Read Ngaju ESEKHIEL 22 Bible Online

ESEKHIEL 22 - Ngaju bible

ESEKHIEL 22

¹TUHAN hakotak dengangku, Koae,

²“O anak olon, en jari tatap ikau mahakim lewu je kontep dengan oloh pamuno te. Parahan akae hapus gawie je bakajile-jilek.”

³TUHAN Ije Pangkahai manyoho aku manyampai peteh toh akan Yerusalem, “Ikau mawi kasalan awi jari mampatei are bara oloh ayum kabuat, tuntang mamapa arepm awi manyembah hampatong dewa tampan lengem kabuat. Awi te katikae uka mahukum ikau jari tokep tuntang tarong saritam akan hapus kea. Ikau inalua awi-Ku jadi akan indu baka tuntang indu tatawen kare bangsa tuntang kare tanah.

⁵Ikau ihalalea awi kare tanah je kejau tuntang je tokep awi ikau raju-rajur malanggar parentah tuntang atoran.

⁶Uras pamimpin oloh Israel maandal kaabase kabuat tuntang mampatei oloh.

⁷ Jaton ije biti bara oloh ayum je mahormat oloh bakase. Ikau manipu oloh bangsa beken tuntang manduan kaontong hong kasusah kare balo tuntang nole.

⁸ Kare eka sombayang akang-Ku imapam, tuntang andau Sabat dia ikau mahagae.

⁹Bara oloh ayum aton je gawie jadi saluang ado je rajin mamapa oloh beken uka ihukum matei. Aton kea je rajin kuman isin meto je jari iluput akan dewa. Aton tinai je nguan gawin karayap.

¹⁰ Aton je hinje tuntang batiroh dengan indu tirie, oloh bawi je metoh dumah bulae,

¹¹sawan oloh beken atawa manantue atawa andie bara beken indue.

¹² Aton kea je duan upah tukang mampatei oloh, mahatangan dengan anak duit je paham hai, tuntang mahajipen kare oloh sama-sama bangsa ayue kabuat. Ewen jari mangalapean Aku. Aku toh TUHAN Ije Pangkahai jari hakotak.

¹³Tapi toh Aku handak manjera belai kare parampok tuntang oloh pamuno ayum.

¹⁴En magon bahanyi atawa magon abas ikau uka mantajok lengem limbah Aku jari mahukum ikau? Aku, TUHAN Ije Pangkahai jari hakotak tuntang Aku akan malalus taloh je insanang-Ku.

¹⁵Aku akan manaburan kare oloh ayum akan kakare tanah tuntang bangsa, tuntang Aku akan mampatende gawim je papa te.

¹⁶Ikau akan inawah awi kare bangsa beken, palus ikau katawan je Aku toh TUHAN.”

¹⁷TUHAN hamauh dengangku,

¹⁸“O anak olon, kare oloh Israel te dia baguna akang-Ku. Ewen inanding sama kilau tain logam je inyampur iete tambaga, timah, sanaman, tuntang timah babilem je batisa limbah perak imparasih huang dapur apui.

¹⁹Maka toh, Aku, TUHAN Ije Pangkahai, mansanan akan ewen je ewen sama kilau tain perak je dia baguna te. Kilau kumpal perak, tambaga, sanaman, timah babilem inamean akan huang tungku uka irasih, kalote kea ewen akan imumpong-Ku tuntang imbit-Ku akan Yerusalem. Kasangit-Ku je paham toto akan malabur ewen kilau apui je malabur kare bawak logam je inyampur.

²¹Yoh, Aku akan mamumpong ewen intu Yerusalem, mantokan apui kasangit-Ku intu penda ewen, sampai ewen lenyoh.

²²Kilau perak ilabur huang dapur apui, kalote kea ewen akan ilabur huang Yerusalem. Maka ewen katawan je Aku toh TUHAN, jari manampohak kasangit-Ku mawi ewen.”

²³TUHAN hakotak tinai dengangku, Koae,

²⁴“O anak olon, sanan akan oloh Israel iete petak ewen papa, tuntang awi te Aku sangit tuntang mahukume.

²⁵Kare pamimpie[47] sama kilau singa je manyakungkong limbah manangkarap taloh impae. Ewen mampatei rayat, manduan uras ramo tuntang panatau je dinon ewen tuntang mawi are oloh bawi manjadi balo.

²⁶ Kare imam Israel malanggar kare atoran ayung-Ku tuntang mamapa kare ramo je jari ingabeken tantai puna akang-Ku. Ewen dia mangabeken taloh je barasih tuntang taloh je dia barasih. Ewen kea dia majar rayat uka mangasene tuntang mangabeken taloh je pali tuntang taloh je dia pali manumon atoran agama. Ewen dia paduli andau Sabat. Tumon te Aku inawah awi bangsa Israel.

²⁷Kare panggawi ain pamarentah kilau sarigala je mamisak taloh kinae. Ewen mampatei baya akan manggau ontong.

²⁸Kare nabi manyahokan kare dosa te; ewen kilau oloh je mangapur dinding je halike. Kare paite ewen dia toto, kalote kea kare tujum ewen. Ewen mansanan kare peteh je inyampai ewen inarima ewen bara TUHAN Ije Pangkahai, padahal Aku dia samasinde hakotak dengan ewen.

²⁹Kare oloh tatau manipu tuntang marampok. Ewen mawi oloh je belom susah hapakoae tuntang manduan ontong bara oloh bangsa beken.

³⁰Bara marak oloh Israel te Aku manggau oloh je tau mampendeng dinding kota, atawa mendeng intu kare eka je dinding kotae jari baduroh uka manjaga lewu te amon Aku handak marusak huang kasangit-Ku je paham toto; tapi ije biti mahin jaton Aku sondaue.

³¹Awi te toh Aku malapas kasangit-Ku mawi ewen, tuntang kilau apui Aku akan mambinasa ewen awi kare gawin ewen. Aku toh TUHAN Ije Pangkahai jari hakotak.”