Read Ngaju ESEKHIEL 12 Bible Online

ESEKHIEL 12 - Ngaju bible

ESEKHIEL 12

¹TUHAN hamauh tinai dengangku, Koae,

² “O anak olon, ikau melai intu marak bangsa oloh pambarontak. Ewen aton mate tapi dia mite; aton pinding tapi dia mahining, awi ewen rajin malawan.

³Awi te, o anak olon, sarai magon handau, natap kare ramom namean akan pundut kilau je bahut ilalus awi oloh je haguet akan eka tawanan. Helo bara andau kaput, lihi humam marak gitan oloh handa-handau ih, kilau oloh je iimbit akan tawanan. Nampa rumbak intu dinding humam sambil inyaksi awi oloh pambarontak te, tuntang imbit pundut je basuang kare ramom te balua mahalau rumbak te. Eton pundut te hong hunjun baham. Palus haguet hong kakaput alem; nutup matam mangat ikau dia mite jalan je ihoroi awim. Nauhe hapus bangsa Israel mite uras taloh je iawim te, uka jadi pampingat akan ewen. Ayau ewen kasene arepe je ewen te pambarontak.”

⁷Balalu aku malalus taloh je irentah TUHAN akangku. Hong andau te kea, katika magon handau, inatapku kare ramongku huang ije pundut, kilau je bahut ilalus awi oloh tawanan. Metoh andau nampara hamalem, aku mawi rumbak hapan lengengku intu dinding humangku, palus balua mahalau rumbak te. Intu tampayah oloh handiai, pundut te ietongku intu hunjun bahangku, limbah te aku haguet.

⁸Andau jewue TUHAN hakotak dengangku, Koae,

⁹“O anak olon, bangsa Israel, bangsa je palawan te jari misek dengam narai je jari iawim.

¹⁰Awi te sanan akan ewen auh bara Aku, TUHAN Ije Pangkahai. Peteh-Ku toh inintu akan raja Yerusalem, tuntang kakare oloh je melai lewu te.

¹¹Narang akan ewen taloh je ilalusm kilau tanda taloh je akan manjadi buah ewen, iete: ewen akan jadi oloh tawanan tuntang inyarah akan eka kejau.

¹²Huang kakaput alem rajan ewen akan meton pundut ramo intu hunjun bahae palus haguet. Kare oloh akan mawi rumbak intu dinding mangat ie tau balua. Ie akan manutup matae sampai dia tau mite jalan je ihoroie.

¹³ Tapi Aku akan mambirik jala aing-Ku uka manyingkap ie. Palus Aku mimbit ie akan lewu Babel, tuntang intu hete ie akan matei, hayak dia puji mite lewu te.

¹⁴Uras oloh istana, kea kare panasehat tuntang oloh je manjaga raja te akan inaburang-Ku akan kanih kate tintue. Ewen akan inggoang-Ku tuntang impatei-Ku.

¹⁵Metoh ewen inaburang-Ku akan marak kare bangsa beken intu kare tanah beken, ewen akan katawan je Aku toh TUHAN.

¹⁶Isut bewei bara ewen je akan inyalamat-Ku bara parang, bara lau, tuntang panyakit, uka intu marak kare bangsa beken te ewen akan harati je ewen jari malalus taloh je papa toto. Maka ewen mangaku je Aku toh TUHAN.”

¹⁷TUHAN hamauh dengangku,

¹⁸“O anak olon, keleh hagenjeh metoh ikau kuman, tuntang keleh hagenjeh mikeh metoh ikau mihop.

¹⁹Nyampai akan hapus bangsa auh bara Aku toh TUHAN Ije Pangkahai akan oloh Yerusalem je magon melai intu tanah ewen. Ewen akan hagenjeh metoh kuman tuntang hagenjeh mikeh metoh mihop. Petak ewen keang kamahau, awi uras oloh je melai intu hete harajur malanggar parentah.

²⁰Kare lewu je metoh toh kontep dengan oloh melaie akan irusak tuntang kare tana akan jadi padang pasir. Maka ewen katawan je Aku toh TUHAN.”

²¹TUHAN hamauh dengangku,

²²“O anak olon, mbuhen oloh Israel rajin manyewut paribasa toh: ‘Wayah baganti wayah, tapi kare tujum dia kea manjadi?’

²³Sanan akan ewen iete Aku, TUHAN Ije Pangkahai, manenga panombah kalotoh: Paribasa te akan inganang-Ku, sampai dia inyewut tinai intu Israel. Kilau gantie sanan akan ewen iete katikae jari sampai, tuntang genep tujum akan manjadi.

²⁴Intu Israel jaton tinai paite atawa tujum je dia toto.

²⁵Aku, TUHAN Ije Pangkahai akan hakotak dengan bangsa Israel. Uras taloh je insanang-Ku musti akan manjadi, dia akan impaundur tinai. Hining, o bangsa pambarontak! Katahin pambelom ayum Aku akan malalus uras taloh je impingat-Ku akam. Aku, TUHAN jari hakotak.”

²⁶Koan TUHAN dengangku,

²⁷“O anak olon, kare oloh Israel mansanan je kare paite tuntang tujum ayum harun akan manjadi kejau dapit.

²⁸Awi te, sanan akan ewen iete Aku, TUHAN Ije Pangkahai mansanan: Uras taloh je insanang-Ku musti akan manjadi, dia impaundur tinai. Aku, TUHAN Ije Pangkahai jari hakotak.”