Read Ngaju ESEKHIEL 24 Bible Online

ESEKHIEL 24 - Ngaju bible

ESEKHIEL 24

¹Hong tanggal sapuluh, bulan sapuluh, hong nyelo je kajalatien nampara bara katika ikei inawan, TUHAN hakotak dengangku,

² “O anak olon, catet tanggal andau toh, awi andau toh raja Babel nampara mangapong Yerusalem.

³Aku, TUHAN, aton ije paribasa handak inyampai akan ungkup-Ku je rajin malawan Aku: Nusoh danum akan huang ketel palus andak intu hunjun apui.

⁴Laboh isin meto akan huange isin meto je pangkahalape; isin sapak lengee tuntang isin sapak paie tuntang kare tulange.

⁵Keleh mahapan isin tabiri tabela je baseput tuntang nambah kare[50] pandoke. Nauhe danume manara toto-toto hapa malontoh isin meto te hayak kare tulange.”

⁶TUHAN Ije Pangkahai hamauh, “Calaka lewu je kontep dengan oloh pamuno te! Lewu te kilau ketel batagar je dia puji inggosok. Isin meto je intu huange impalua mije-mije sayate sampai jaton je batisa.

⁷Intu lewu te aton pampatei, tapi dahan oloh te dia batusoh akan petak, malengkan akan hunjun batu je batekang, tuntang dia tau ingawok.

⁸Daha te inalua-Ku intu hete uka tau gitan tuntang tau mambaleh.”

⁹TUHAN Ije Pangkahai hakotak, “Calaka lewu je kontep dengan oloh pamuno te! Aku kabuat je akan manyusun kayu hapa manusule.

¹⁰Tambah kayue! Ngipas apuie! Luntoh isie! Nganan danume.[51] Mapui kare tulange!

¹¹Toh nggaran ketel tambaga je buang te intu hunjun apui tuntang nalua sampai randa-randang. Limbah tagare bakehu, ketel te akan barasih haluli tumon atoran agama.

¹²Tapi dia urase tagare akan nihau bakehu.[52]

¹³O Yerusalem, kare gawim habandong jari mamapa arepm. Aku jari mancoba marasih ikau, tapi jaton gunae, awi ikau tetep papa. Ikau dia tau barasih haluli sampai inampohak-Ku kasangit-Ku mawi ikau.

¹⁴Aku, TUHAN Ije Pangkahai jari hakotak. Jari sampai katikae akang-Ku handak mawi. Aku dia akan mangalapean dosam tuntang dia kea mampun atawa masi ikau. Ikau akan ihukum tumon gawim. Aku toh TUHAN Ije Pangkahai jari hakotak.”

¹⁵TUHAN hamauh dengangku,

¹⁶“O anak olon, manyalenga akan induangku oloh je eka sintam. Tapi ikau dia tau manatum tuntang manangis, atawa manalua danum matam mahasor.

¹⁷Ela sampai tangism ihining. Ela mananjong dia mahapan sorban, atawa dia hasarumpah, kilau oloh je kapehe atei. Ela kea manyandurong baum, tuntang ela kuman rote ain oloh je manatum.”

¹⁸Hayak hanjewu aku hakotak dengan bangsa te tuntang hamaleme sawangku matei: Jewue tinai aku malalus taloh je irentah akangku.

¹⁹Rayat misek, “Mbuhen ikau mawi tumon toh? Narai rimae taloh toh akan ikei?”

²⁰Palus aku mansanan akan ewen, “TUHAN manyoho aku

²¹manyampai peteh toh akan keton: Keton manara kaabas Human TUHAN. Keton rajin manampayahe tuntang manalihe, tapi TUHAN akan mamapa Human Ayue. Tuntang kare oloh huang keluargam je magon tabela, je tapalihi intu Yerusalem, akan impatei huang parang.

²²Palus keton akan malalus kilau taloh je ilalusku toh. Keton dia akan mayandurong baun keton atawa kuman rote kapehen atei.

²³Keton akan mananjong basaroban atawa basarumpah, dia manatum atawa manangis. Keton akan sasar pehe awi dosan keton; keton akan bakotok sama arepe keton.

²⁴Awi te aku, Esekhiel akan jadi sonto akan keton; keton akan malalus kilau je ilalusku toh. TUHAN hamauh iete amon taloh te manjadi, keton akan katawan je Aku toh TUHAN Ije Pangkahai.”

²⁵TUHAN hamauh dengangku, “O anak olon, Aku akan manduan Humang-Ku je dehen te bara ewen, je jadi akan tara tuntang kasanang akan ewen, tuntang je inampayah tuntang je inalih ewen dengan kahanjak atei. Balalu akan induang-Ku kea kare anak ewen.

²⁶Hong andau Aku malalus taloh te, ije biti oloh je olih liwus bara kabinasa te akan dumah, tuntang manyampai barita te akan keton.

²⁷Andau te kea ikau akan tau hakotak haluli tuntang dia bisu tinai. Palus ikau akan hakotak dengan oloh te. Kalote ikau akan jadi tanda akan ewen; balalu ewen katawan je Aku toh TUHAN.”