Read Ngaju ESEKHIEL 20 Bible Online

ESEKHIEL 20 - Ngaju bible

ESEKHIEL 20

¹Hong tanggal sapuluh bulan lime, hong nyelo kauju manampara bara wayah ikei inawan, pire-pire biti pamimpin oloh Israel dumah manalih aku handak balaku nasehat bara TUHAN. Limbah ewen mondok intu taharep-Ku,

²aku mahining TUHAN hamauh dengangku,

³“O anak olon, keleh hamauh dengan kare pamimpin te tuntang suman je Aku, TUHAN Ije Pangkahai hamauh kalotoh, ‘Bahanyi toto keton balaku nasehat bara Aku! Tagal Aku, Hatalla je belom, Aku dia nahuang keton balaku nasehat bara Aku! Aku, TUHAN Ije Pangkahai jari hakotak.’

⁴O anak olon, en jari tatap ikau mahakim ewen? Lius lalus! Pingat ewen tahiu kare kapapa je jari ilalus awi tato hiang ewen.

⁵ Sanan auhku toh. Aku jari mintih Israel tuntang sumpah dengan ewen. Intu Misir, Aku mamparahan arep-Ku akan ewen hayak hamauh, ‘Aku toh TUHAN, Hatallan keton!

⁶Metoh te Aku sumpah nahuang mimbit ewen balua bara Misir manintu tanah je intih-Ku akan ewen. Tanah te tatau tuntang basiwoh, petake je paling bahalap hong hapus kalunen.

⁷Aku manyoho ewen manganan kare hampatong dewa papa je ingilak ewen. Aku mangahana ewen mamapa arepe awi manyembah kare hampatong dewa bara Misir, awi Aku toh TUHAN, Hatallan ewen.

⁸Tapi ewen malawan Aku tuntang dia maku mahining auh-Ku. Ewen dia maku manganan kare hampatong dewa je papa te tuntang dia kea maku terai manyembah kare hampatong dewa je papa te tuntang kea dia maku terai manyembah kare hampatong dewa Misir. Metoh ewen intu kanih, Aku jari tatap handak manusoh kasangit-Ku mawi ewen.

⁹Tapi Aku dia malaluse, uka arangku dia inawah awi kare bangsa eka ewen melai. Awi hong taharep kare bangsa te, Aku jari mansanan je bangsa Israel akan imbit-Ku balua bara Misir.

¹⁰Palus imbit-Ku ewen balua bara Misir manintu padang pasir.

¹¹ Intu hete Aku manenga kare parentah-Ku akan ewen, tuntang majar kare atoran aing-Ku je patut inumon ewen, awi oloh je manumoe akan tetep belom.

¹² Aku manyoho ewen mahormat andau Sabat kilau tanda janjing-Ku dengan ewen, uka mampingat ewen je Aku toh TUHAN, jari mangabeken ewen tantai akang-Ku.

¹³Tapi intu padang pasir te kea ewen malawan Aku. Ewen malanggar kare perentah-Ku, tuntang manolak kare atoran ayung-Ku je manjanji tetep belom akan oloh je manumoe. Tapi ewen paham mamapa andau Sabat. Awi te, intu padang pasir te Aku jari tatap handak mampalua kasangit-Ku dengan ewen tuntang mambinasa ewen.

¹⁴Tapi Aku dia malaluse tagal kahormat arang-Ku, uka arang-Ku dia inawah awi kare bangsa je mite Aku mimbit Israel balua bara Misir.

¹⁵ Intu padang pasir te Aku mampikeh ewen dengan auh je bangsa Israel dia akan iimbit-Ku akan tanah je inyadia akan ewen, tanah je tatau tuntang basiwoh je paling bahalap hong hapus kalunen.

¹⁶Pampikeh te insanang-Ku awi ewen dia paduli kare parentah-Ku, malanggar kare atoran ayung-Ku tuntang mamapa andau Sabat. Ewen labih sanang manyembah kare hampatong dewa ain ewen.

¹⁷Tapi limbah te Aku masi dengan ewen, sampai Aku balang mampatei ewen intu padang pasir.

¹⁸Tapi kare oloh tabela marak ewen inasehat awi-Ku kalotoh, ‘Ela manumon kare atoran je inampa awi tato hiang keton. Ela manyonto hadat ewen tuntang ela kea mamapa arep keton dengan manyembah kare hampatong dewa ain ewen.

¹⁹Aku toh TUHAN, Hatallan keton. Keleh manumon kare atoran ayung-Ku tuntang parentah-Ku.

²⁰Keleh mahormat andau Sabat uka jadi tanda janjing-Ku dengan keton, uka mampingat keton je Aku toh TUHAN, Hatallan keton.’

²¹Tapi angkatan je tabela te mahin malawan Aku. Ewen malanggar kare atoran ayung-Ku tuntang dia paduli kare parentah-Ku je manjanji, oloh je manumoe akan tetep belom. Ewen mamapa andau Sabat. Awi te Aku jari tatap akan manampohak kasangit-Ku mawi ewen intu padang pasir te tuntang mampatei ewen urase.

²²Tapi Aku dia malaluse uka arang-Ku ela inawah awi kare bangsa je mite Aku mimbit Israel balua bara Misir.

²³ Intu padang pasir te kea Aku mampendeng sumpah tahiu Aku je handak manaburan ewen akan hapus kalunen,

²⁴awi ewen jari dia paduli kare parentah-Ku, malanggar kare atoran ayung-Ku, mamapa andau Sabat, tuntang tetep manyembah kare dewa je inara awi tato hiang ewen.

²⁵Limbah te Aku manenga akan ewen kare atoran je dia bahalap tuntang kare parentah je dia tau manenga pambelom.

²⁶Aku manalua ewen mamapa arepe hapan kare parapah ewen kabuat, sampai kare anak hatue tambakase ain ewen iluput awi ewen haream indu parapah. Hapan cara te Aku mahukum ewen uka ewen katawan je Aku toh TUHAN.

²⁷O anak olon, sanan akan oloh Israel, auh bara Aku toh TUHAN Ije Pangkahai: Jetoh sonto beken je mamparahan kilen ampie tato hiang keton manawah Aku tuntang dia baketep manempo Aku.

²⁸Aku mimbit ewen akan tanah je jari injanji-Ku dengan ewen. Sana ewen mite kare bukit je gantong tuntang kare batang kayu je labat ramba dawee, ewen maluput parapah intu kare eka te. Ewen mawi Aku sangit ganan kare parapah je ingehu tuntang parapah anggor ewen.

²⁹Aku misek ewen, ‘Kare eka gantong narai je inalih keton te?’ Palus bara katika te kare eka te inyewut ‘Kare eka gantong’.[37]

³⁰Awi te sanan akan oloh Israel auh bara Aku, TUHAN, Hatalla Pangkahai. ‘Mbuhen keton mawi kare dosa kilau je ilalus awi tato hiang keton? Sama kilau ewen, keton kea omba manumon kare hampatong dewa je bakajile-jilek te.

³¹Sampai andau toh haream keton mamapa arep awi keton mimbit parapah tuntang mamapui kare anak keton kilau parapah akan kare hampatong dewa. En magon bahanyi keton balaku nasehat bara Aku? Tagal Aku, Hatalla je belom, TUHAN Ije Pangkahai, keton ingahana-Ku balaku nasehat bara Aku.

³²Keton nahuang manyama arep keton dengan kare bangsa beken tuntang kare oloh je melai kare lewu beken je manyembah batang kayu tuntang batu. Tapi kanahuang keton te dia baka keton mandinoe.’ ”

³³“Tagal Aku, Hatalla je belom, TUHAN Ije Pangkahai, keton impingatku awi kasangit-Ku, keton akan irentah-Ku toto-toto tuntang hapan kakaras sampai keton mangkeme kuasang-Ku. Keton akan imumpong-Ku tuntang imbit-Ku haluli bara kakare tanah eka keton jari inaburan.

³⁴

³⁵Balalu Aku mimbit keton akan ‘Padang tunis benyem ain kare bangsa’.[38] Intu hete Aku mahakim keton hataharep bau,

³⁶sama kilau je jari ilalus-Ku dengan tato hiang keton intu Padang Pasir Sinai. Aku toh TUHAN Ije Pangkahai jari hakotak.

³⁷Keton akan iharago-Ku toto-toto uka keton manumon janjing-Ku.

³⁸Kare oloh je malapas arepe bara Aku jete oloh palawan tuntang oloh papa je akan inganan awi-Ku bara marak keton. Ewen akan imbit-Ku balua bara kare tanah eka ewen metoh toh melai tuntang dia Aku manyohoe haluli akan tanah Israel. Maka keton katawan je Aku toh TUHAN.”

³⁹TUHAN Ije Pangkahai hamauh, “O kare oloh Israel, toh mana keton. Takan ih mawi dosa dengan manyembah kare hampatong dewan keton! Tapi ingat, limbah te keton musti manumon auh-Ku tuntang dia tinai mamapa arang-Ku je barasih tuntang mimbit parapah akan kare hampatong dewan keton te.

⁴⁰Awi intu tanah Israel, hong tantan bukit aing-Ku ije barasih,[39] keton uras, bangsa Israel akan manyembah Aku. Intu hete Aku akan mangilak keton tuntang nahuang manarima kare parapah keton, kare parapah keton je pangkahalape tuntang kare panengan keton je jari imbaris tantai akang-Ku.

⁴¹Limbah keton imbit-Ku balua bara tanah eka keton inaburan, Aku akan mamumpong keton tuntang manarima uras parapah keton je ingehu. Maka uras bangsa katawan je Aku toh Hatalla je barasih haliai.

⁴²Amon keton imbit-Ku haluli akan tanah Israel, tanah je injanji-Ku akan tato hiang keton, maka keton katawan je Aku toh TUHAN.

⁴³Intu hete keton akan mingat kare gawi je papa je jari mamapa arep keton. Palus keton akan bajilek mingat kare kapapa te.

⁴⁴Amon keton jari iawi-Ku kalote kahalape tagal hormat arang-Ku, tuntang baleh je kejau kahalape inenga-Ku akan keton je oloh darhaka tuntang gawin keton je papa, te harun keton oloh Israel katawan je Aku toh TUHAN. Aku toh TUHAN Ije Pangkahai jari hakotak.”

⁴⁵TUHAN hamauh dengang-Ku, kalotoh,

⁴⁶“O anak olon, tampayah akan hila salatan. Tingak tanah salatan tuntang lait parak kayu intu hete.

⁴⁷Nyoho parak kayu te mahining taloh je isanan akae bara Aku toh TUHAN Ije Pangkahai. ‘Hining! Aku akan mantokan apui je manyeha lingis genep batang kayu je aton intu eka keton aloh keang aloh je belom. Apui je ganda-gandang te dia olih imbelep. Ie akan miar bara salatan akan utara, tuntang uras oloh akan mangkeme lasute.

⁴⁸Ewen akan kasene je Aku, TUHAN, jari mantokan apui te tuntang jaton ije biti oloh tau mambelepe.’ ”

⁴⁹Tapi aku Esekhiel mansuman kabehat atei-Ku tuntang hamauh, “TUHAN Ije Pangkahai, ela manyoho aku mansanan taloh te! Uras oloh jari bakotok awi aku rajin hakotak hapan tanding sampai bahali ewen haratie.”