Read Ngaju ESEKHIEL 3 Bible Online

ESEKHIEL 3 - Ngaju bible

ESEKHIEL 3

¹ Hatalla hamauh, “O anak olon, kinan balon surat toh, palus lius haguet hakotak dengan kare oloh Israel.”

²Palus aku manganga nyamangku tuntang Hatalla manenga balon surat te akangku mangat aku kumae.

³Koan Hatalla, “O anak olon, kinan! Suang kanaim hapan balon surat toh.” Palus surat te kinan awiku tuntang angate manis kilau mado.

⁴Hatalla hamauh tinai, “O anak olon, lius talih oloh Israel tuntang nyampai uras peteh-Ku akan ewen.

⁵Ikau inyoho-Ku manalih ewen, tuntang dia manalih bangsa je bahali basae, beken auhe tuntang dia ikau harati riman kotake. Jaka ikau inyoho-Ku talih bangsa je kilau te, ewen akan mahining auhm.

⁷Tapi bangsa Israel dia maku mahining auhm, Aku mahin dia ewen padulie. Uras ewen badungil tuntang rajin malawan.

⁸Toh ikau awi-Ku badungil tuntang dia murah manyarah kilau ewen kea.

⁹Ikau akan iawi-Ku tumon katekang batu karang tuntang intan. Ela mikeh dengan kare oloh je mambarontak malawan te.”

¹⁰Limbah te Hatalla hamauh, “O anak olon, seneh bua-buah tuntang ingat uras kare taloh je akan insanang-Ku akam.

¹¹Talih bangsa ayum je aton hong eka tawanan te, tuntang sanan akan ewen auh bara Aku, TUHAN Ije Pangkahai, en ewen maku mahining atawa dia.”

¹²Palus Roh Hatalla manggatang aku tuntang intu likutku ihiningku auh goho-gohop je hamauh, “Keleh tara akan katinduh-kahain TUHAN hong sorga!”

¹³Hiningku auh palapas kare taloh belom te je hatigong, tuntang auh kare roda te je kilau kahain auh petak hagerek.

¹⁴Kuasan TUHAN manalih aku paham kahaie, tuntang metoh aku inggatang tuntang imbit awi Roh te, ateiku mangkeme paham babehat tuntang balasut.

¹⁵Palus aku sampai hong eka kare oloh tawanan melai intu Tel-Abib hong saran sungei Kebar. Katahin uju andau aku melai intu hete; aku teneh suni benyem awi taloh je harun ih puji aku mahininge tuntang mitee.

¹⁶Limbah uju andau, TUHAN hakotak dengangku,

¹⁷“O anak olon, ikau inukas-Ku jadi panjaga Israel. Sanan akan ewen pampingat je inenga-Ku toh.

¹⁸Amon Aku mansanan ije biti oloh papa akan ihukum matei, tapi ikau dia mampingat ie uka ie mobah gawie mangat ie salamat, palus ie akan matei magon kilau oloh badosa, maka pampateie je kilau oloh badosa te manjadi tanggong jawab aim je inuntut awi-Ku bara ikau.

¹⁹Amon ikau mampingat oloh papa te tuntang ie dia maku terai mawi gawi papa, ie akan matei kilau oloh badosa, tapi ikau kabuat akan salamat.

²⁰Amon ije biti oloh bahalap nampara mawi dosa, tuntang ie inameang-Ku huang bahaya, maka ie akan matei amon ikau dia mampingat ie. Ie akan matei awi kare dosae, tuntang kare gawie je bahalap akan ingalapeang-Ku. Tinai tanggong jawab tahiu pampateie te ilaku awi-Ku bara ikau.

²¹Amon ikau mampingat oloh je bahalap te uka ela mawi dosa, tuntang ie manumon nasehatm, maka Aku dia akan mahukum ie tuntang ikau salamat.”

²²Kameangku aton kaabas pandumah TUHAN tuntang hiningku Ie hamauh dengangku, “Misik tuntang lius akan janah. Intu hete Aku handak hakotak dengam.”

²³Palus aku haguet akan janah, tuntang intu hete aku mite kalawa manyirau je mamparahan pandumah TUHAN kilau je jari gitangku intu saran Sungei Kebar. Palus aku balawo mahingkep intu petak,

²⁴tapi Roh Hatalla tame tuntang mampendeng aku. TUHAN hamauh dengangku, “Buli tuntang ngurong arepm intu huang huma.

²⁵O anak olon, ikau akan imasong hapan tali sampai dia tau balua tuntang dia tau hasondau dengan oloh.

²⁶Aku akan mampakejer jelam sampai ikau dia tau mampingat bangsa je mambarontak toh.

²⁷Kareh, amon Aku hakotak dengam tinai tuntang mawi ikau tau hakotak tinai, ikau musti manyampai akan ewen auh je bara Aku, TUHAN Ije Pangkahai. Belahe ewen akan mahining, tapi belahe dia, awi ewen puna bangsa je palawan.”