Read Ngaju ESEKHIEL 17 Bible Online

ESEKHIEL 17 - Ngaju bible

ESEKHIEL 17

¹TUHAN hamauh dengangku, “O anak olon, sanan akan kare oloh Israel paribasa,

²je Aku, TUHAN Ije Pangkahai handak manyampaie akan ewen: Aton ije kongan burong nasar hai je bahalap bulue tuntang palapase lombah hayak abas. Ie tarawang akan bukit Libanon, mamelek ije suloh batang kayu alau.

⁴Palus ie mimbit tuntang mandak jete intu ije lewun dagang je rami.

⁵Limbah te ie manduan ije kabatang taloh imbul je magon korik bara tanah Israel. Ie mimbul jete intu tana je petake basiwoh tuntang harajur hadanum.[30]

⁶Taloh imbul te jadi batang anggor je belom randah tapi labat hayak layah. Kare edae manintu burong nasar te, tuntang kare uhate timben dehen tame akan penda petak. Batang anggor te labat ramba toto.

⁷Pandehan te kea aton burong nasar hai je beken; palapase lombah tuntang bulue bakapal. Palus batang anggor te manintu kare uhat tuntang kare edae akan burong nasar je taheta te dengan kaharap uka burong te nahuang manenga akae labih are danum bara je aton hong tana te.[31]

⁸Padahal batang anggor te jari belom hong petak je basiwoh dengan danum je are, sampai ie tau mandawen labat, mamua are, tuntang jadi batang anggor je bahalap.

⁹Awi te, Aku, TUHAN Ije Pangkahai, misek: En tau batang anggor te belom tuntang hai? En dia burong nasar je solake akan manjawut ie dengan kare uhate, marunap buae, mamelek kare edae tuntang manalua ie balayu? Dia usah mahapan are kaabas atawa bangsa je menteng akan manjawut batang te sampai akan kare uhate.

¹⁰Puna ie jari belom dehen, tapi en tau ie sasar hai? En dia ie akan balayu amon inampur awi riwut timor? En dia ie akan keang intu ekae jari imbul?”

¹¹TUHAN hamauh dengangku,

¹² “Isek kare oloh palawan te, en ewen harati paribasa te. Sanan akan ewen je raja Babel jari dumah akan Yerusalem, tuntang mibit raja Yuda hayak kare oloh hai intu lewu te akan Babel.

¹³Palus ie mintih ije bara keluarga raja Yuda te, mawi janji dengae, tuntang manyoho ie sumpah baketep dengae. Raja Babel te manahan kare oloh je mambatang,

¹⁴uka karajaan Yuda te dia mendeng tinai, tuntang akan manjamin je janji te toto-toto ilalus.

¹⁵Tapi raja Yuda malawan tuntang manyoho sarohan akan Misir uka mandino kuda tuntang tantara je are. En ie akan mandino hasil? En ie akan inalua liwus? Dia tau ie mungkir janji tapi dia ihukum!

¹⁶Tagal Aku, Hatalla je belom, TUHAN Ije Pangkahai, raja Yuda akan matei hong Babel, awi ie jari mungkir sumpahe tuntang malanggar janjie dengan raja Babel je jari mampondok ie hujun padadusae.

¹⁷Tantara Misir je tamam te mahin dia olih mandohop ie bara sarangan oloh Babel je manampa kare timbok petak tuntang mangali kare parit uka mampatei are oloh.

¹⁸Awi ie jari malanggar sumpah tuntang janjie, ie dia akan olih maliwus arep.

¹⁹Tagal Aku, Hatalla je belom, TUHAN Ije Pangkahai, raja Yuda akan ihukum awi-Ku awi ie jari malanggar janjie dengan raja Babel, padahal ie jari sumpah hapan arang-Ku uka malaluse.

²⁰Aku akan mambirik jala akan manyingkap ie. Ie akan imbit-Ku akan Babel tuntang ihukum-Ku intu hete, awi ie dia baketep dengang-Ku.

²¹Tantarae je pangkahalape akan matei huang parang, tuntang je tau liwus akan pisah darai akan hete-hete. Maka ungkup-Ku katawan iete Aku, TUHAN jari hakotak.”

²²Toh auh TUHAN Ije Pangkahai, “Bara batang kayu alau je gantong induang-Ku lawie palus imelek-Ku ije edae je mangor; imbul awi-Ku edan te intu bukit je gantong.

²³Intu bukit je pakagantonge hong Israel, ie intejek awi-Ku. Hong hete ie akan manyalundik tuntang mamua, palus jadi batang kayu alau je hai. Kakare macam burong akan manyarangan intu huange tuntang manganjungen penda edae.

²⁴Uras batang kayu hong tanah te akan haratie je Aku toh TUHAN. Batang kayu je gantong ineweng awi-Ku; batang kayu je randah imbelom awiku sampai manjadi gantong. Batang kayu je bajewong iawi-Ku jadi keang kamahau; tuntang batang kayu je keang inenga-Ku salundik tuntang kambang. Aku, TUHAN, jari hakotak, uras auh-Ku akan tulus.”