Read Ngaju ESEKHIEL 1 Bible Online

ESEKHIEL 1 - Ngaju bible

ESEKHIEL 1

¹ Hong tanggal lime bulan epat hong nyelo katelo puluh,[1] hong nyelo kalime bara katika Raja Yoyakin iunda akan eka tawanan, aku, Imam Esekhiel anak Busi, aton hong saran Sungei Kebar intu Babel hayak kare oloh tawanan Yehudi je beken. Salenga langit habangah tuntang aku mandino paite tahiu Hatalla. Aku mahining TUHAN hakotak dengang-Ku tuntang aku mangkeme kahain kuasan Aie.

⁴Aku mananggera tuntang mite riwut barat dumah bara utara. Kilat hatuntong manyambar bara ije butop baunandau je hai toto, sampai langit hakalilinge balawa toto. Huang kilat je mamancar te gitan taloh je malinyau kilau tambaga.

⁵ Intu bentok baunandau te aton gitan epat kerub,[2] iete taloh belom je kilau olon,

⁶tapi genep bitie aton epat baue tuntang due kapasang palapas.

⁷Paie bujur malinyau kilau tambaga je inggosok. Tunjok paie hasilo kilau silon banting.

⁸Beken bara epat bau tuntang due pasang palapas te, ain ewen aton lengen olon intu penda genep palapase.

⁹Ije kapasang palapas bara genep taloh belom te hambirang, tuntang kare lawie hatigong dengan palapas taloh belom je beken, palus epat taloh belom te mawi sagi epat. Amon miar, gagenep ewen miar bujur akan baun dia usah mules bitie.

¹⁰ Genep taloh belom te aton epat bau je hakabeken; baun olon intu hila baun, baun singa intu hila gantaue, baun banting intu hila sambil, tuntang baun burong nasar intu hila likut.

¹¹Ije kapasang palapas[3] bara genep taloh belom te imbirang akan hunjun sampai manigong lawin kare palapas taloh belom intu silae, tuntang ije kapasang palapase tinai talipet manutup bitie.

¹²Genep taloh belom te hayak sinde taharep epat tintun baue, sampai ewen tau haguet akan kueh bewei je ingilake tuntang dia mules bitie.

¹³ Intu bentok[4] kare taloh belom te aton taloh je ampie kilau barah apui atawa sahewan je hanyala harajur gue-guet jaton tera-terai. Apui te nyalae hasangkowong tuntang bara hete balua nyaho kilat.

¹⁴Kare taloh belom te miar kanih kate balias kilau kilat.

¹⁵ Metoh aku manampayah kakare taloh te, gitangku epat roda intu hunjun petak, ije roda intu balikat genep taloh belom te.[5]

¹⁶Kaepat roda te sama tampae tuntang mangilat kilau batu pirus, tuntang gagenep roda te aton tinai roda je beken je hamparang intu bentoke.

¹⁷Kalote maka kare roda te tau manintu akan epat tintue.

¹⁸ Kare lingkar roda te kontep dengan mate.[6]

¹⁹Kare taloh belom te haguet akan kueh bewei ewen handak, tuntang kare roda te harajur omba, basa inguasa awi kare taloh belom te. Gagenep katika kare taloh belom te miar mandai akan hunjun atawa tende, kare roda te harajur omba hayak ewen.

²² Intu hunjun takolok kare taloh belom te aton taloh je kilau kubah bara hablur je hagining.

²³Intu penda taloh je kilau kubah te genep taloh belom te mambirang ije kapasang palapase akan hila taloh belom je intu balikate, tinai palapas je ije kapasang beken manutup bitie.

²⁴ Amon ewen tarawang, aku mahining auh kipak palapase; auhe sama kilau gohop dehes danum intu riam, kilau badap tanjong pasukan tantara je hai, sama kilau kahain auh Hatalla Je Jaton Tikas Kuasae. Amon ewen tende tarawang, ewen malipet kare palapase.

²⁵Tapi bara hunjun taloh je kilau kubah je hunjun takolok ewen, magon aton tarahining auh je mahiau.

²⁶ Intu hunjun taloh je kilau kubah te aton taloh je kilau padadusan bara batu nilam, tuntang intu hunjue aton mondok taloh je ampie sama kilau olon.

²⁷ Hila hunjue gitan kalawa manyingah sama kilau tambaga intu bentok nyalan apui. Hila pendae kalawa manyingah balawa toto,

²⁸tuntang kilau ampin liu. Jete kalawa je manyingah je mamparahan pandumah TUHAN. Mite taloh te, aku balawo mahingkep intu petak. Palus aku mahining auh je hamauh,