Read Ngaju ESEKHIEL 14 Bible Online

ESEKHIEL 14 - Ngaju bible

ESEKHIEL 14

¹Pira-pire biti bara pamimpin bangsa Israel manalih aku misek kahandak TUHAN.

²Palus TUHAN hamauh dengang-Ku,

³“O anak olon, kare oloh toh jari manyarah arepe akan hampatong dewa sampai ewen tambohos akan huang dosa. Lalehan Aku salenga maku iisek awi ewen?

⁴Awi te, sanan akan ewen je Aku, TUHAN Ije Pangkahai mameteh kalotoh, ‘Genep bitin oloh Israel je jari manyarah arepe akan hampatong dewa sampai ie tambohos akan huang dosa, palus dumah balaku nasehat dengan ije biti nabi, akan inombah-Ku kabuat dengan panombah je patut akan kare hampatong dewae je are te!

⁵Uras hampatong dewa te jari mangejau ungkup-Ku bara Aku. Tapi keleh jaka awi panombah-Ku toh ungkup-Ku te tau haluli manempo Aku.’

⁶Sanan kea akan oloh Israel iete Aku toh TUHAN Ije Pangkahai hamauh dengan ewen, ‘Keleh hobah bara kare dosan keton, tuntang lihi kare hampatong dewan keton je papa te.’

⁷Genep oloh Israel atawa oloh bangsa beken je melai marak bangsa Israel, je mangejau Aku tuntang manyarah arepe akan hampatong dewa, palus balaku nasehat dengan ije biti nabi, akan inombah-Ku kabuat.

⁸Aku akan malawan ie tuntang mawi ie indu sonto akan oloh beken. Aku akan mamisah ie bara marak ungkup-Ku, palus ungkup-Ku katawan je Aku toh TUHAN.

⁹Amon ije biti nabi je inipu sampai manenga panombah je sala, Aku toh je jari manipu ie. Aku toh TUHAN Ije Pangkahai akan mamisah ie bara kare oloh Israel.

¹⁰Aloh nabi te atawa ewen je balaku nasehat, akan mandino hukuman je sama.

¹¹Uras taloh handiai te ilalusku uka oloh Israel ela tinai mangejau arepe bara Aku tuntang ela tinai mamapa arepe huang dosa. Tumon te ewen akan jadi ungkup-Ku, tuntang Aku jadi Hatallan ewen.” Aku toh TUHAN Ije Pangkahai jari hanauh.

¹²TUHAN hamauh dengang-Ku, “O anak olon,

¹³Amon ije lewu badosa, tuntang dia baketep manempo Aku, Aku akan mahukum lewu te. Aku akan marusak gudang panginae, mampadumah lau tuntang mampatei olon atawa meto.

¹⁴Aloh Noah, Danel[22] tuntang Yob melai intu eka te, maka kahalap ewen telo te baya tau manyalamat tahaseng ewen kabuat ih. Aku, TUHAN Ije Pangkahai jari hakotak.

¹⁵Tau kea Aku mampadumah kare meto basiak uka manangkarap kare oloh tanah te, sampai tanah te jadi paham bahaya tuntang jaton je bahanyi mahalaue.

¹⁶Aloh Noah, Danel tuntang Yob melai intu hete, palus tagal Aku Hatalla je belom, TUHAN Ije Pangkahai, ewen dia olih manyalamat ewe-eweh, aloh anak ewen kabuat. Baya ewen kabuat je salamat. Lewo te akan jadi padang pasir.

¹⁷Tau kea Aku mampadumah parang akan tanah te, tuntang ingirim-Ku kare pakakas parang je tamam akan mambinasa aloh olon aloh meto.

¹⁸Tuntang aloh katatelo oloh je endau melai intu hete, palus tagal Aku, Hatalla je belom, TUHAN Ije Pangkahai, ewen dia olih manyalamat eweh bewei, aloh anak ewen kabuat. Baya ewen kabuat ih je salamat.

¹⁹Tau kea Aku mampadumah panyakit akan tanah te, palus inusoh-Ku kasangit-Ku akae sampai aloh olon aloh meto akan binasa.

²⁰Tuntang aloh Noah, Danel tuntang Yob melai intu hete palus tagal Aku, Hatalla je belom, TUHAN Ije Pangkahai, ewen dia olih manyalamat eweh bewei, aloh anak ewen kabuat. Baya ewen kabuat bewei je salamat awi kahalap ewen.”

²¹ TUHAN Ije Pangkahai hamauh, “Aku akan mampanjato epa-epat hukuman aing-Ku je paham hai akan Yerusalem uka mampalomos aloh olon aloh meto. Hukuman te iete: parang, lau, meto basiak tuntang panyakit.

²²Amon aton je tau liwus tuntang manyalamat kare anake, nantuani ewen amon ewen dumah manalih ikau. Ite, kalote ampin kapapan ewen, palus ikau akan mangasene tahiu gawing-Ku je mahukum Yerusalem te puna patut.

²³Palus keton kea akan mangasene je uras gawing-Ku te aton buku sababe. Aku, TUHAN Ije Pangkahai jari hamauh.”