Read Ngaju ESEKHIEL 10 Bible Online

ESEKHIEL 10 - Ngaju bible

ESEKHIEL 10

¹ Palus Aku manampayah akan kubah hunjun takolok kare kerub[18] te, tuntang gitangku taloh je sama kilau padadusan bara batu nilam.

² Limbah te Hatalla hamauh dengan oloh je hapakaian lena te, “Tame intu helat kare roda je aton intu penda kare kerub te, tuntang duan ije karakop barah apui. Palus nawor barah te akan hunjun lewu!” Ie manumon tuntang aku mananturee.

³Metoh ie tame, kare kerub te kanjerae mendeng intu hila salatan human TUHAN. Ije kabutop baunandau mangontep parantaran huang tuntang hapus human TUHAN.

⁴Kalawa je manyirau je mananda pandumah TUHAN mamancar bara kare Kerub te tuntang bindah akan bauntonggang human TUHAN, sampai parantarae balawa toto.

⁵Auh kipak palapas kare Kerub te tarahining sampai parantaran luar, kilau auh Hatalla Je Jaton Tikas Kuasae.

⁶Limbah TUHAN manyoho oloh je hapakaian lena te manduan ije karakop barah apui bara helat kare roda intu penda kare Kerub te, oloh te tame tuntang mendeng intu balikat ije bara kare roda te.

⁷Palus ije bara kare Kerub te manamean lengee akan huang apui je aton intu bentok ewen, manyumput pire-pire kabutop barah, tuntang manjulok akan oloh je hapakaian lena te. Oloh te manduae palus haguet.

⁸Aku mite je intu penda palapas genep Kerub aton taloh je ampin lengen olon.

⁹ Aku mite kea genep Kerub te aton ije roda intu balikate. Epat roda te sama tampae, tuntang mangilat kilau batu permata je bahalap. Tuntang ain genep Kerub aton ije roda je beken je hamparang intu bentoke.

¹¹Awi te kare Kerub te tau manintu akan epat tintue. Ewen tau haguet akan kueh bewei ewen handak, dia usah mules bitie.

¹² Hapus bitin ewen, likute, lengee, palapase tuntang kare roda kea kontep dengan kare mate.

¹³Aku mahining ije bara kare roda te inggare “pusok kanyawong”.

¹⁴ Genep Kerub te hakabeken ampin tampan baue. Baun je solake iete kilau baun banting, je kadue kilau baun olon, je kateloe kilau baun singa, tuntang je kaepat kilau baun burong nasar.

¹⁵Kare Kerub te, iete Kerub je gitangku intu saran sungei Kebar. Genep katika amon kare Kerub te miar atawa mambirang palapase, mandai akan ngambo tuntang tarawang miar atawa tende, kare roda te harajur omba, awi inguasa awi kare Kerub te.

¹⁸Palus kalawa je manyirau je mananda pandumah TUHAN malihi bauntonggang human TUHAN tuntang bindah akan hunjun kare Kerub te.

¹⁹Aku mite kare Kerub te mambirang palapase tuntang tarawang malihi petak te palus haguet, tuntang kare rodae tamput. Palus ewen tende tokep lawang human TUHAN je hila timor, tinai kalawa manyirau tetep intu hunjun ewen.

²⁰Aku taraingat jete kare Kerub je bihin gitangku aton intu penda Hatallan Israel, intu saran sungei Kebar.

²¹Gagenep Kerub te je hakabeken ampin tampan baun ewen, uras mahapan due kapasang palapas, tuntang kea taloh je sama kilau lengen olon aton hong penda palapas te.

²²Baun[19] ewen sama kea kilau ampin baun kare Kerub je gitangku intu saran sungei Kebar. Gagenep bitin ewen uras miar bujur manintu hila baun ayu-ayue.