Read Ngaju ESEKHIEL 26 Bible Online

ESEKHIEL 26 - Ngaju bible

ESEKHIEL 26

¹ Hong tanggal ije bulan te[55] nyelo kasawalas bara tamparan wayah ikei tawanan, TUHAN hakotak dengangku Koae,

²“O anak olon, oloh Tirus jari basasurak hayak hamauh, ‘Yerusalem jari rusak! Kuasae hong gawin dagang jari nihau! Toh jaton je tau malawan itah tinai hong gawin dagang!’ ”

³TUHAN Ije Pangkahai hamauh, “Aku toh musohm, o Tirus! Aku akan mimbit are bangsa uka manyarang ikau, tuntang ewen akan dumah sama kilau galombang tasik.

⁴Ewen akan marusak kare dinding kotam tuntang mampalongkang kare candi ayum. Uras petak je aton intu hete akan lepah imapas awi-Ku sampai je batisa baya ije batu keang kamahau intu bentok tasik.

⁵Kare oloh palauk akan mukei jala ain ewen intu hunjun batu te. Aku toh TUHAN Ije Pangkahai jari hakotak. Tirus kareh jadi panginan akan kare bangsa.

⁶Ewen akan marampok hayak mampatei kare oloh je melai kare lewu intu janah Tirus. Maka oloh Tirus katawan je Aku toh TUHAN.”

⁷TUHAN Ije Pangkahai hamauh, “Aku akan mimbit Raja Nabukadnesar bara Babel uka manyarang ikau, o Tirus. Raja je paling abas te akan dumah bara utara dengan tantara je are, dengan are kuda tuntang kareta parang hayak pasukan je manongkang kuda.

⁸Kare oloh je melai hong kakare lewu intu janah akan impatei hong parang te. Musoh akan mangali kare parit eka bakalindong, manampa timbok petak hapa mangapong tuntang manyusun kare talawang hai je hapan ewen kilau akan kota malawan ikau.

⁹Ewen akan manelak kare dinding kotam hapan kare pakakas je babehat tuntang manderep kare candim hapan kare dereh sanaman.

¹⁰Kuda ain ewen are toto, sampai badap paie manantawus kawon petak manyangkulep ikau. Auh gotok pasukan je hapan kuda je mihir kareta panginan tuntang kareta parang akan manggerek kare dinding kota ayum metoh ewen mahalau kare lawang tuntang tame lewu je jari baderep te.

¹¹Pasukan je mahapan kuda te akan manyarang hong kare jalan tuntang mampatei kare oloh ayum dengan padang ewen. Kare candim je hai tuntang dehen akan impalongkang.

¹²Kare musohm te akan marampas uras kare panatau tuntang kare ramon dagang. Ewen akan manderep kare dinding kotam tuntang manderep kare humam je bahalap. Ewen akan manduan kare batue, kare papan tuntang petake, palus manjakahe akan tasik.

¹³ Aku akan mampatende kare auh nyanyim tuntang auh kacapim.

¹⁴Je impelai-Ku baya ije batu keang bewei, eka kare palauk mekei kare jala ain ewen. Lewu te dia akan imangun tinai. Aku, TUHAN Ije Pangkahai, jari hakotak.”

¹⁵TUHAN Ije Pangkahai hamauh dengan lewu Tirus, “Kakare oloh je melai saran tasik akan hagenjeh mikeh amon mahining kariak kakalahm tuntang tambawai kare oloh je inyambalih.

¹⁶ Mite kajariam, kare raja bara kare bangsa intu saran tasik akan harikas bara padadusae, mengkak jubah kahaie tuntang bajun ewen je basulam, palus mondok hagenjeh intu petak. Ewen akan paham mikeh tuntang paham balisah.

¹⁷Limbah te ewen akan manyanyi lagu mangubur toh akam: Rusak jari lewu je inara! Kare kapale jari impalomos[56] bara tasik. Oloh lewu toh solake manguasa tasik mawi oloh saran tasik mikeh.

¹⁸Toh, hong andau ikau impakalah, kare oloh je melai kare pulau hagenjeh. Ewen uras tarewen mite ampin karusak je jaton tarasanan.”

¹⁹TUHAN Ije Pangkahai hamauh, “Ikau iawiku jadi tunis benyem kilau lewu je jaton oloh melaie. Aku akan mampaleteng ikau hapan danum bara tasik.

²⁰Palus ikau injakah-Ku akan huang kubur, uka hinje dengan kare oloh bara jaman horan. Inalua-Ku ikau manetep huang kubur, intu bentok eka benyem sampur baur katatahie, hayak dengan oloh matei. Palus tanahm dia akan ielai tinai, tuntang ikau dia akan iitong hong marak[57] oloh belom.

²¹ Ikau iawi jadi sonto je bakaike-ikeh tuntang jete kajarian pambelom ayum. Kare oloh akan manggau ikau, tapi oloh dia akan olih sondau ikau. Aku, TUHAN Ije Pangkahai jari hakotak.”