Read Ngaju ESEKHIEL 23 Bible Online

ESEKHIEL 23 - Ngaju bible

ESEKHIEL 23

²“O anak olon, aton due biti oloh bawi hampahari, ije andie tuntang ije kakae.

³Hong katika tabela ewen melai intu Misir, intu kanih ewen mampahinje arepe dengan oloh hatue, palus ewen jadi lontei.

⁴Je bakas bagare Ohola; ie jadi tanda akan Samaria. Andie bagare Oholiba; ie jadi tanda akan Yerusalem. Aku kawin dengan ewen tuntang mandino anak bara kadaduee.

⁵Aloh Ohola jadi sawang-Ku, ie tetep malontei, tuntang paham kipee dengan kare bandonge bara Asur.

⁶Ewen te tantara je hapakaian sama ungu, kare oloh bangsawan, tuntang kare pagawai je pangkat gantong; urase te kare oloh bakena iete pasukan je mahapan kuda.

⁷Dengan kare oloh hai te Ohola habandong. Tinai awi kontep kipee, ie mamapa arepe dengan manyembah kare hampatong dewan ewen.

⁸Ie harajur malontei kilau je ilaluse bihin intu Misir, ekae mampanihau kabujange. Bara kakorike, ie jari iniroh tuntang iawi kilau lontei.

⁹Awi te Aku manyarah ie akan kare bandonge, kare oloh Asur je eka huange te.

¹⁰Ie impalowai ewen hapan kakasare, palus impatei ewen hapan padang, tuntang kare anake irampas. Intu hete-hete pampateie jari tahiun kare oloh bawi.

¹¹Oholiba andie mite taloh te, tapi ie labih haream kipee habandong bara Ohola.

¹²Oholiba kea paham kipee dengan kare oloh Asur te, iete kare oloh tabela bakena bara pasukan kuda, kare oloh bangsawan, tuntang pagawai gantong, hayak tantara je hapakaian sama ungu te.

¹³Aku mite je Oholiba te rusak toto, kilau kakae.

¹⁴Ie sasar tahi sasar rusak. Ie rajin toto dengan kare gambar je imahat hong dinding tuntang je iwarna hapan cat bahandang kilau kahandang daha. Kare gambar te mamparahan kare perwira Babel dengan panding je bahalap tuntang saroban je hajuntai.

¹⁵

¹⁶Metoh Oholiba mite gambar te, kipee sabak tuntang ie mangirim parawei akan kare perwira te hong Babel.

¹⁷Palus ewen dumah tuntang batiroh dengae. Ewen marayap ie hapan salepah kipen ewen sampai ie peda balalu bajilek dengan ewen.

¹⁸Limbah te dengan tara-tarang ie malontei tuntang mamparahan arepe intu baun oloh are. Aku bajilek mite ie, kilau Aku bajilek mite kakae.

¹⁹Sasar tahi sasar kinjap ie habandong, jaton kabekee bara metoh katabelae metoh ie malontei intu Misir.

²⁰Ie paham kipee dengan oloh hatue je paham kahain kipee, kilau kahain kipen kuda hatue. (

²¹O Oholiba, ikau nahuang manangkaluli kanjim je iawim metoh katabelam, metoh oloh Misir hasinta dengam.)”

²²TUHAN Ije Pangkahai hamauh, “O Oholiba, ikau jari peda dengan kare bandongm, tapi Aku akan manderoh ewen uka ewen sangit dengam tuntang mangapong ikau.

²³Aku akan mamumpong tuntang mimbit akam uras kare bandongm bara Babel, Pekod, Soa, Koa, Asur, hayak kare oloh Kaldea. Aku mimbit akam kare oloh tabela bakena je pangkat gantong, oloh bangsawan, pagawai gantong tuntang kare perwira pasukan hapan kuda.

²⁴Ewen akan manyarang ikau bara utara[48] dengan tantara je are, dengan kare kareta parang tuntang kare kareta eka panginan. Dengan ingalindong awi talawang tuntang kare tanggoi waja, ewen akan mangapong ikau. Aku akan manalua ewen mahakim ikau manumon kare atoran ewen kabuat.

²⁵Awi Aku sangit dengam, inalua-Ku ewen manyangit mawi ikau. Urong tuntang pindingm akan inetek ewen tuntang kare anakm akan induan tuntang imapui belo-belom.

²⁶Ikau akan impalowai tuntang kare pakaian hiasan ayum irampas.

²⁷Tumon te Aku akan mampatende kipem tuntang kare gawi habandong je ilalusm bara katika ikau aton intu Misir. Ikau dia harap tinai dengan hampatong dewa je kueh bewei atawa mingat Misir.”

²⁸TUHAN Ije Pangkahai hamauh, “Aku akan manyarah ikau akan kare oloh eka kajilekm je inyingim.

²⁹Awi ewen basingi dengam. Hapus hasil kahekam akan irampas ewen. Ikau akan ilihi rinjo-rinjong halowai mendeng kilau lontei tuntang akan tampayah aloh are. Kipem tuntang kanjim te

³⁰je mawi buku kapehe toh akam. Ikau jadi lontei akan kare bangsa, tuntang mamapa arepm dengan kare hampatong dewa ain ewen.

³¹Ikau manuntut awan pain kakam, awi te ikau akan ihukum-Ku dengan hukuman je sama.”

³²TUHAN Ije Pangkahai hamauh, “Taloh je huang sangkir kakam musti ikau manelee. Sangkir te hai tuntang handalem huange. Huange kontep auh baka tuntang auh halalea, je inanggongm bara genep bitin oloh.

³³Sangkir kakam Samaria, basuang kikeh tuntang kabinasa. Limbah ikau mihop uras huange ikau akan babusau tuntang kapehe. Tuntang hapan kare kiwak sangkir te ikau akan marabit-rantat usokm. Aku, TUHAN Ije Pangkahai jari hakotak.”

³⁴

³⁵TUHAN Ije Pangkahai hamauh, “Awi ikau jari mangalapean Aku tuntang manalikut Aku, ikau akan kapehe awi kipem tuntang gawim je malontei te.”

³⁶TUHAN hamauh dengangku, “O anak olon, en jari sadia ikau mahakim Ohola tuntang Oholiba? Tingak ewen tahiu kapapa je jari iawi ewen.

³⁷Ewen jari malalus gawi habandong tuntang mampatei; ewen jari habandong dengan kare hampatong dewa tuntang mampatei kare anak-Ku je inakan ewen. Kare anak te jari iluput ewen akan kare dewan ewen.

³⁸Tuntang dia jete bewei. Ewen kea mamapa humang-Ku tuntang andau Sabat je jari inukas-Ku te.

³⁹Hong andau ewen mampatei kare anak-Ku tuntang malupute akan kare hampatong dewa, ewen due handi te dumah akan Humang-Ku tuntang mamapae!

⁴⁰Ewen mangirim parawei haream akan kare oloh hatue hong tanah je kejau, tuntang ewen manalih parawei te. Akan manambang kare oloh je dumah te, ewen due handi te mandoi, mahapan calak mata tuntang mangkepan kare pakaian kabungas.

⁴¹Palus ewen mondok intu hunjun sasuro je bahalap. Intu taharep baue aton meja je kontep dengan taloh kinan, aton kea garo tuntang undus saitun je jari inenga-Ku akan ewen.

⁴²Bara luar tarahining auh karidun oloh are je rami-rami. Kare oloh te jari irawei dumah bara padang pasir. Ewen mangkepan galang intu lengen ewen due handi te, tuntang mangkepan kare makota je bahalap intu takoloke.

⁴³Palus tirok-Ku ‘En magon nahuang kare oloh te hasinta dengan kare lontei je jari balayu awi gawi habandong?’[49]

⁴⁴Ganti gilir kare oloh manalih Ohola tuntang Oholiba, due lontei je jari rusak te.

⁴⁵Tapi kare oloh barasih akan mahakim ewen due handi te hagalang gawi habandong tuntang mampatei, awi ewen puna sala.”

⁴⁶TUHAN Ije Pangkahai hamauh, “Tehau ije baris oloh je akan mangapehe tuntang marampok due lontei toh.

⁴⁷Nauhe ewen imedak hapan batu tuntang inyarang hapan padang. Nauhe kare anak ewen inyambalih tuntang kare human ewen inusol.

⁴⁸Hong hapus tanah akan inganan awi-Ku kapapa je tumon te. Gawing-Ku te akan jadi pampingat akan genep bitin oloh bawi uka ela habandong kilau ewen due handi te.

⁴⁹O Ohola tuntang Oholiba, Aku akan mahukum keton awi keton habandong tuntang manyembah hampatong dewa. Maka keton katawan je Aku toh TUHAN Ije Pangkahai.”