Read Ngaju ESEKHIEL 21 Bible Online

ESEKHIEL 21 - Ngaju bible

ESEKHIEL 21

¹TUHAN hamauh dengang-Ku,

²“O anak olon, nyapa Yerusalem. Keleh manyapa kare eka sombayang intu hete. Pingat tanah Israel,

³je Aku, TUHAN hamauh kalotoh, ‘Aku toh musoh keton. Aku akan manyilak padang-Ku tuntang mampatei keton urase, je papa tuntang je bahalap.

⁴Hapan padang Aku akan malawan uras oloh Israel bara hila utara sampai akan hila salatan.

⁵Maka uras oloh akan katawan je Aku, TUHAN, manyilak padang-Ku tuntang dia akan manameae tame kumpange haluli.’

⁶O anak olon, keleh mungoh tuntang manarahing intu taharep kare oloh Israel, kilau jaka ikau metoh pehe atei tuntang nihau kaharapm.

⁷Amon ewen misek mbuhen ikau manguntoh, suman je ikau kapehe atei awi kasusah je akan dumah. Barita te akan mawi atei ewen mikeh, lengen ewen balemo, tuntang utut ewen hagenjeh, ewen akan halelek. Toto katikae jari sampai, tuntang uras taloh te akan manjadi. Aku toh TUHAN Ije Pangkahai jari hakotak.”

⁸TUHAN hamauh dengang-Ku,

⁹“O anak olon, keleh manujum! Suman akan kare oloh je aton, TUHAN hamauh kalotoh, ‘Aton ije padang, padang je iasa tuntang impanyihi.

¹⁰Padang te impanyihi mangat tau mampatei, impalisen mangat tau malinyau. Akan ungkup-Ku jaton kahanjak tinai awi kare tingak tuntang atoran dia ewen padulie.[40]

¹¹Padang te iasa mangat tau tatap ihapan palus injulok akan ije biti oloh pamuno.

¹²O anak olon, keleh manatum tuntang mantehau! Awi padang te jari tata-tatap akan malawan ungkup-Ku. Kare pamimpin oloh Israel haya-hayak dengan hapus bangsa akan inejep awi padang te sampai binasa. Palus marut usok keton dengan kapehen atei,

¹³awi Aku metoh mauji ungkup-Ku, amon ewen dia maku mangambuah gawie, uras taloh te akan buah ewen.’[41]

¹⁴Awi te o anak olon, nujum. Napok lokapm, kilau tanda akan padang te uka nampara mampatei. Padang te paham mampikeh.[42]

¹⁵Ie mawi bangsa ayung-Ku nihau kahanyie tuntang tantarang balalu balawo. Aku maancam tanah ewen dengan padang[43] te je mangilat kilau kilat, tuntang je batatap uka mampatei.

¹⁶O padang je banyihi, tejep akan gantau tuntang akan sambil, tuntang manintu je kueh bewei tumon kanahuangm.[44]

¹⁷Aku akan manapok lokap kea, palus kasangit-Ku akan terai. Aku, TUHAN jari hakotak.”

¹⁸TUHAN hakotak dengang-Ku, Koae,

¹⁹“O anak olon, nampa gambar due jalan je tau ihalau awi raja Babel je mimbit padange. Kada-due jalan te dumah bara tanah je sama; jalan je ije manintu Raba, lewun oloh Amon; je ije tinai akan Yerusalem, lewu je hakota intu Yuda. Kepan papan hapa maninjok eka jalan te nampara manyampang.[45]

²¹Raja Babel mendeng tokep papan je maninjok jalan te. Uka mangatawan jalan kueh je akan ihoroie, ie balaku tanda bara kare dewae, manggurak panah tuntang mariksa atei meto[46] je harun iluput.

²²Ampie panah te tatekap awi lenge gantaue aton tanda Yerusalem! Jete rimae raja musti manyarang Yerusalem, mampahiau lahap parang tuntang manyoho tantarae manyadia kare pakakas hapan manelak, mangkepae intu kare lawang Yerusalem, manimbok petak jadi dinding hapa mangapong tuntang mangali kare parit.

²³Oloh Yerusalem dia akan percaya je ewen inyarang, awi ewen jari mampendeng janji dengan Babel. Tapi tujum toh akan mampingat ewen je ewen akan inawan awi kare dosan ewen.

²⁴Aku, TUHAN Ije Pangkahai hamauh dengan ewen, ‘Kare dosan keton ingatawan tuntang uras oloh katawan je keton puna sala. Kapapan keton gitan hong genep gawin keton. Toh dumah katikae keton ihukum, tuntang keton akan inyarah-Ku akan musoh keton.’

²⁵Tuntang akan rajan Israel Aku hamauh, ‘O raja je papa tuntang darhaka! Katika hukuman akam je pangkalepahe jari tokep.

²⁶Aku, TUHAN Ije Pangkahai jari hakotak. Engkak makotam tuntang lapas saroban ayum. Toh, ampie taloh jari hobah. Gatang pangkat oloh je belom susah tuntang tenga akan ewen kuasa! Pamohon kare oloh panguasa bara pangkate!

²⁷Lewu toh akan imparusak samasinde awi-Ku, sampai intu hete-hete baya aton awan huma baderep. Tapi taloh te harun manjadi amon oloh je intih-Ku mangat mahukum lewu toh jari dumah. Akae Aku akan manyarah lewu toh.’ ”

²⁸ “O anak olon, nujum! Sanan akan oloh Amon je jari manawah Israel, iete Aku, TUHAN Ije Pangkahai hamauh, ‘Ije padang jari sadia hapa mampatei; padang te jari iasa mangilat sama kilau kilat, uka tata-tatap hapa mampatei.

²⁹Paite je gitan keton dia toto, tujum je insanan keton mahin tanjaro. Keton papa tuntang darhaka, tuntang katika akan mahukum keton je pangkalepahe jari tokep. Padang te akan manetek uyat keton.

³⁰O oloh Amon, ngumpang haluli padang keton! Keton akan ihakim-Ku hong eka keton injapa tuntang inakan.

³¹Aku handak manampohak kasangit-Ku je hasep. Tuntang keton akan inyarah-Ku akan kare oloh je tulas je apik mambinasa.

³²Keton akan lepah kinan apui. Dahan keton akan batusoh intu tanah keton kabuat, tuntang jaton oloh je mingat keton. Aku toh TUHAN jari hakotak.’ ”