Read Ngaju ESEKHIEL 28 Bible Online

ESEKHIEL 28 - Ngaju bible

ESEKHIEL 28

¹TUHAN hamauh dengangku,

²“O anak olon, sanan akan raja Tirus auh bara Aku toh TUHAN Ije Pangkahai, ‘Dengan kajohom ikau mitong arepm dewa je mondok hong padadusan intu bentok tasik. Tau bewei ikau mawi arepm kilau dewa, tapi ingat ikau baya olon.

³Tirokm ikau labih pintar bara Danel,[61] sampai jaton taloh basilim je basahokan akam.

⁴Ihapam pangatawan tahiu kapintar kaharati tuntang kaharatim akan mamumpong panatau amas tuntang perak.

⁵Puna toto, ikau pintar badagang tuntang toh jari tatau toto, tuntang panataum te mawi ikau bajoho!’ ”

⁶TUHAN Ije Pangkahai hamauh, “O Tirus, karana ikau mitong arepm sama kilau Hatalla,

⁷Aku akan manyoho tantara bangsa beken je paham tulas akan manyarang ikau. Ewen akan marusak uras kare kahai je jari dinom awi pangatawam tahiu kapintar kaharati tuntang awi kaharatim.

⁸Ikau akan impatei tuntang ingubur intu huang tasik.

⁹Toh amon wayah te jari sampai, en magon tau ikau hamauh manyewut arepm Hatalla? Intu taharep kare oloh je mampatei ikau, tarang je ikau baya olon.

¹⁰Ikau akan matei kilau oloh je asi-asi awi impatei oloh bangsa beken je dia kasene Hatalla. Aku, TUHAN Ije Pangkahai jari hakotak.”

¹¹TUHAN hamauh tinai dengangku, Koae,

¹²“O anak olon, keleh manatum akan raja Tirus. Sanan akae auh bara Aku toh TUHAN Ije Pangkahai, ‘Ikau puji jadi akan tanding kahalap; bihin ikau toto pintar harati tuntang bakena!

¹³Ekam melai intu Eden, kabon ain Hatalla. Pakaiam ihias hapan sepsimpan batu permata: batu delima tuntang intan, topas, batu pirus, batu yakut, ratna, campaka, batu nilam, jamrud, tuntang manikam. Pakaian kabungas bara amas ayum kea are. Kare ramo te inampa akam[62] hong andau ikau injapa.

¹⁴Malekat je bakaike-ikeh ampie iandak awi-Ku intu hete uka manjaga ikau.[63] Ikau melai intu hunjun bukit aing-Ku je barasih tuntang mananjong intu marak batu permata je barangilat.

¹⁵Gawim bahalap bara metoh ikau injapa sampai ikau nampara mawi kapapa.

¹⁶Ikau harajur deroh badagang tuntang jete je mimbit ikau akan kakaras tuntang dosa. Palus Aku maharak ikau bara bukit-Ku je barasih, tuntang malekat je manjaga ikau maharak ikau bara marak permata je barangilat te.

¹⁷Ampin baum je bakena mawi ikau bajoho, tuntang kahain aram mawi ikau malalus kahumong. Awi te ikau irapitan awi-Ku akan petak tuntang iawi-Ku indu pampingat akan raja beken.’ ”

¹⁸TUHAN hamauh, “Tirus, ikau mamapa kare eka sombayangm, awi kare kasalan tuntang awi ikau mamikir oloh metoh ikau badagang. Awi te Aku mangehu ikau sampai rata dengan petak. Uras oloh je mite ikau baya mite kawo bewei.

¹⁹Ikau jari lilap sampai katatahie. Uras bangsa je kasene ikau hagenjeh awi mikeh akan buah kajarian taloh je sama kilau ikau te.”

²⁰ TUHAN hamauh dengang-Ku,

²¹“O anak olon, nyapa lewu Sidon.

²²Nyampai akan kare oloh lewu te je Aku toh TUHAN Ije Pangkahai hamauh dengan ewen, ‘Aku toh musohm o Sidon. Kare oloh akan manara Aku awi gawing-Ku dengam. Metoh Aku mahukum kare oloh hong lewum toh, ewen akan katawan je Aku toh TUHAN je barasih haliai.

²³Aku akan mawi panyakit, tuntang manalua daha mahasor intu kare jalan ayum. Ikau akan inyarang musoh bara hete-hete, tuntang oloh je melai lewum akan impatei. Maka harun ikau katawan je Aku toh TUHAN.’ ”

²⁴TUHAN hamauh, “Kare tanah hakaliling je puji manawah Israel, dia tinai kilau duhi je mangapehe Israel. Ewen akan katawan je Aku toh TUHAN Ije Pangkahai.”

²⁵TUHAN Ije Pangkahai hakotak, “Aku akan mamumpong kare oloh Israel bara kare lewu kejau eka ewen jari inaburan awi-Ku, tuntang uras kare bangsa akan katawan je Aku barasih. Bangsa Israel akan melai tinai intu tanah ewen kabuat, tanah je jari inenga-Ku akan rewar-Ku Yakob.

²⁶Ewen akan belom sanang intu hete tuntang mamangun kare huma hayak manampa kare kabon anggor. Aku akan mahukum uras bangsa kaliling ewen je jari manawah ewen, sampai Israel sanang. Maka ewen katawan je Aku toh TUHAN.”