Read Ngaju ESEKHIEL 11 Bible Online

ESEKHIEL 11 - Ngaju bible

ESEKHIEL 11

¹Palus aku inggatang awi roh Hatalla tuntang imbite akan lawang timor Human TUHAN. Intu hete gitangku oloh karee 25 biti, bara marak ewen aton due pamimpin bangsa, iete Yaasanya anak Asur tuntang Pelaca anak Benaya.

²Hatalla hamauh dengangku, “O anak olon, jetoh kare oloh je marencana kapapa intu lewu toh tuntang manenga nasehat je mampalayang.

³Awi te nyampai peteh-Ku tahiu hukuman akan ewen, o anak olon. Awi ewen hamauh, ‘Dia tahi tinai kare huma toh akan imangun itah haluli.[20] Lewu toh iete kawah tuntang itah toh isin meto intu huange! Itah lapas bara amok apui awi kawah toh mangalindong itah.’ ”

⁵Limbah te Roh TUHAN manyangkulep aku, tuntang aku inyoho TUHAN hamauh dengan ungkup Israel, “O bangsa Israel, katawang-Ku narai je insanam tuntang je irencana awim.

⁶Kalote karee oloh je jari impateim, sampai kare jalan kontep awi hantu.

⁷Awi te, Aku, TUHAN Ije Pangkahai, hakotak dengan keton. Punae, lewu toh iete kawah, tapi isin meto je intu huange dia keton, tapi hantun kare oloh je jari impatei awi keton! Tinai keton akan iharak awi-Ku balua bara lewu toh!

⁸En keton mikeh padang? Kareh Aku mampadumah oloh je aton padange uka manyarang keton.

⁹Keton akan imbit-Ku balua bara lewu tuntang inyarah-Ku akan oloh bangsa beken. Aku jari manukas hukuman matei akan keton.

¹⁰Keton akan matei hong parang intu lewun keton kabuat palus keton katawan je Aku toh puna TUHAN.

¹¹Awi te keton dia akan aman intu lewu toh, dia kilau isin meto intu huang kawah. Aku akan manggoang tuntang mahukum keton hong kueh bewei keton aton intu lewun Israel.

¹²Palus katawan keton je Aku toh TUHAN tuntang keton ihukum-Ku awi jari malanggar kare atoh-Ku tuntang dia paduli kare parentah-Ku awi keton omba mahapan kare atoran ain kare bangsa hakaliling keton.”

¹³Metoh aku mansanan auh te, salenga ih Pelaca manjato palus matei. Palus aku sontop tuntang mantehau, “Hakayah TUHAN Ije Pangkahai! En uras tisan oloh Israel toh handak impateim?”

¹⁴TUHAN hamauh denganku tinai,

¹⁵“O anak olon, ikau dengan kare sobatm huang eka tawanan kanjeran inahiu awi oloh Yerusalem. Koan ewen, ‘Kare oloh tawanan te lalau kejau bara Yerusalem uka sombayang intu TUHAN. Tanah Israel jari inenga TUHAN akan itah’

¹⁶Awi te sanan peteh-Ku toh akan kare sobatm hong eka tawanan iete Aku je mimbit ewen keja-kejau akan marak kare bangsa beken tuntang manaburan ewen akan kare tanah te. Tapi katahin ewen aton intu hete, Aku akan mampahayak ewen.

¹⁷Aku, TUHAN Ije Pangkahai, mansanan tahiu Aku je akan mamumpong ewen bara kare eka ewen kasaburan, palus malian tanah Israel akan ewen.

¹⁸Amon ewen buli, ewen akan manganan uras hampatong dewa je papa tuntang bakajile-jilek je inyondau ewen.

¹⁹ Ewen akan inenga-Ku atei je taheta tuntang kaharati je taheta. Atei ewen je batekang sama kilau batu akan induang-Ku tuntang ingganti-Ku dengan atei je manumon auh-Ku.

²⁰Palus ewen akan manumon kare atoran ayung-Ku tuntang baketep malalus kare parentah-Ku. Ewen akan jadi ungkup-Ku tuntang Aku jadi Hatallan ewen.

²¹Tapi kare oloh je rajin manyembah kare hampatong dewa je papa tuntang bakajile-jilek akan ihukum-Ku awi gawin ewen je papa te.” Kalote auh TUHAN Ije Pangkahai.

²² Kare Kerub te nampara tarawang tuntang kare roda te omba kea. Kalawa manyirau je mananda pandumah Hatallan Israel aton intu hunjun ewen.

²³Limbah te kalawa je manyirau te malihi Yerusalem tuntang bindah akan bukit hila timor lewu te.

²⁴Hong paite te, Roh Hatalla manggatang aku tuntang malian aku akan eka kare oloh tawanan intu Babel. Limbah te paite te palus nihau.

²⁵Palus aku manyarita akan kare oloh tawanan uras taloh je irentah TUHAN akangku.