Read Ngaju ESEKHIEL 25 Bible Online

ESEKHIEL 25 - Ngaju bible

ESEKHIEL 25

¹ TUHAN hamauh dengangku,

²“O anak olon, nyapa tanah oloh Amon.

³Nyoho bangsa te mahining auh bara Aku, TUHAN Ije Pangkahai, sanan akan ewen, ‘Keton sanang mite humang-Ku je imapa tuntang tanah Israel imparusak hayak bangsa Yehudi imbit akan eka tawanan.

⁴Awi te keton inalua-Ku impakalah awi kare suku bangsa bara padang pasir Timor. Ewen akan mampendeng kare kemah intu tanah keton palus manetep intu hete. Ewen akan kuman kare bua ain keton tuntang mihop susu bara meto ain keton.

⁵Lewu Raba akan iubah-Ku jadi eka manyakatik onta, tuntang hapus tanah Amon jadi eka manyakatik tabiri. Maka keton katawan je Aku toh TUHAN.’ ”

⁶TUHAN Ije Pangkahai hamauh, “Keton manapok lokap sambil manari hanjak. Keton manawah tanah Israel.

⁷Awi te keton akan inyarah-Ku akan are bangsa je akan marampok tuntang marampas panatau keton. Keton akan imbinasa awi-Ku sampai keton dia tinai kilau ije bangsa tuntang keton jaton bara petak danum kabuat. Maka keton katawan je Aku toh TUHAN.”

⁸ TUHAN Ije Pangkahai hamauh, “Moab[53] hamauh je Yuda te sama dengan kare bangsa beken.

⁹Awi te kare lewu je manjaga kare helat dengan tanah Moab akan inalua awi-Ku inyarang musoh, tamput kea kare lewu je paling bahalap, iete: Bet-Yesimot, Baal-Meon tuntang Kiryataim.

¹⁰Aku akan manalua kare suku bara bangsa padang pasir timor mampakalah Moab[54] hayak tanah Amon, sampai Moab dia tinai kilau ije bangsa.

¹¹Aku akan mahukum Moab, palus ewen katawan je Aku toh TUHAN.”

¹² TUHAN Ije Pangkahai hamauh, “Bangsa Edom jari mawi kasalan hai awi paham tulas mawi Yuda, kilau gawin oloh je mambaleh buno.

¹³Awi te Aku mansanan je Aku akan mahukum Edom tuntang mampatei genep olon hayak genep meto intu hete. Hapus tanah te, bara lewu Téman sampai lewu Dedan, iawi-Ku jadi tunis benyem; rayate akan matei huang parang.

¹⁴Bangsa-Ku Israel akan ihapa-Ku uka mambaleh gawin Edom, tuntang Edom akan iawi-Ku tumon kahain kasangit-Ku. Edom akan katawan kilen angate buah kasangit-Ku. Aku toh TUHAN Ije Pangkahai jari hakotak.”

¹⁵ TUHAN Ije Pangkahai hakotak, “Kare oloh Pilistin jari mambaleh buno hapan katulas je paham toto mawi musohe je banuho-nuhon tuntang mambinasa ewen hapan kontep kasingie.

¹⁶Awi te Aku mansanan je Aku manyarang kare oloh Pilistin tuntang mabinasa ewen. Genep oloh je magon batisa intu saran tasik Pilistin akan impatei awi-Ku.

¹⁷Aku akan mahukum ewen hapan hukuman je babehat tuntang manampohak sakalepah angat kasangit-Ku. Amon ewen mangkeme kasangit-Ku, harun ewen katawan je Aku toh TUHAN.”