa, Ikau marentah sampai katatahie.

²⁰En puna Ikau malihi ikei kalote katahie? En Ikau puna mangalapean ikei sampai katatahie?

²¹O TUHAN, imbit ikei mules haluli omba Ikau; ikei akan haluli manempo Ikau. Halalian pambelom ikei sama kilau bihin.

²²Atawa jari inganan Awim ikei toh samasinde? En dia bara tikas kasangit Aim dengan ikei?