Read Ngaju ESEKHIEL 29 Bible Online

ESEKHIEL 29 - Ngaju bible

ESEKHIEL 29

¹ Hong tanggal due walas bulan sapuluh, hong nyelo kasapuluh nampara bara wayah ikei tawanan, TUHAN hamauh dengangku,

²“O anak olon, tingak raja Misir. Sanan akae je Aku akan mahukum ie tuntang kakare rayate.”

³TUHAN Ije Pangkahai manyoho Aku manyampai akan raja Misir peteh toh, “Aku toh musohm, o bajai je hai je menter intu bentok batang danum. Ikau mangamburau mansanan batang danum Nil te ayum tuntang ikau manampae.[64]

⁴Aku akan mangkepan kawit intu ijangm tuntang mampaleket kare lauk intu tisikm. Palus ikau ihir-Ku balua bara batang danum Nil hayak kakare lauk je leket intu tisikm te.

⁵Limbah te ikau dengan uras kare lauk te injakah awi-Ku akan padang pasir. Bitim akan ihampas intu petak tuntang halelek intu hete. Jaton ije oloh je mangubur ikau. Bitim akan inenga-Ku akan kare burong tuntang akan kare meto beken indu kinan ewen.

⁶ Palus hapus rayat Misir katawan je Aku toh TUHAN.” TUHAN hamauh, “O bangsa Misir! Oloh Israel maharap pandohopm, tapi ampie ikau baya sama kilau tongkeh je balemo bewei.

⁷Metoh ewen basinggoh intu ikau, ikau bapelek tuntang majok katiak ewen, sampai likut ewen talukas.[65]

⁸Awi te Aku, TUHAN Ije Pangkahai, mansanan akam, iete Aku akan manyoho tantara je akan manyarang ikau hapan padang, tuntang mampatei oloh je melai tanahm tuntang kare meto ayum.

⁹Misir akan jadi tanah je tunis benyem. Maka keton katawan je Aku toh TUHAN.” TUHAN hamauh, “O raja Misir! Awi ikau hamauh je batang danum Nil te ayum tuntang ikau je manampae,

¹⁰maka Aku manjadi musohm, tuntang musoh batang danum Nil. Hapus Misir akan iawi-Ku jadi tanah je tunis benyem nampara bara lewu Migdol intu utara sampai lewu Aswan intu salatan, sampai helat dengan Sudan.

¹¹Jaton ije olon atawa meto je akan mahalaue. Katahin epat puluh nyelo jaton ije oloh je melaie.

¹²Aku akan mawi Misir tunis benyem, sampai intu marak kare tanah benyem je beken, Misir te je paling benyem. Katahin epat puluh nyelo kare lewu intu Misir kilau tisan derep lewu je labih paham bara kare derep lewu je kueh bewei kea. Bangsa Misir akan iawiku jadi oloh babuhau. Ewen akan pisah darai akan uras kare lewu tuntang melai intu marak bangsa beken.”

¹³TUHAN Ije Pangkahai hamauh, “O bangsa Misir, limbah epat puluh nyelo te, ikau akan imbit-Ku haluli bara kare lewu ekam jari inaburan.

¹⁴Ikau akan ihalalian awi-Ku tuntang inyoho-Ku melai intu Misir hila salatan, lewu asalm. Intu hete ikau akan mampendeng karajaan je balemo,

¹⁵je paling balemo hong hapus kalunen. Aku akan mawi ikau paham balemo sampai ikau dia akan tau marentah kare bangsa beken atawa manamam arepm dengan ewen.

¹⁶Israel dia akan balaku pandohop bara ikau tinai. Kajariam o bangsa Misir akan mampingat Israel je kalote kasalae mampaandal Misir, sama kilau je puji ilaluse. Maka Israel katawan je Aku toh TUHAN Ije Pangkahai.”

¹⁷Hong tanggal ije bulan ije hong nyelo kadue puluh uju manampara bara wayah ikei tawanan, TUHAN hamauh dengangku,

¹⁸“O anak olon, Raja Nabukadnesar bara Babel manyarang Tirus. Ie manyoho kare tantara meton kare ramo je paham babehat, sampai takolok ewen haborang tuntang hunjun bahan ewen bakulap, tapi aloh raja atawa tantarae dia mandino hasil en-en bara kaheka te.

¹⁹Awi te, Aku toh TUHAN Ije Pangkahai hamauh: Tanah Misir akan inenga awi-Ku akan Raja Nabukadnesar. Ie akan marampok tuntang marampas hayak munda uras panatau Misir kilau upah akan tantarae.

²⁰Tanah Misir akan inenga-Ku akae kilau baleh gawie, awi tantarae jari bagawi akang-Ku. Aku, TUHAN Ije Pangkahai jari hakotak.

²¹Amon taloh te manjadi, Aku akan mawi bangsa Israel bangsa je abas, tuntang je mawi ikau olih, Esekhiel hakotak bebas sampai uras oloh tau mahining auhm. Maka ewen katawan je Aku toh TUHAN.”